ĨSOMO YA 14

Kumĩlya Nesa Maũndũ Ala Manene

Aevelania 8:1

KWA ŨKUVĨ: Tetheesya ethukĩĩsya maatĩanĩe naku yĩla ũkumya ũvoo, na ũyonanyʼa nesa nĩ kwa nzĩa yĩva kĩla ũndũ mũnene ũkonanĩtye na kĩeleelo kya ũvoo ũsu, na ũndũ ũla mũnene vyũ.

ŨNDŨ ŨTONYA KWĨKA ŨU:

Ĩthĩwa na kĩeleelo. Sũanĩa kĩeleelo kya ũvoo waku. We wĩenda andũ mamanye ũndũ mũna, wĩenda kũmaĩkĩĩthya, kana wĩenda kũmathangaasya? Wamanya kĩeleelo kya ũvoo waku, ĩyũmbanyʼe kwosana na kĩeleelo kĩu. Maũndũ ala manene ũũneenea ũvoonĩ waku nĩmaĩle kũũtetheesya wonanyʼe kĩeleelo kĩu nesa.

Ĩkũlye-ĩ: ‘Ethukĩĩsya makwa matonya kwĩthĩwa maisũanĩa makũlyo meva makonetye ũvoo ũũ? Nĩ kyaũ matonya kwĩthĩwa mesĩ kĩũleana na ũvoo ũũ? Matonya kũkũlya ĩkũlyo yĩva, na masũngĩwa matonya kũkũlya yĩngĩ yĩva?’ Ĩtina wa ũu, vanga maũndũ ala ũkwenda kũneenea maatĩanĩe oou nĩ kana ethukĩĩsya methĩwe matonya kũatĩanĩa naku, kũelewa, na kwĩtĩkĩlana na kĩla ũũmatavya.
Kindĩlĩĩla ũndũ ũla mũnene vyũ ũvoonĩ waku. Weta ũndũ ũla mũnene vyũ ũvoonĩ waku mavinda maingĩ yĩla ũendeee kumya ũvoo. Ĩka ũu kwa kũtũngĩlĩĩla ndeto ila sya vata ikonanĩtye na ũndũ ũsu mũnene, kana kũweta ndeto ingĩ ta isu.
Eka maũndũ ala manene moneke nesa na maieleeka. Nyuva o maũndũ manene ala makonanĩtye na ũndũ ũla mũnene vyũ ũvoonĩ waku. Waĩle kwĩthĩwa ũtonya kũtũmĩa maũndũ asu kũmanyĩsya nesa ũteũvĩtũkya ĩvinda yĩla ũnengetwe. Ndũkaneenee maũndũ maingĩ manene. Weta nesa kĩla ũndũ mũnene na wamina kũelesya ũndũ ũmwe mũnene, vindya vanini ũtanambĩĩa kũelesya ũndũ ũla ũngĩ, na ũiatĩanĩsya maũndũ ala manene nesa.

No ũwete maũndũ ala manene mwambĩĩonĩ wa ũvoo waku nĩ kana ũtetheesye ethukĩĩsya maku maatĩanĩe naku nesa. O na no ũmawete ĩngĩ ũiminĩĩa ũvoo waku nĩ kana ethukĩĩsya methĩwe matonya kũmalilikana.