Yosevu aĩ ũmwe wa syana ila nini sya Yakovo. Akũũe nĩmoonie kana Yosevu nĩwe wendetwe mũno nĩ ĩthe woo. We wĩona ta meewie ata ĩũlũ wa ũndũ ũsu? Nĩmamwĩwʼĩaa Yosevu kĩwĩu na nĩmamũmenete. Yĩla Yosevu waotie ndoto sya kũsengyʼa, nĩwatavisye anake ala wasyaanĩwʼe namo. Masũanĩaa kana ndoto isu syoonanasya kana ve ĩvinda makamũkumanĩa Yosevu kana kũmũnenga ndaĩa. Ũndũ ũsu nĩwatumie mamũmena mũnango.

Mũthenya ũmwe anake ala masyaanĩwʼe na Yosevu mayĩĩthya vakuvĩ na ndũa ya Sekemu, Yakovo nĩwatũmie Yosevu akasisye ũndũ maendeee. Nĩmamwonie e vaasa na meeana atĩĩ: ‘Ũla mũndũ ũotaa tyũũya okĩte. Tũmũae!’ Kwoou mamũkwatanĩla na mamwĩkya ĩimanĩ ĩliku. Ĩndĩ mwanake ũmwe masyaanĩwʼe weetawa Yuta asya: ‘Tũikamũae. Vandũ va ũu, tũmũte ta ngombo.’ Kwoou mamũta kũla kwĩ andũ ma viasala ma Mitiani ala maendete Misili. Mamũtee ilungu 20 sya vetha.

Ĩtina wa ũu, anake asu moosie ĩkoti yake na mayinda nthakamenĩ ya mbũi na mayĩtwaĩa ĩthe na mamwĩa atĩĩ: ‘Ĩkoti yĩĩ nĩ yĩla ya mwana waku, kana ti yo?’ Kwoou Yakovo ambĩĩa kwĩsilya Yosevu oaiwe nĩ nyamũ ya kĩthekanĩ. Ũndũ ũsu watumie ethĩwa na thĩna mwingĩ mũno ngoonĩ. Aĩ na kyeva kingĩ ũkethĩa vaiĩ mũndũ waĩ atonya kũmũkiakisya.

Avikwʼa Misili, Yosevu atewe kwa mũnene ũmwe wa silikalĩ weetawa Votivali. Ĩndĩ Yeova aĩ vamwe nake. E kũu, Votivali nĩwoonie Yosevu e mũthũkũmi mũseo na e wa kũĩkĩĩka. Ĩtina wa kavinda, Yosevu nĩwanengiwe wĩa wa kũũngamĩa syĩndũ syonthe ila Votivali waĩ nasyo.

Mũka wa Votivali nĩwoonete kana Yosevu aĩ mwanake na aĩ na wũmbo mũseo. Nũndũ wa ũu, mũthenya kũthi ũla ũngĩ kĩveti kĩu kyatindĩaa kwĩa Yosevu makome ĩmwe. We Yosevu eekie ata? Nĩwaleile na amwĩa atĩĩ: ‘Ndyĩsa kwĩka ũu! Ti ũseo. Mũnene wakwa nũmbĩkĩĩe, na we wĩ kĩveti kyake. Nakoma naku nĩĩthĩwa ndimũvĩtĩsya Ngai.’

Mũthenya ũmwe mũka wa Votivali nĩwatatie kũkoma na Yosevu kya vinya. Kĩveti kĩu kyautie ngũa syake ĩndĩ Yosevu asemba. Yĩla Votivali wookie kyaisye kana Yosevu endaa kũkoma nakyo. Ũsu waĩ ũvũngũ mũthei. Ũndũ ũsu watumie Votivali athata mũno na kwoou ekya Yosevu yela. Ĩndĩ o na vailye ũu, Yeova ndaaũlwa nĩ Yosevu.

Ĩvinda yĩla Yosevu waĩ yela, Valao, mũsumbĩ wa Misili, nĩwaotie ndoto na vayaĩ mũndũ ũtonya kũielesya. Mũthũkũmi ũmwe wa Valao nĩwamũtavisye kana Yosevu no amũelesye ũndũ ndoto isu syoonanasya. Vau kwa vau Valao nĩwatũmanie Yosevu.

Yĩla Yosevu wavikie, Valao amũkũlilye atĩĩ: ‘We no ũngelesye ndoto ila nĩotie syĩonanyʼa kyaũ?’ Yosevu amwĩie Valao atĩĩ: ‘Misili kũkeethĩwa na lĩu mwingĩ vandũ va myaka mũonza, na myaka ĩngĩ mũonza ĩla ĩkaatĩĩa kũkeethĩwa na yũa. Kwoou nyuva mũndũ mũĩ aie lĩu nĩ kana andũ maikoawe nĩ nzaa.’ Nake Valao amwĩa atĩĩ: ‘Nue nanyuva! Nue ũkwĩthĩwa mũndũ wa kelĩ ũla mũnene ũsumbĩnĩ wa Misili!’ Yosevu amanyie ata kĩla ndoto sya Valao syoonanasya? Yeova nĩwe wamũtetheeisye.

Myaka mũonza ĩla yaatĩĩe, Yosevu nĩwaiie lĩu. Na ĩndĩ, o tondũ Yosevu waĩtye nĩkweethĩiwe na yũa ĩũlũ wa nthĩ yonthe. Andũ nĩmookie kuma kũndũ kwĩ kĩvathũkanyʼo kũthooa lĩu kũla kwĩ Yosevu. O na ĩthe wake, Yakovo, nĩweewie kana Misili kwaĩ lĩu, na kwoou atũma ana make ĩkũmi makaũe lĩu kũu.

Ana ma Yakovo nĩmaendie vala ve Yosevu, na vau kwa vau amamanya. Ĩndĩ mo mayaamanya kana ũsu nĩ Yosevu. Aũme asu nĩmamũkumanĩie o tondũ waotete yĩla waĩ mũnini. Yosevu endaa kũmanya kana anake asu wasyaanĩwʼe namo no mamũmenete. Kwoou amea atĩĩ: ‘Inywʼĩ mũtũmĩtwe mũmanye maũndũ maitũ. Mwĩenda kũmanya mathĩna ma nthĩ yitũ.’ Namo mamwĩa: ‘Ti wʼo! Ithyĩ tumĩte Kanaani na tũsyaĩtwe twĩ ana 12. Ũmwe wa ana ala tũsyaanĩwʼe nĩwakwie na ũla mũnini tũmũtiie na ĩthe witũ.’ Ĩtina wa ũu Yosevu ameie atĩĩ: ‘Endai mũkoke na mwanake ũsu mũnini na nĩngũmũĩkĩĩa.’ Kwoou nĩmenũkie kũla kwĩ ĩthe woo.

Yĩla mũsyĩ wa Yakovo watheleilwe nĩ lĩu, nĩwatũmie ana make masyoke Misili. Ĩvinda yĩu maendie na mwanake ũla waĩ mũnini weetawa Mbenyamini. Yosevu nĩwendaa kũtata aũme asu wasyaanĩwʼe namo, na kwoou eekĩa kĩkombe kya vetha ĩkunianĩ yĩla Mbenyamini wakuĩte lĩu nayo na amea kana nĩmoyĩte kĩkombe kyake. Yĩla athũkũmi ma Yosevu meethĩie kĩkombe kĩu ĩkunianĩ ya Mbenyamini, aũme ala masyaanĩwʼe na Yosevu nĩmatelemile mũno. Na nũndũ wa ũu meea Yosevu amakwate vandũ va kũkwata Mbenyamini.

Yosevu nĩwamanyie kana aũme asu wasyaanĩwʼe namo nĩmaalyũkĩte. Na nũndũ wa ũu eewʼa atatonya kũmĩĩsya kũvĩtũka vau. Kwoou ambĩĩa kũĩa na asya: ‘Ninyie Yosevu ũla wasyaanĩwʼe nenyu. Ĩthe witũ e o thayũ?’ Aũme asu masyaanĩwʼe nake nĩmasengʼie mũno. Kwoou Yosevu amea: ‘Mũikathĩnĩke nũndũ wa kĩla mwambĩkie. Ngai andũmie kũũ nĩ kana nĩtangĩĩe mathayũ menyu. Yu ĩkalaatei mũthi mũlatye Tata mũmũete vaa.’

Nĩmenũkie makatavye ĩthe woo ngewa ĩsu na maimũete Misili. Kwoou ĩtina wa Yosevu kũtaanĩsya na ĩthe kwa myaka mingĩ, nĩmakomanie ĩngĩ.