Ndĩni Syonthe Nivwʼanene? Nĩ Syonthe Itumaa Andũ Mamũthengeea Ngai?

Ũndũ Mbivilia ĩsũngĩĩte

Aiee, ndĩni syonthe iivwʼanene. Mbivilia nĩwetete ndĩni imwe ila itamwendeeasya Ngai. No tũsiaanyʼe ikundi ilĩ.

Kĩkundi kya 1: Ila ithaithaa Ngai sya ũvũngũ

Mbivilia yaĩtye kana ũthaithi wa ngai sya ũvũngũ “nĩ mana”, kana nĩ “kĩndũ kya mana.” (Yelemia 10:3-5; 16:19, 20) Yeovaa Ngai atavisye mbaĩ ya Isilaeli atĩĩ: “Ndũkethĩwe na ngai ingĩ ate o nyie.” (Kuma 20:3, 23; 23:24) Yĩla Aisilaeli mathaitha ngai ingĩ, ‘ũthatu wa Yeova nĩwamakanĩaa.’—Motalo 25:3; Alivai 20:2; Asili 2:13, 14.

O na ũmũnthĩ, Ngai ethĩawa na woni o ta ũsu kwelekela “ila syĩtawa ngai” nĩ andũ. (1 Akolintho 8:5, 6; Akalatia 4:8) Atavĩtye ala mekwenda kũmũthaitha kana nĩmaĩle kũeka kũvulana na ala mathaithaa ngai sya ũvũngũ. Ameete atĩĩ: “Umai katĩ woo, na mũyĩvathana namo.” (2 Akolintho 6:14-17) Ethĩwa ndĩni syonthe nivwʼanene na itetheeasya andũ mamũthengeee Ngai, nĩkĩ Ngai ũnenganĩte mwĩao ũsu?

Kĩkundi kya 2: Ila ithaithaa Ngai ũla wa wʼo kwa nzĩa ĩla ũtetĩkĩlĩte

Mavinda amwe, Aisilaeli nĩmamũthaithaa Ngai maatĩĩe syĩthĩo sya ũthaithi wa ngai ingĩ, ĩndĩ Yeova nĩwaleanile na ũndũ ũsu meekie wa kũvulanyʼa ũthaithi wa wʼo na ũthaithi wa ũvũngũ. (Kuma 32:8; Kũtũngĩlĩlwa Kwa Mĩao 12:2-4) Yesũ nĩwakanisye atongoi ma ndĩni ma ĩvinda yake nũndũ wa nzĩa ĩla matũmĩaa kũmũthaitha Ngai. Mekaa maũndũ na wanganganyʼa nĩ kana meyonanyʼe, ĩndĩ ‘nĩmavũthĩĩasya maũndũ manene ma ĩla Mĩao, namo nĩ, ũsili wa katĩ, na tei, na ũĩkĩĩku.’—Mathayo 23:23.

O ta ũu, ũmũnthĩ, ndĩni ĩla ĩtetheeasya andũ mamũthengee Ngai no ĩla ĩmanyĩasya ũwʼo. Na ũwʼo ũsu ũkwatĩkanaa Mbivilianĩ. (Yoana 4:24; 17:17; 2 Timotheo 3:16, 17) Ndĩni ila imanyĩasya maũndũ mataumĩte Mbivilianĩ itumaa andũ mathi vaasa na Ngai. Momanyĩsyo maingĩ ala andũ masũanĩaa ta mumĩte Mbivilianĩ, maumanĩte na ũthaithi wa ngai sya ũvũngũ. Momanyĩsyo asu nĩ ta, Ũtatũ, kana thayũ ndũkusaa, na kana kwĩ ĩia ya mwaki. Ũthaithi ũla ũmanyĩasya maũndũ ta asu nĩ wa “mana,” kana ndũtethya, nũndũ vandũ va kũmanyĩsya maũndũ ala Ngai wendaa twĩke ũmanyĩasya syĩthĩo sya andũ.—Maliko 7:7, 8.

Ngai nũmenete wanganganyʼa wa ndĩni. (Tito 1:16) Nĩ kana ndĩni ĩtetheesye andũ mamũthengeee Ngai, no nginya yĩthĩwe ĩtonya kũmatetheesya maũndũnĩ ala mekaa kĩla mũthenya, vandũ va kũmanyĩsya o syĩthĩo. Kwa ngelekanyʼo, Mbivilia yaĩtye: “Ethĩwa mũndũ o na wĩva esũanĩa kana nĩ mũthaithi wa Ngai ĩndĩ ndeũsiĩĩa ũĩmĩ wake, ekenga ngoo yake mwene, na ũthaithi wake nĩ wa mana. Ũthaithi ũla mũtheu na ũte mũvuku methonĩ ma Ngai waitũ na Asa waitũ nĩwʼo ũũ: kũsũvĩa syana ndiwa na aka ndiwa thĩnanĩ woo, na mũndũ kwĩsũvĩa mwene ndakavukwʼe nĩ maũndũ ma nthĩ ĩno.”—Yakovo 1:26, 27.