Mavuku Ala Monanĩtwʼe Nthĩnĩ wa Kavuku ka Ũmbano wa Mwĩkalĩle wa Aklĩsto
© 2024 Watch Tower Bible and Tract Society of Pennsylvania
MATUKŨ 6-12, MWEI WA 5
MAŨNDŨ MA VATA KUMA NDETONĨ YA NGAI SAVULI 36-37
“Ndũkenyamasye Nũndũ wa Ala Mekaa Naĩ”
w03 12/1 13 ¶20
“Ĩtanʼye Nthĩnĩ wa Yeova”
20 Na ĩndĩ, “ala auu makatiĩwa nthĩ.” (Savuli 37:11a) Ĩndĩ ala “auu” naaũ? Ndeto ĩla ĩalyũlĩtwe “ũuu” yumanĩte na ndeto “kũthĩnĩka, kwĩthĩwa na wĩnyivyo, kana kwona ũte wa vata nũndũ wa ũndũ ũũkuwa nĩ andũ angĩ.” Kwoou, “ala auu” nĩ andũ ala mamweteelaa Yeova me na wĩnyivyo ose ĩtambya ya kũmina ũsili ũte wa katĩ wʼonthe. “Makeetanʼya mũuonĩ mwingĩ.” (Savuli 37:11b) O na ũmũnthĩ, nĩtũkwataa mũuo mwingĩ kĩkundinĩ kya wʼo kya Kĩklĩsto kĩla kĩelekanĩtwʼe na valatiso ya kĩ-veva.
Ũthwii wa Kĩ-veva
it-2 445
Kĩĩma
Kĩndũ kĩtathingĩthĩka, kĩlũmu, kana kĩndũ kĩtũlu. Iĩma ieleawʼa ta kĩndũ kĩtathingithĩka na kĩlũmu. (Isa 54:10; Ava 3:6; sianĩsya na Sav 46:2.) Kwoou, yĩla mũandĩki wa Savuli waisye kana ũlũngalu wa Yeova ũilye ta “iĩma sya Ngai” (Sav 36:6) nĩvatonyeka akethĩwa oonanasya kana ũlũngalu wa Yeova ndũthingithĩka. Kana nũndũ iĩma syĩthĩawa syĩ ndũlu, nĩvatonyeka akethĩwa oonanasya kana ũlũngalu wa Ngai wĩ ĩũlũ mũno kwĩ wa mũndũ. (Sianĩsya na Isa 55:8, 9.) Yĩla ila mbakũli mũonza sya ũthatu wa Ngai syatulũalwa, ĩandĩko ya Ũvuanyʼo 16:20 yaĩtye: “Iĩma iyaaoneka.” Ũu nĩkwonanyʼa kana o na syĩndũ ila ndũlu ta iĩma iyĩsa kũvonoka kũtulũlwa kwa ũthatu wa Ngai.—Sianĩsya na Yel 4:23-26.
MATUKŨ 13-19, MWEI WA 5
MAŨNDŨ MA VATA KUMA NDETONĨ YA NGAI SAVULI 38-39
Ndũkaendeee Kwĩtũla Mũtĩ Mũno Nũndũ wa Mavĩtyo Weekie
w02 11/15 20 ¶1-2
Tũtonya Kwĩkala kwa Nzĩa Ĩkũmwendeesya Yeova Ata?
MĨTHENYA ya thayũ witũ nĩ mĩkuvĩ mũno. Ĩtina wa mũandĩki wa Savuli Ndaviti kũsũanĩa ũndũ thayũ ũkuvĩvĩte, avoyie asya: “Yeova, manyĩthya mũminũkĩlyo wakwa, na ũtalo wa mĩthenya yakwa, ũndũ yĩana; nĩmanye ũndũ mbinyĩte. Sisya, mĩthenya yakwa ũmĩtwʼĩkĩthĩtye ta kũthima kwa kĩtaa kya kwʼoko; na ũasa wa thayũ wakwa ti kĩndũ mbee waku.” Wendi wa Ndaviti waĩ kwĩkala kwa nzĩa ĩkũmwendeesya Ngai kwĩsĩla ũneeni wake na meko make. Nĩ kana onanyʼe kana nĩwamwĩkwatĩtye Ngai, aisye: “Wĩkwatyo wakwa wĩ nthĩnĩ waku.” (Savuli 39:4, 5, 7) Yeova nĩwamwĩthukĩĩisye. Vate nzika, nĩwathianie meko ma Ndaviti na amũathima.
Nĩvatonyeka tũkethĩwa na maũndũ maingĩ ma kwĩka kĩla mũthenya, na ĩvinda yĩivĩta tũteũmanya, na kĩu no kĩtũvĩngĩĩse. Ũndũ ũsu no ũtume twambĩĩa kwĩmakĩa, na mũno mũno tweethĩwa na maũndũ maingĩ ma kwĩka, na ĩvinda nĩ ĩnini. Yo ithyĩ nĩtwĩthĩawa na wendi ta wa Ndaviti wa kwĩkala kwa nzĩa ĩkũmwendeesya Ngai? Vate nzika, Yeova nũsiasya na akathiana kĩla ũmwe witũ nesa vyũ. Myaka ta 3,600 mĩvĩtu, Yovu ũla wamũkĩĩte Ngai nĩwaisye kana Yeova nĩwoonie nzĩa syake na atala matambya make onthe. Yovu akũlilye atĩĩ: “Yĩla wĩsila, ngamũsũngĩa ata?” (Yovu 31:4-6, 14) No twĩkale kwa nzĩa ĩkũmwendeesya Ngai twavĩtya maũndũ ma kĩ-veva mbee, tweewʼa mĩao yake, na twatũmĩa ĩvinda yitũ kwa ũĩ. Ekai tũneenee maũndũ asu kwa ũliku.
MATUKŨ 20-26, MWEI WA 5
MAŨNDŨ MA VATA KUMA NDETONĨ YA NGAI SAVULI 40-41
Nĩkĩ Twaĩle Kũtetheesya Ala Angĩ?
Ũthwii wa Kĩ-veva
it-2 16
Yeova
Ngewa yonthe ĩla yĩ Mbivilianĩ ĩneeneete kũtetewa kwa ũsumbĩ mũnene wa Yeova, na kĩu nĩkyonanasya nesa kĩeleelo kĩnene kya Yeova Ngai, nakyo nĩ kũthewʼa kwa ĩsyĩtwa yake. Ũu nĩkwonanyʼa kana maũndũ onthe mathũku ala maneeneawa ĩsyĩtwa ya Ngai makavetangwa. Ĩndĩ o na eka ũu, ĩsyĩtwa yĩu nĩyaĩlĩte kũnengwa ndaĩa na kwoneka yĩ ĩtheu nĩ syũmbe syonthe ĩtunĩ na kũũ nthĩ. Ũu nĩ kwasya kana syũmbe isu nĩsyaĩlĩte kũmanya na kũnenga ndaĩa ũsumbĩ mũnene wa Yeova, iyĩka ũu na ngenda, na iyĩthĩwa syĩyumĩtye kũmũthũkũma nũndũ nimwendete. Mboya ĩla Ndaviti wamũvoyie Yeova nthĩnĩ wa Savuli 40:5-10 nĩyĩeleetye nesa woni ũsu, na kũthewʼa vyũ kwa ĩsyĩtwa ya Yeova. (Kwoona ũndũ mũtũmwa Vaulo watũmĩie maũndũ amwe me nthĩnĩ wa Savuli ĩsu aineenea Yesũ Klĩsto nthĩnĩ wa Avl 10:5-10.)
MATUKU 27, MWEI WA 5–MATUKŨ 2, MWEI WA 6
MAŨNDŨ MA VATA KUMA NDETONĨ YA NGAI SAVULI 42-44
Tũmĩa Nesa Maũndũ Ala Tũmanyĩawʼa Nĩ Yeova
w06 6/1 9 ¶4
Maũndũ Manene Kuma Ĩvukunĩ ya Kelĩ ya Savuli
42:4, 5, 11; 43:3-5. Ethĩwa nũndũ wa itumi na itathũkĩĩka nĩtweethĩwa tũtatonya kwĩthĩwa kĩkundinĩ kya Kĩklisto kwa ĩvinda yĩana ũna, kũlilikana maũndũ ala tũnatanĩaa ĩvinda ĩvĩtu twĩ vamwe no kũtwĩkĩe vinya. O na kau mbeenĩ no twĩthĩwe tũyĩũmĩa mũno nũndũ wa kwĩwʼa twĩ ithyoka, ũndũ ũsu no ũtũlilikanyʼe kana Ngai nĩ wĩvitho witũ, na kwoou nĩtwaĩlĩte kũmweteela nĩ kana atũtetheesye.
w12 1/15 15 ¶2
Ũndũ Ũtonya Kwĩka Nĩ Kana Ũtanĩe Mũnango Kwĩmanyĩsya na Ũitetheka
1 VOYA: Ĩtambya ya mbee yĩla waĩle kwosa nĩ kũvoya. (Sav. 42:8) Nĩkĩ? Twaĩle kwonaa kwĩmanyĩsya Ndeto ya Ngai ne kĩlungu kya ũthaithi witũ. Kwoou nĩtwaĩlĩte kũmũkũlya Yeova atũtetheesye tũelewe kĩla tũũsoma, na aitũnenga veva wake mũtheu. (Luka 11:13) Barbara, ũla wĩthĩĩtwe e misonalĩ kwa ĩvinda yĩasa aĩtye: “Kĩla ĩvinda ndanambĩĩa kũsoma kana kwĩmanyĩsya Mbivilia, nĩnĩvoyaa. Ĩtina wa kwĩka ũu, nĩnĩwʼaa Yeova e vamwe nakwa, na kana nĩwendeeawʼa nĩ kĩla nĩendeee kwĩka.” Kũvoya tũtanambĩĩa kwĩmanyĩsya nĩkũvingũaa ilĩko na ngoo sitũ syĩtĩkĩle vyũ lĩu mwingĩ wa kĩ-veva ũla twĩ nawʼo.
Ũthwii wa Kĩ-veva
w86 10/15 29
Ĩkwatye Ngai
42:1—Nĩ kwa nzĩa yĩva mũandĩki wa Savuli wailyĩ ta ‘ndaatai ĩkũvevaveva ĩkĩmantha tũlũsĩ twa manzĩ’?
Mũlivai ũũ aĩ mũtave nũndũ wa itumi na. Kwoou aĩ na mea mũno ma kũmũthaithĩa Yeova vala vandũ vatheu, na nĩkyo kĩtumi weewʼaa ta ndaatai ĩsembanĩtwʼe na yĩ na waũni, kana ndaatai nga yĩ na waũni mwingĩ yĩ nthĩ ĩte na kĩwʼũ. Aĩ na “waũni” kana mea kwondũ wa Yeova, na kĩanda kya mwanya kya kũmũthaithĩa Ngai vala vandũ vatheu.—Mũsoa wa 2.
MATUKŨ 3-9, MWEI WA 6
MAŨNDŨ MA VATA KUMA NDETONĨ YA NGAI SAVULI 45-47
Wathi Ĩũlũ wa Mũtwaano wa Mũsumbĩ
it-2 1169
Kaũ
Ĩtina wa kaũ ũsu kũthela, kũkeethĩwa na mũuo ĩũlũ wa nthĩ kwa ĩvinda ya myaka ngili. Ndeto ila syĩ nthĩnĩ wa Savuli syaĩtye, “[Yeova] nũtumaa makaũ mathela kũvika kĩtulu kya nthĩ; nũtũlaa ũta, na ĩtumo aitilanga ilungu; makasya ma kaũ nũvĩvasya na mwaki,” nĩsyeanĩie ĩvinda ya mbee yĩla Ngai watumie Isilaeli makwata mũuo kwa kwananga mĩio ya kaũ ya amaitha moo. Ĩtina wa Klĩsto kũsinda ala ũkokita namo kaũnĩ wa Alimaketoni, nthĩ yonthe ĩkatanĩa mũuo mwingĩ na ũtakathela. (Sav 46:8-10) Andũ ala makakwata thayũ wa tene na tene nĩ ala makethĩwa ‘matuĩtye mbyũ syoo ikatwʼĩka maembe ma ngʼombe, na matumo moo tũvyũ twĩ ngoto twa ũsea,’ na ala ‘matakemanyĩsya kaũ ĩngĩ.ʼ “Nũndũ kanywʼa wa Yeova wa nguthu nũneenete ũu.”—Isa 2:4; Mika 4:3, 4.
MATUKŨ 10-16, MWEI WA 6
MAŨNDŨ MA VATA KUMA NDETONĨ YA NGAI SAVULI 48-50
Asyai—Tetheesyai Syana Syenyu Ilũlũmĩĩlye Mũĩkĩĩo Wasyo Ũseũvyonĩ wa Yeova
w11 3/15 19 ¶5-7
Wĩ na Kĩtumi kya Kũtana
“Tambũkai mũthyũlũlũke Saioni; talai myako mĩtũlu ya mĩnyoolo ya vo; sisyai nesa maũvai matũlu mayo; sũanĩai nyũmba nene mbanakavye syayo: Nĩ kana mũtavanʼye nzyawanĩ ĩla yũkĩte.” (Sav. 48:12, 13) Mũandĩki wa Savuli athuthasya Aisilaeli meloele Yelusaleme nesa. Kwasũanĩa maũndũ ma kwendeesya mũno ala mĩsyĩ ya Aisilaeli yaeleasya ĩtina wa kũthi ndũanĩ ntheu ĩvinda ya mboka sya kĩla mwaka, na kwĩyonea ĩkalũ yanake? No nginya methĩwe mendaa mũno ‘kũtavya nzyawa ĩla yũkĩte’ maũndũ asu.
Kwavindĩĩsya ĩũlũ wa mũsumbĩ mũndũ mũka wa Sieva, ũla mbeenĩ ũtaĩkĩĩaa maũndũ ala weewʼĩte ĩũlũ wa ũsumbĩ mũseo wa Solomoni na ũĩ wake mwingĩ. Nĩ kyaũ kyatumie aĩkĩĩa vyũ kana maũndũ ala weewʼĩte maĩ ma wʼo? Aisye: “Ndyaaĩtĩkĩla ndeto syoo, kũvika nĩnooka, na metho makwa nĩmawonete.” (2 Mav. 9:6) Vate nzika, maũndũ ala twĩyoneaa na ‘metho maitũ’ no matũtethye mũno.
Ũtonya kũtetheesya syana syaku ata syone maũndũ ma kwendeesya ĩũlũ wa ũseũvyo wa Yeova na ‘metho masyoʼ? Ethĩwa ve na ovisi wa ũvonge wa Ngũsĩ sya Yeova kĩsionĩ kĩla wĩkalaa, ĩka mĩvango ũtembee ovisinĩ ũsu. Kwa ngelekanyʼo, kĩsionĩ kĩla Mandy na Bethany meanĩie vaĩ na ũasa wa kĩlomita 1,50 0 kuma vala Mbetheli yĩthĩawa nthĩ yoo. Ĩndĩ asyai moo nĩmavangie nĩ kana matembeae Mbetheli mavinda kwa mavinda, na mũno mũno ĩvindanĩ yĩla eĩtu asu moo maendeee kwĩana. Maĩtye: “Tũtanamba kũtembea, twasũanĩaa Mbetheli kũyendaa ngũĩ na no andũ ala akũũ mekalaa kwʼo. Ĩndĩ nĩtweethĩie amũika matanĩaa kũmũthũkũma Yeova na kĩthito! Nĩtwamanyie kana ũseũvyo wa Yeova nĩ mũnene kũvĩtũka kĩsio kitũ kĩnini kĩla twekalaa, na kĩla ĩvinda twatembea Mbetheli tweewʼaa tweekĩwa vinya kĩ-veva.” Kwĩyonea nesa ũndũ maũndũ matwaĩĩawʼa ũseũvyonĩ wa Yeova nĩkwathangaaisye Mandy na Bethany mambĩĩe ũvainia, na o na nĩmesie kũthokwʼa matetheeasye wĩa Mbetheli mavinda kwa mavinda.
w12 8/15 12 ¶5
Ĩthĩwai na Mwĩkalĩle Ũkwosana na Ũvoo Mũseo wa Ũsumbĩ!
5 Ĩmanyĩsye isitoli. Nĩvatonyeka mũndũ ũkwenda kũtwʼĩka laiaa wa silikalĩ ya mũndũ akemanyĩsya maũndũ mana ĩũlũ wa silikalĩ ĩsu. O ta ũu, ala me na wendi wa kũtwʼĩka laiaa ma Ũsumbĩ wa Ngai nĩmaĩle kwĩka kyonthe kĩla matonya nĩ kana memanyĩsye ĩũlũ wa Ũsumbĩ ũsu. Kwasũanĩa ngelekanyʼo ĩla ana ma Kola matũtiĩe, ala mathũkũmaa mbaĩnĩ ya Isilaeli. Nĩmendete mũno Yelusaleme na ũthaithi ũla weekĩawa vo, na nĩmatanĩaa kũelesya isitoli ya ndũa ĩsu. Kĩla kyamendeeasya mũno ti o ũndũ ndũa ĩsu yaakĩtwe, ĩndĩ nĩ kĩla yo, o vamwe na ũthaithi ũla watwaĩĩawʼa vo syoonanasya. Yelusaleme yaĩ “ndũa ya Mũsumbĩ ũla mũnene,” Yeova, nũndũ nĩvo ũthaithi wa wʼo weekĩawa. Vau nĩvo andũ mamanyĩĩawʼa Mĩao ya Yeova. Andũ ala masumbĩkĩtĩtwe nĩ Mũsumbĩ wa Yelusaleme nĩmo Yeova woonasya wendo ũtathelaa. (Soma Savuli 48:1, 2, 9, 12, 13.) We wĩ na wendi wa kwĩmanyĩsya na kũelesya isitoli ya kĩlungu kya ũseũvyo wa Yeova kya kũũ nthĩ o tamo? O ũndũ waendeea kwĩmanyĩsya maũndũ maingĩ ĩũlũ wa ũseũvyo wa Yeova na ũndũ ũtetheeasya andũ make, nowʼo ũkonaa Ũsumbĩ wa Ngai wĩ wa vata thayũnĩ waku. Na kĩu kĩkatuma wĩthĩwa na wendi mwingĩ wa kũtavanyʼa ũvoo mũseo wa Ũsumbĩ.—Yel. 9:24; Luka 4:43.
Ũthwii wa Kĩ-veva
it-2 805
Ũthwii
Aisilaeli maĩ matonya kũtanĩa kũya na kũnywʼa nũndũ mbaĩ yoo yaĩ nthwii (1Asu 4:20; Mũta 5:18, 19), na kwoou ũthwii ũsu nĩwamasũvĩanaa na mathĩna ala maumanaa na ũkya. (Nth 10:15; Mũta 7:12) Ĩndĩ, o na kũtwʼĩka nĩ ũndũ woosanĩte na kĩeleelo kya Yeova Aisilaeli matanĩe ũthwii woo nũndũ wa kũthũkũma na kĩthito (sianĩsya na Nth 6:6-11; 20:13; 24:33, 34), nĩwamakanisye ĩũlũ wa mũisyo wa kũlwa nĩwe Ũla watumĩte methĩwa athwii, na mayambĩĩa kwĩkwatya ũthwii woo. (Kũt 8:7-17; Sav 49:6-9; Nth 11:4; 18:10, 11; Yel 9:23, 24) Nĩmalilikanilwʼe kana ũthwii waĩ o wa kavinda (Nth 23:4, 5), ndwaĩ ũtonya kwovosya mũndũ kuma kĩkwʼũnĩ (Sav 49:6, 7), o na ndwaĩ ũtonya kũtethya mũndũ mũkwʼũ (Sav 49:16, 17; Mũta 5:15). O na ĩngĩ, nĩmalilikanilwʼe kana kũlũmanyʼa mũno na ũthwii kwaĩ kũtonya kũtuma malika mĩkalĩlenĩ mĩthũku, na mayasya ngwatanĩo yoo nzeo vamwe na Yeova. (Nth 28:20; sianĩsya na Yel 5:26-28; 17:9-11.) Na nĩmathangaaiwʼe ‘mamũtaĩe Yeova na syĩndũ syoo.’—Nth 3:9.
MATUKŨ 17-23, MWEI WA 6
MAŨNDŨ MA VATA KUMA NDETONĨ YA NGAI SAVULI 51-53
Kĩla Waĩle Kwĩka Nĩ Kana Wĩvathane na Mavĩtyo Manene
Ũthwii wa Kĩ-veva
it-1 644
Ndoeki
Ndoeki aĩ Mũetomu wathũkũmaa ta mũnene wĩ mbee wa aĩthi ala maĩ ma Mũsumbĩ Saulo. (1Sa 21:7; 22:9) Veonekana kana Ndoeki nĩweetĩkĩlĩte kũtwʼĩka wa ndĩni ya Kĩyuti. Nũndũ Ndoeki “asiĩĩĩkĩte mbee wa Yeova” ndũanĩ ya Novu, na mũno mũno nũndũ wa kwĩthĩwa eevĩtĩte, aĩ na ũvuku mũna, kana asũanĩawa kwĩthĩwa aĩ na mangũ, nĩwoonie Mũthembi Mũnene Aimeleki aimũnenga Ndaviti lĩu, na ũvyũ wa Ngoliathu. Ĩtina, yĩla Saulo aineena na athũkũmi make wawetie ũndũ mamũsamĩĩte, Ndoeki nĩwavuanisye kĩla weeyoneete ndũanĩ ya Novu. Ĩtina wa Saulo kũtũmana mũthembi mũnene Aimeleki, o vamwe na athembi ala angĩ ma Novu na kũmũkũlya Aimeleki makũlyo, Saulo nĩwaumisye mwĩao asũvĩi ala mamũũngamĩe moae athembi onthe. Yĩla maleile, Ndoeki aatĩĩe mwĩao wa Saulo, nĩwooaie athembi 85 ate kwananga saa. Ĩtina wa Ndoeki kwĩka kĩko kĩu kĩthũku, nĩwaanangie Novu kwa kũaa andũ onthe, twana na andũ aima, o vamwe na indo.—1Sa 22:6-20.
Savuli ya 52 ĩneeneete ĩũlũ wa Ndoeki o tondũ maelesyo ala me mwambĩĩonĩ wa kĩlungu (superscription) monanĩtye. Savulinĩ ĩsu Ndaviti aandĩkie ũũ ĩũlũ wa Ndoeki: “Ũĩmĩ waku nĩwambĩlĩlasya kĩla ũthũku, ũilyĩ ta wenzi mũĩ, we mwĩki wa ũkengani. Nĩwendaa ũvũngũ kũvĩta ũseo, na ũvũngũ kũvĩta kũneena ũlũngalu. Nĩwendaa ndeto syonthe ila imelasya, we ũĩmĩ wĩ na ũkengani.”—Sav 52:2-4.
MATUKŨ 24-30, MWEI WA 6
MAŨNDŨ MA VATA KUMA NDETONĨ YA NGAI SAVULI 54-56
Ngai e Ngalĩ Yaku
w06 8/1 22 ¶10-11
Mũkĩe Ngai, na Ũkeethĩwa Mũĩ!
10 Ĩvinda yĩmwe, Ndaviti nĩwaendie kwĩvitha kwa Akisi, mũsumbĩ wa Avilisiti ma ndũa ya Ngathi, na nĩkwʼo kwaĩ mũsyĩ kwa Ngoliathu. (1 Samueli 21:10-15) Athũkũmi ma mũsumbĩ nĩmawetie kana Ndaviti aĩ mũmaitha wa mbaĩ yoo. We Ndaviti eekie ata ĩvindanĩ yĩu thayũ wake waĩ mũisyonĩ? Nĩwamũtulũĩle Yeova kyonthe kĩla kyaĩ ngoonĩ kwĩsĩla mboya. (Savuli 56:1-4, 11-13) O na kau yaĩ no nginya Ndaviti etwʼĩkĩthye e na ndũũka nĩ kana ndakamanyĩke, nĩweesĩ nesa vyũ kana nĩ Yeova wamũvonokisye kwa kũathima kĩthito kyake. Nũndũ Ndaviti nĩwamwĩkwatĩtye Yeova na ngoo yake yonthe na nĩwamũĩkĩĩte, kyu nĩkyoonanisye nesa kana Ndaviti nĩwamũkĩaa Ngai.—Savuli 34:4-6, 9-11.
11 O ta Ndaviti, no twonanyʼe kana nĩtũmũkĩaa Ngai twaĩkĩĩa watho wake wa kũtũtetheesya tũmĩanĩsye na mathĩna maitũ. Ndaviti aisye atĩĩ: “Mwiĩe Yeova nzĩa yaku; mũĩkĩĩe we, nake akeeka.” (Savuli 37:5) Ũu ti kwasya kana twĩke o kũmũtavya Yeova mathĩna maitũ na tũyĩema kwĩkĩa kĩthito tũmathĩnĩkĩe, twĩkwatĩtye kana nũkũtũtetheesya. Ndaviti ndaamũvoya Ngai amũtetheesye na akeka o kwĩkala nthĩ maũndũ metwae nemo. Nĩwatũmĩie ũtonyi wa mwĩĩ na wa kĩlĩko ũla wanengetwe nĩ Yeova, na kwoou amina thĩna wake. Ĩndĩ Ndaviti nĩweesĩ kana ũtonyi wa mũndũ ndwĩsa kũtethya wĩ wʼoka. Na ũu nowʼo o naitũ twaĩle kwĩthĩwa twĩsĩ. Ĩtina wa kwĩka kyonthe kĩla tũtonya kwosana na ũtonyi witũ, nĩtwaĩle kũmũekea Yeova vau vangĩ. Kwa wʼo, mavinda maingĩ wĩthĩaa vai ũndũ tũtonya kwĩka ate o kũmwĩkwatya Yeova. Ĩvindanĩ yĩu nĩwʼo twonanasya kuma ngoonĩ kana nĩtũmũkĩĩte Ngai. No tũkiakiwʼe nĩ ndeto ii Ndaviti wawetie kuma ngoonĩ: “Nzama ya Yeova yĩ na ala mamũkĩaa.”—Savuli 25:14.
cl 243 ¶9
Vai Kĩndũ Kĩsa “Kũtũvathana na Wendo wa Ngai”
9 O na ĩngĩ Yeova nĩwonaa wũmĩĩsyo witũ wĩ wa vata. (Mathayo 24:13) Lilikana kana Satani endaa ũmũtie Yeova. Kĩla mũthenya waendeea kwĩthĩwa wĩ mũĩkĩĩku kwa Yeova, wĩthĩawa ũitetheesya kũsũngĩa ũvũngũ ũla Satani wawetie. (Nthimo 27:11) Mavinda angĩ ti laisi kũmĩĩsya. Mathĩna ma mwĩĩ, mathĩna ma mbesa, mathĩna ma ngoonĩ na kĩlĩkonĩ, na mathĩna angĩ no matume maũndũ methĩwa me momũ mũthenya kũthi ũla ũngĩ. O na ĩngĩ, no tũkwʼe ngoo nũndũ wa maũndũ twĩeteele meanĩe malea kwĩanĩa. (Nthimo 13:12) Yĩla twakwatwa nĩ mawũmũ ta asu na twoomĩĩsya, kĩu nĩkĩmũtanĩthasya Yeova mũno. Nĩkyo kĩtumi Mũsumbĩ Ndaviti wamũkũlilye Yeova ekie methoi make ‘sũvanĩ wake,’ na ongela kwasya ũũ ate na nzika: “Ti maandĩke ĩvukunĩ yaku?” (Savuli 56:8) Vate nzika, Yeova nĩwendeeawʼa na kũlilikana methoi onthe, na kũthĩnwʼa kũla tũmĩĩasya, o tũendeee kwĩthĩwa tũlũmanĩtye nake. O namo methoi asu nĩ ma vata vyũ methonĩ make.
Ũthwii wa Kĩ-veva
it-1 857-858
Kũmanya na Kũvanga Tene Maũndũ Matanamba Kwĩkĩka
Ũndũ ũla Yutasi Isikalioti weekie wa kũmũvũnyanĩa Yesũ nĩweanĩisye wathani, na woonanyʼa kana Yeova nũmanyaa tene maũndũ matanamba kwĩkĩka, o vamwe na Mwana wake. (Sav 41:9; 55:12, 13; 109:8; Mek 1:16-20) Ĩndĩ tũyĩsa kwasya kana Ngai nĩwavangĩte tene kana Yutasi nĩwe ũkeka ũndũ ũsu. Wathani nĩwawetete kana ũmwe wa anyanyae ma vakuvĩ ma Yesũ akamũvũnyanĩa, ĩndĩ ndwawetete ĩsyĩtwa ya ũla waĩ amũvũnyanĩe. O na ĩngĩ, myolooto ya Mbivilia nĩyonanĩtye kana Ngai ndavangĩte tene ĩũlũ wa meko ma Yutasi. Mwĩao wa Ngai ũla wawetiwe nĩ mũtũmwa Vaulo waĩtye atĩĩ: “Ndũkailĩĩle mũndũ moko na mĩtũkĩ; o na ndũkelikye naĩnĩ sya angĩ; ĩyĩkalye wĩ mũtheu.” (1Ti 5:22; sianĩsya na 3:6.) Nĩ kana aĩkĩĩthye nĩwanyuva atũmwa make 12 kwa ũĩ na kwa nzĩa ĩla yaĩlĩte, Yesũ nĩwavoyie Ĩthe wake ũtukũ mũima atanamba kwĩka ũtwi. (Luk 6:12-16) Takethĩwa Ngai nĩwavangĩte tene kana Yutasi nĩwe ũkamũvũnyanĩa Yesũ, kĩu kĩthĩwa kĩyonanyʼa kana myolooto na ũtongoi wa Ngai nĩsyĩũvĩngana, na kwosana na mwĩao ethĩwa ayĩlikya naĩnĩ ila Yutasi weekie.
Kwoou veonekana kana ĩvinda yĩla Yutasi wanyuvawa atwʼĩke mũtũmwa, vai ũndũ o na ũmwe woonanasya kana no avũnyanĩe mũndũ. Nĩweetĩkĩlilye ‘mwĩi wĩ na sumu wumĩle’ na wamũvukya, na kwoou aeka kũtongoewʼa nĩ Ngai, na vandũ va ũu eetĩkĩla kũtongoewʼa nĩ Ndevili, na nũndũ wa ũu atwʼĩka kĩngʼei na mũvũnyanĩi. (Avl 12:14, 15; Yoa 13:2; Mek 1:24, 25; Yak 1:14, 15) Kwosana na maũndũ mathũku ala Yutasi waendee kwĩka, Yesũ aĩ atonya kũmanya kĩla kyaĩ ngoonĩ yake, na kwoou aiweta kana nĩwe ũkamũvũnyanĩa.—Yoa 13:10, 11.