Ndonya Kwĩka Ata Yĩla Natũla Mwĩao wa Mũsyĩ?

Vakuvĩ mĩsyĩ yonthe nĩyĩthĩawa na mĩao ĩkonetye maũndũ ta, kwĩnũka tene, kũtũmĩa syĩndũ ta simũ, na kwĩthĩwa na mwĩkalĩle mũseo.

Ũtonya kwĩka ata ethĩwa nĩwatũla mwĩao wa mũsyĩ? Ndwĩsa kũvĩndũa kĩla kĩkĩkie, ĩndĩ no ũsiĩĩe maũndũ maikathũkĩĩe. Kĩlungu kĩĩ nĩkĩũkũtetheesya kwona ũndũ ũtonya kwĩka ũu.

• Kĩla ũtaĩle kwĩka

• Kĩla ũtonya kwĩka

• Kĩla andũ angĩ ma mũika maasya

Kĩla ũtaĩle kwĩka

• Ethĩwa asyai maku mainamanya kana nũtũlile mwĩao, no ũtatĩke kũvitha ũndũ ũsu.

• Ethĩwa nĩmesĩ nũtũlile mwĩao, no wambĩĩe kwĩtetea kana kwilĩĩla mũndũ ũngĩ mavĩtyo.

Vai ũndũ ũmwe mũseo katĩ wa maũndũ asu. Nĩkĩ? Nũndũ yĩla twavwʼĩkĩĩa kĩla kĩneekĩkie kana twanengane itumi ite va siĩ, twonanasya kana tũi aimu. Kĩu kyonasya asyai maku kana ndũnamba kũima.

“Kũkengana kũyĩsa kũtethya o na vanini. Ĩtina wa ĩvinda, ũwʼo ũkamanyĩka, na ĩndĩ ũikanwʼa mũno kwĩ ũndũ wesaa kũkanwʼa.”—Diana.

Kĩla ũtonya kwĩka

• Ĩtĩkĩla mavĩtyo maku. Mbivilia yaĩtye: “Ũla ũvwʼĩkaa mavĩtyo make ndakaathimĩka.” (Nthimo 28:13) Asyai maku nĩmesĩ ndũlea kũvĩtya. Ĩkũlyo nĩ, No wĩthĩwe wĩ mũĩkĩĩku?

  “Asyai maku makakwĩwʼĩaa tei waneena ũwʼo. Weeka ũu, asyai maku makaendeea kũkũĩkĩĩa mũnango na kũlũmanyʼa naku.”—Olivia.

• Ĩtya ũekeo. Mbivilia yaĩtye: ‘Ĩvwʼĩkei wĩnyivyo.’ (1 Vetelo 5:5) Wĩnyivyo nĩwendekaa nĩ kana wasye “Vole” na ũyĩsiĩĩa ndũketetee mũno.

  “Andũ ala mendete kwĩtetea no matume wasya woo wa ngoo ũeka kũthũkũma. Na ĩtina, meeka maũndũ mathũku ũyĩthĩa wasya woo wa ngoo ndũũmathĩnyʼa.”—Heather.

• Ĩtĩkĩla maũndũ ala matonya kũũkwata. Mbivilia yaĩtye: “Ũla wĩtĩkĩlaa ũkanʼyo nĩwosaa kĩlĩko.” (Nthimo 15:5) Ndũkanyungunyĩsye, na atĩĩa kĩla asyai maku meũkwĩa wĩke.

  “O ũndũ waendeea kũnyungunyĩsya yĩla wanengwa ũkanyʼo, nowʼo maũndũ maku makaendeea kũthũkĩĩa. Kwoou, ĩtĩkĩla isiĩĩi ila wĩkĩĩwe na ndũkasũanĩe ĩũlũ wa maũndũ ala ũtekwenda isiĩĩinĩ isu.”—Jason.

• Ĩkĩa kĩthito nĩ kana asyai maku mambĩĩe kũkũĩkĩĩa ĩngĩ. Mbivilia yaĩtye: ‘Umyai mwĩkalĩle wa tene ũla wosanĩte na meko menyu ma tene.ʼ (Aeveso 4:22) Ambĩĩa kwĩkĩa kĩthito nĩ kana wĩthĩwe na mwĩkalĩle mũseo.

  “Ethĩwa ũkeekaa motwi ma ũĩ na ũyonyʼa asyai maku kana ndwĩtũngĩlĩĩla ĩvĩtyo yĩla ũneekie, no mambĩĩe kũkũĩkĩĩa ĩngĩ.”—Karen.

KAŨNDŨ ŨTONYA KWĨKA: Ĩkĩa kĩthito kingangĩ wonanyʼe kana wĩ mũĩkĩĩku. Kwa ngelekanyʼo, ĩvinda yĩla yĩngĩ ũkwenda kũthi vandũ, no ũtavye asyai maku yĩla ũũsyoka o na ethĩwa ndwĩselewa. Ũu ũkatumaa mamanya kana ‘wĩenda makũĩkĩĩe ĩngĩ.’