Ve taoni yaĩ vakuvĩ na mwako wa Mbaveli yeetawa Ulu. Andũ ala mekalaa taoninĩ ĩsu mathaithaa ngai ingĩ mbingĩ eka Yeova. Ĩndĩ ve mũndũũme ũmwe wekalaa vo wathaithaa Yeova e weka. Mũndũũme ũsu eetawa Avalaamu.

Yeova eeie Avalaamu atĩĩ: ‘Ũkĩla ũtie mũsyĩ waku na andũ maku na ũithi vala ngũkwonyʼa.’ Ĩtina wa kũmwĩa ũu amwathie atĩĩ: ‘Ũkatwʼĩka mbaĩ nene na ngaathima andũ aingĩ ĩũlũ wa nthĩ nũndũ waku.’

Avalaamu ndeesĩ atwaĩtwe va, ĩndĩ nĩweesĩ nesa vyũ kana Yeova ndesa kũmwasya. Kwoou nĩwoosie kĩveti kyake Sala, ĩthe wake Tela, na mũndũũme weetawa Loto, ũla waĩ mwana wa mũkũũe, na mambĩĩa savalĩ ndaasa.

Avalaamu na andũ make mavikie nthĩ ĩla Yeova wendaa mamyone e na myaka 75. Nthĩ ĩsu yeetawa Kanaani. Mavika kũu Ngai athie Avalaamu atĩĩ: ‘Nganenga syana syaku nthĩ ĩno yonthe yĩ mbee waku.’ Ĩndĩ ĩvindanĩ yĩu Avalaamu na Sala maĩ akũũ na mayaĩ na kana o na kamwe. Na tene we Yeova ko wavangĩte kwĩanĩsya watho ũsu ata?

Avalaamu na Sala nĩmekalĩte ĩvinda ĩasa matwaanĩte. Maĩ matiie mũsyĩ woo waĩ mũseo ndũanĩ ya Ulu, na mathi kwĩkalaa maeemanĩ. Ĩndĩ we Sala ndaaleana na mũvango ũsu nũndũ nĩweesĩ kana Yeova aĩ atonya kũmaathima meeka kwenda kwake.

Sala endaa mũno kwĩthĩwa na kana nginya mũthenya ũmwe eea Avalaamu atĩĩ: ‘Keka mũthũkũmi wakwa, Akali, nũtonya kũsyaa kana, nyie nĩkona o ta kana kakwa.’ Ĩvinda nĩyavikie Akali asyaa kana, na aketa Isumaeli.

Ĩvinda yĩmwe ĩtina wa myaka mingĩ, Avalaamu e na myaka 99, nake Sala e na myaka 89, nĩmakwatie aeni atatũ. Avalaamu nĩwamathokisye mathyũmũe ungu wa mũtĩ na mayĩĩsanĩa. We nĩwĩsĩ aeni asu maĩ aaũ? Maĩ alaĩka! Meeie Avalaamu atĩĩ: ‘Mwaka ũla ũkĩte ĩvindanĩ o ta yĩĩ, we na mũka waku mũkakwata kana ka kavĩsĩ.’ Sala aendeee kwĩthukĩĩsya ndeto isu e ĩeemanĩ. Ambĩĩie kwĩtheka ayasya atĩĩ: ‘Nyie nĩndonya kũsyaa kana nĩkũĩte ũu?’

Mwaka ũla waatĩĩe, Sala nĩwasyaie kana ka kavĩsĩ o tondũ Yeova wathanĩte kwĩsĩla alaĩka. Avalaamu eetie kana kau Isaka. Ũalyũlo wa ĩsyĩtwa yĩu nĩ “Ĩtheka.”

Isaka e na myaka ĩtano ũu, Sala nĩwoonie Isumaeli e na kĩmanyĩo kya kũmũvũĩa ngũĩ. Na nũndũ nĩwendaa kũsũvĩa mwana wake, eeie Avalaamu alũngye Akali na Isumaeli. Mwambĩĩonĩ Avalaamu ndendaa kwĩka ũu. Ĩndĩ Yeova amwĩa: ‘Ĩthukĩĩsye ũndũ Sala ũkwasya. Ninyie ngasũvĩa Isumaeli. Ĩndĩ maũndũ onthe ala namwathie makeanĩa kwĩsĩla Isaka.’