Loto ekalaa Kanaani e na Avalaamu ũla wasyaanĩwʼe na ĩthe wake. Ĩtina nĩmesie kwĩthĩwa na indo mbingĩ nginya weethĩa iyĩanĩa kĩsionĩ kĩmwe. Kwondũ wa ũu, Avalaamu eea Loto atĩĩ: ‘Yu tũyĩsa kũendeea kwĩkala vamwe. Ĩnyuvĩe ngalĩ ĩla ũkwenda kwĩkala nakwa nĩngũthi ngekale ngalĩ ĩla ĩngĩ.’ Avalaamu ndeeyendete, kana ti wʼo?

Loto asisya nĩwoonie kĩsio kyaĩ kĩseo mũno vakuvĩ na taoni yeetawa Sotomo. Kĩsio kĩu kyaĩ na kĩwʼũ kingĩ na nyeki nzeo ya kũĩthya. Kwondũ wa ũu, nĩwathamĩĩie vo e na andũ make na ĩtina mesa kũtũa taoninĩ ya Sotomo.

Andũ ma Sotomo na ma taoni ĩngĩ yaĩ vakuvĩ yeetawa Ngomola maĩ athũku mũno. O na mathũkie nginya Yeova avanga kwananga taoni isu syelĩ. Ĩndĩ nũndũ nĩwendaa kũsũvĩa Loto na mũsyĩ wake, nĩwatũmie alaĩka makatavye Loto kĩla ũvangĩte. Meeie Loto na andũ make atĩĩ: ‘Ũkĩlai na mĩtũkĩ, mwĩvetange taoninĩ ĩno! Yeova nũkũmyananga!’

Loto ndaaĩkalaata. Eeyũmbanasya o kavola. Nũndũ wa ũu, alaĩka nĩmamũkwatie kwʼoko e na kĩveti kyake na eĩtu make elĩ na mamaumaalya na mĩtũkĩ. Mameie atĩĩ: ‘Sembai mũikanangwe! Mũikatate kũsisya ĩtina. Mwasisya ĩtina nĩmũũkwʼa!’

Yĩla mavikie taoninĩ ĩngĩ yeetawa Nzoali Yeova nĩwauisye mwaki na mũvĩlĩtĩ ĩũlũ wa taoni sya Sotomo na Ngomola. Ndũa isu syaanangiwe vyũ. Na yĩla mũka wa Loto waleile kũmwĩwʼa Yeova na asisya ĩtina, nake atwʼĩkie kĩtuĩ kya mũnyũ. Ĩndĩ Loto vamwe na eĩtu make nĩmasũvĩiwe nũndũ nĩmamwĩwie Yeova. We wĩona ta meewie maũmĩa mũno wĩana ata yĩla mũka wa Loto waleile kũmwĩwʼa Yeova? Ĩndĩ nĩmamanyie kana meekie nesa kũatĩĩa kĩla Yeova wamatavĩtye.

Avalaamu nĩwamanyĩisye mwana wake Isaka kũmũĩkĩĩa Yeova na kwĩthĩwa ate na nzika kana maũndũ onthe ala Yeova wathanĩte makeanĩa. Ĩndĩ Isaka e na myaka ta 25, Yeova nĩweeie Avalaamu eke ũndũ waĩ vinya mũno kwake. Amwĩie eke ata?

Ngai eeie Avalaamu atĩĩ: ‘Osa mwana waku na ũithi ũkamumye ta nthembo kĩĩmanĩ kĩla kĩ kĩsionĩ kya Molia.’ Avalaamu ndeesĩ o na vanini nĩkĩ Yeova wamwĩie eke ũu. Ĩndĩ o na vailye ũu, nĩweekie ũndũ Yeova wendaa eke.

Kwakya tene mũthenya ũla waatĩĩe, Avalaamu e na Isaka vamwe na athũkũmi elĩ nĩmambĩĩie savalĩ ya kũthi Molia. Maendete vandũ va mĩthenya ĩtatũ nĩwʼo mambĩĩie kwona iĩma iyumĩla kwa vaasa. Na ĩndĩ Avalaamu eea athũkũmi make mekale vandũ mameteele nĩ kana e na Isaka mathi makaumye nthembo. Avalaamu anengie Isaka ngũ akue, nake akua ũvyũ. Isaka akũlilye ĩthe atĩĩ: ‘Yĩĩ va ĩlondu yĩla tũũthi kũthemba?’ Nake Avalaamu amwĩa atĩĩ: ‘Mwanawa, Yeova nĩwe ũkũtwonyʼa.’

Yĩla mavikie kĩĩmanĩ, nĩmaakie kĩthembeo. Na ĩndĩ Avalaamu amwova Isaka moko na maaũ na amwilĩĩla kĩthembeonĩ kĩu.

Ĩtina wa vau Avalaamu nĩwoosie ũvyũ. Na vau kwa vau, mũlaĩka wa Yeova aneena na Avalaamu kuma ĩtunĩ amwĩa: ‘Avalaamu! Ndũkatate kũũmĩsya mwana waku! Yu nĩnamanya nesa kana nũmũĩkĩĩe Ngai nũndũ nĩwĩĩĩyumĩtye kũthemba mwana waku.’ Nĩvo ĩndĩ Avalaamu wasyaisye ũtee oona ĩlondu yĩkwatĩtwʼe mbya nĩ kĩkuthu. Nũndũ wa ũu, amũthasya Isaka na mĩtũkĩ na oosa ĩlondu yĩu ayĩthemba neyo.

Kuma mũthenya ũsu na kũendeea, Yeova eetaa Avalaamu mũnyanyae. Nĩwĩsĩ nĩkĩ? Nũndũ Avalaamu eekaa kyonthe kĩla Yeova wamwĩa eke o na ethĩwa ndaeleawa nĩkĩ weewa eke ũu.

Yeova nĩwatũngĩlĩĩile maũndũ ala wathĩte Avalaamu. Aisye: ‘Ngakũathima, na ngaingĩvya ũsyao waku, kana syana syaku.’ Ndeto isu sya Yeova syoonanasya kana akaathima andũ onthe aseo kwĩsĩla mũsyĩ wa Avalaamu.