Ĩtina wa Atamu na Eva kuma mũũndanĩ wa Eteni, nĩmasyaie syana mbingĩ. Mwana woo wa mbee, Kaini, atwʼĩkie mũĩmi, nake mwana woo wa kelĩ, Aveli, atwʼĩka mũĩthi.

Mũthenya ũmwe Kaini na Aveli nĩmaumĩisye Yeova nthembo. We nĩwĩsĩ nthembo nĩ kyaũ? Nĩ mũthĩnzĩo mũseo mũno ũnengawe Yeova. Nthembo ĩla Aveli waumisye nĩyamũtanĩthisye Yeova, ĩndĩ nthembo ya Kaini ndyaamũtanĩthya. Kĩu kyatumie Kaini athata mũno. Nũndũ wa ũu, Yeova nĩwamũkanisye Kaini aeke kũthata nũndũ kĩu kyaĩ kĩtonya kũtuma eka ũndũ mũthũku. Ĩndĩ Kaini ndaamwĩthukĩĩsya.

Vandũ va ũu, Kaini eeie Aveli atĩĩ: ‘Ũka tũthi mũũndanĩ.’ Na ĩndĩ me kũu me oka, Kaini amũaa. Yeova oosie ĩtambya yĩva? Nĩ kana Yeova akanyʼe Kaini, nĩwamũlũngilye athi vaasa vyũ na mũsyĩ woo. Kaini ndeetĩkĩlĩtwʼe kũsyoka ĩngĩ kwa andũ make.

Twĩĩmanyĩsya kyaũ? Nĩtũtonya kwambĩĩa kũthata ethĩwa maũndũ maikwĩkwa ũndũ tũkwona maĩle kwĩkwa. Tweewʼa kana nĩtwambĩĩa kũthata kana andũ angĩ matũkanyʼa nũndũ nĩmekwona tũthatĩte, nĩtwaĩle kwĩtĩkĩla na tũieka kũthata tũikese kwĩka ũndũ mũthũku.

Nũndũ Aveli nĩwamwendete Yeova na eekaa maũndũ maseo, Yeova ndakolwa nĩwe. Yĩla Ngai ũkaalyũla maũndũ vaa ĩũlũ wa nthĩ, akamũthayũũkya.

Ĩtina wa ĩvinda andũ nĩmesie kwingĩva ĩũlũ wa nthĩ. Aingĩ maĩ athũku. O na alaĩka amwe ĩtunĩ nĩmambĩĩie kũthũka. Nĩmatiie mũsyĩ woo wa ĩtunĩ na mooka kũũ nthĩ. We nĩwĩsĩ mookĩte kwĩka ata? Mookĩte mamesye mĩĩ yĩilye ta ya andũ na maitwaa aka.

Alaĩka asu vamwe na aka moo nĩmasyaie syana. Syana isu syeana syatwʼĩkie mamũndũ me vinya mũno mathĩnasya ala angĩ. Nĩmeekaa maũndũ ma kũũmĩsya mũno. Ĩndĩ Yeova ndaĩ esa kũeka maũndũ asu maendeee. Nũndũ wa ũu, avanga kũmamina na mbua ya kĩwʼũ kingĩ.

Ĩndĩ ve mũndũ ũmwe waĩ kĩvathũkanyʼo. Mũndũ ũsu nĩwamwendete Yeova. Eetawa Noa. Aĩ na kĩveti na masyaĩte aũme atatũ. Aume asu meetawa, Semu, Amu, na Yavethi, na onthe maĩ na iveti. Yeova eeie Noa ake ngalawa nene ĩmũsũvĩe vamwe na andũ make maikanangwe nĩ kĩwʼũ kya mbua ĩsu. Ngalawa yaĩ ĩsandũkũ ĩnene ya mbwaũ yaĩ yĩtonya kũlela kana kũthambalala kĩwʼũnĩ. Yeova asyokie eea Noa alikye nyamũ ngalawanĩ nĩ kana o nasyo iikoawe nĩ kĩwʼũ.

Noa nĩwambĩĩie kwaka ngalawa atekweteela. Atetheanĩasya kwaka ngalawa ĩsu na andũ make ma mũsyĩ na makuie myaka ta 50 maimyaka. Mamyakie nesa vyũ, o ũndũ Yeova waĩtye yakwe. Ĩvindanĩ o yĩu, Noa akwetye kũtavya andũ kana ve mbua mbingĩ yũkĩte. Ĩndĩ vaiĩ mũndũ waamwĩthukĩĩsya.

Mũthya nĩmesie kũlika ngalawanĩ. Na nĩtũkwona ũndũ kweethĩiwe ĩtina wa vau.