Isaka aĩ na myaka 40 aitwaa Leveka. Na nĩwendete mũka mũno. Ĩtina wa ĩvinda nĩmasyaie tũmwana twĩlĩ tũvatha.

Kamwana kala kasyaiwe mbee maketie Esau na kala kangĩ maketa Yakovo. Esau ndatindaa mũsyĩ mũno na nĩwendete kũsyĩma. Nake Yakovo endete kwĩkala mũsyĩ.

Ĩvindanĩ yĩu mwana ũla mũkũũ nĩwe watiĩawa kĩtheka kĩla kĩnene na mbesa ila mbingĩ nĩ ĩthe akwʼa. Malĩ ĩsu yonthe nĩyo yeetawa ũtiĩwa. Ũtiĩwa ũmwe nzyawa sya Isaka syaaĩle kwĩthĩwa nawʼo nĩ ala maũndũ Yeova wathĩte Avalaamu. Esau ndoonaa maũndũ asu me ma vata ĩndĩ Yakovo nĩweesĩ kana ũsu nĩ ũtiĩwa wa vata.

Mũthenya ũmwe Esau nĩwasyokie mũsyĩ anoete mũno nũndũ wa kũtinda asyĩmĩte. Avika eewie mũuke mũseo wa lĩu ũla Yakovo wauaa na amwĩa: ‘Mwa ndyĩwʼĩte nzaa! Kwambĩkĩe suvu ũsu ũuĩte!’ Nake Yakovo amwĩa: ‘Nĩngũkwĩkĩa suvu ĩndĩ amba kũmbatha kana ninyie ngakwata ũtiĩwa waku.’ Esau eewʼa ũu aisye: ‘Ũtiĩwa wĩndethya na kyaũ? Ndi na thĩna o na watwʼĩka waku. Kĩla ngwenda no lĩu.’ We wĩona Esau ta wasũanĩĩte nesa ayasya ũu? Aiee. Esau anenganie kĩndũ kya vata mũno na akĩkũanyʼa na mbakũli o ĩmwe ya suvu.

Isaka nĩwaendeeie kũkũa na ĩvinda ya kũathima mwana wake wa mbee yesa kũvika. O na kau Yakovo nĩwe waĩ mũnini Leveka nĩwamũtetheeisye akwata ũathimo. Esau amanya ũu nĩwathatie mũno na avanga kũaa Yakovo mwana-a-inyia. Isaka e na Leveka mayendaa Yakovo ayũawa, na kwoou mamwĩa: ‘Enda ũkekale kwa Lavani ũla ũsyaanĩwʼe na inyia waku na ũyeteela nginya Esau aeke kũthata.’ Yakovo nĩweetĩkĩlile ũndũ wataviwʼe nĩ asyai make na athi kwĩvitha ndakoawe.

Yeova amwĩie Yakovo kana akamũsũvĩa o tondũ wasũvĩĩte Avalaamu na Isaka. Yakovo ekalaa vandũ veetawa Aalani, na nĩ vo watwaanĩie, na amesya syana mbingĩ, na eethĩwa mũthwii mũno.

Ĩtina wa ĩvinda Yeova amwĩie Yakovo atĩĩ: ‘Syoka mũsyĩ kwenyu.’ Kwoou Yakovo na andũ make nĩmambĩĩie savalĩ ndaasa ya kũsyoka mũsyĩ. Me nzĩanĩ, athũkũmi ma Yakovo nĩmookie na mamwĩa atĩĩ: ‘Mũkũũu Esau nĩwũkĩte, na e na aũme angĩ 400.’ Yakovo nĩwakwatiwe nĩ wia nũndũ oonaa Esau okĩte kũmeka naĩ. Amũvoyie Yeova amwĩa atĩĩ: ‘Mwa nĩngũkwĩsũva ũtũsũvĩe nĩ kana mũkũũa ndakatwĩke naĩ.’ Mũthenya ũla waatĩĩe Yakovo nĩwanenganie mĩthĩnzĩo ĩtwaĩwe Esau. Anenganie malondu maingĩ, mbũi, ngʼombe, ngamĩle na mangʼoi.

Mũthenya ũsu wĩoo Yakovo e vandũ e weka nĩwoonie mũlaĩka. Mũlaĩka ũsu nĩwambĩĩie kũvalũkanyʼa nake. Nĩmavalũkanilye nginya kwakya. O na kau Yakovo nĩwaũmĩie ndaaeka kũvalũkanyʼa na mũlaĩka ũsu. Mũlaĩka ũsu eeie Yakovo atĩĩ: ‘Ekana nakwa nĩthi.’ Nake Yakovo amwĩa: ‘Ndikũlekya nginya ũmbathime.’

Ĩtina mũlaĩka ũsu nĩwamũathimie Yakovo. Nũndũ wa ũu Yakovo nĩwamanyie kana Yeova ndaketĩkĩlya Esau amũũmĩsye.

Mũthenya ũsu kwakya Yakovo nĩwoonie Esau e vaasa okĩte na ala aũme 400. Yakovo nĩwatiie andũ make na athi kũkomana na mũkũũe, na yĩla wamwonie amũkumanĩa mavinda mũonza. Nake Esau asemba vala ve Yakovo na amũkumbatĩa. Esau na Yakovo nĩmaĩie na meewʼana ĩngĩ. We wĩona Yeova ta weewie ata yĩla woonie ũndũ Yakovo wamina thĩna ũla waĩ nawʼo na Esau?

Ĩtina wa ũu Esau nĩwenũkie, na Yakovo aendeea na savalĩ. Yakovo aĩ na imwana 12. Imwana isu syeetawa Leuveni, Simeoni, Livai, Yuta, Ndani, Navitali, Ngati, Aseli, Isakali, Nzevuluni, Yosevu, na Mbenyamini. Ũmwe wa imwana isu ũla weetawa Yosevu, nĩwatũmĩiwe nĩ Yeova kwovosya andũ make. Nĩwĩsĩ eekie ũu ata? Nĩtũkwĩmanyĩsya ĩsomonĩ yĩla yĩatĩĩe.