Kwaĩ mũndũ ũmwe wamũthaithaa Yeova wekalaa nthĩ ya Usi. Ĩsyĩtwa yake eetawa Yovu. Aĩ na malĩ mbingĩ na mũsyĩ mũnene. Yovu nĩweekaa andũ angĩ nesa, akatethya ngya, iveti ila syakwʼĩĩwe nĩ aa mũũme, na syana ila ite asyai. O na kũtwʼĩka Yovu nĩweekaa maũndũ asu maseo, ũu nĩ kwasya kana ndaĩ atonya kũkwatwa nĩ mathĩna?

Yovu ndeesĩ Satani, ũla Ndevili, nĩwamũsyaĩĩsye. Ĩvinda yĩmwe Yeova nĩwaneenie na Satani. Amwĩie atĩĩ: ‘Nĩwonie mũthũkũmi wakwa Yovu? Vaiĩ mũndũ ũilye take ĩũlũ wa nthĩ. Nũmbĩthukĩĩasya na akeka kĩla kyaĩlĩte.’ Nake Satani asũngĩa: ‘Nĩ wʼo nũkwĩthukĩĩasya. Akwĩthukĩĩasya nũndũ nũmũsũvĩĩte na ũkamũathima. O na nũmũnengete mĩũnda na indo. Mũvene syĩndũ isu na akaeka kũũthaitha.’ Nake Yeova amwĩa: ‘No ũmũtate Yovu. Ĩndĩ ndũkamũae.’ Nĩkĩ Yeova waekie Satani amũtate Yovu? Nĩweesĩ kana Yovu ndaĩ atonya kũmũtia.

Satani nĩwambĩĩie kũmũtata Yovu atũmĩĩte mathĩna me kĩvathũkanyʼo. Mbee ambie kũtũma andũ meetawa Aseva makoye ngʼombe na mangʼoi ma Yovu. Malondu make namo nĩmavĩe nĩ mwaki. Ĩtina wa vau nguthu ya andũ meetawa Akalitei nĩyookie yamũyĩa ngamĩle syake. Athũkũmi ala maĩthasya indo isu nĩmooaiwe. Na ĩndĩ Yovu nĩwakwatiwe nĩ ũndũ ũngĩ mũthũku vyũ kwĩ maũndũ asu angĩ mamũkwatĩte. Syana syake nĩsyatumbũkĩiwe nĩ nyũmba syakwʼa iendeee kwĩtanĩthya. Yovu nĩwakwie ngoo mũno ĩndĩ ndaaeka kũmũthaitha Yeova.

Satani endaa Yovu aendeee kũthĩna kwoou atuma akwatwa nĩ itau mwĩĩ wʼonthe. Yovu nĩwaalawʼa mũno. Na eka ũu, ndamanyaa nĩkĩ maũndũ asu mathũku mamũkwataa. Ĩndĩ o na vailye ũu, Yovu nĩwaendeeie kũmũthaitha Yeova. Ngai nĩwoonie maũndũ asu onthe na endeewʼa nĩ Yovu.

Ĩtina wa vau Satani nĩwatũmie aũme atatũ moke kũmũtata Yovu. Mamwĩie: ‘No nginya wĩthĩwe wĩkĩte naĩ na ũkavitha. Ngai aendeee kũũkanyʼa.’ Nake Yovu amea: ‘Ndi ũndũ o na ũmwe mũthũku nĩkĩte.’ Ĩndĩ nĩwambĩĩie kũsũanĩa kana Yeova nĩwe ũmũeteete mathĩna asu na asya kana Ngai ndamũsilĩlaa nesa.

Mwanake ũmwe weetawa Eliu nĩweethukĩĩsye ũneenanyʼa ũsu avindĩtye. Nake amea: ‘Inywʼonthe mwaneena maũndũ mataĩle. Yeova nĩ mũnene kwĩ ũndũ tũtonya kũelewa. We ndesa kwĩka ũndũ ũtaĩle. Nĩwonaa kĩla kĩndũ na nũtetheeasya andũ yĩla me thĩnanĩ.’

Na ĩndĩ Yeova aneena na Yovu. Amwĩie: ‘Waĩ va yĩla naseũvisye nthĩ na ĩtu? Nĩkĩ ũkwasya kana ndinaũsilĩla nesa? Nũũneena, ĩndĩ o na ndwĩsĩ nĩkĩ maũndũ amwe mekĩkaa.’ Yovu nĩweetĩkĩlile mavĩtyo make na asya: ‘Nĩnĩĩvĩtĩtye. Nĩneekaa kwĩwʼa ũiwetwa, ĩndĩ yu nĩnaũmanya nesa. Kwaku maũndũ onthe nĩmatonyeka. Nĩngwĩlila nũndũ wa kĩla nĩneenete.’

Motato mathela, Yeova nĩwamũvoisye Yovu na amũathima na syĩndũ mbingĩ kwĩ ila waĩ nasyo mbeenĩ. Yovu nĩwekalile myaka mingĩ na e mũtanu. Yeova nĩwamũathimie Yovu nũndũ nĩwamwĩwie o na yĩla maũndũ mataĩ laisi. We nũkũendeea kũmũthaitha Yeova ta Yovu o na maũndũ meethĩwa mailye ata?

Andũ ma nyũmba ya Yakovo me Misili nĩmambĩĩie kwĩtwa Aisilaeli. Ĩtina wa Yakovo na Yosevu kũkwʼa, Valao ũngĩ nĩwambĩĩie kũsumbĩka. Valao ũsu nĩwambĩĩie kũkwatwa nĩ wia nũndũ oonaa Aisilaeli nĩmekwĩthĩwa me na vinya kwĩ Amisili. Kwoou atwʼĩkĩthya Aisilaeli ngombo. Amalasimĩthasya kũmba matuvalĩ na kũthũkũma wĩa mũmũ mĩũndanĩ. Ĩndĩ o na Amisili mamalasimĩthya mathũkũme wĩa mũmũ ata, Aisilaeli no maendeeie kwongeleka. Na nũndũ Valao ndendaa mayongeleka, nĩwaisye twana twʼonthe twa tũvĩsĩ tũla twasyawa nĩ Aisilaeli tũawe. We wĩona Aisilaeli ta matelemile ata meewʼa ũu?

Ĩvindanĩ yĩu mũndũ mũka ũmwe Mũisilaeli weetawa Yokeveti nĩwasyaie kavĩsĩ kanake mũno. Nĩ kana kavĩsĩ kau kaikoawe, Yokeveti nĩwakekĩie kĩkavũnĩ na akavitha Ũsĩnĩ wa Naeli. Mwĩĩtu-a-inyia wa kana kau ũla weetawa Miliamu nĩwekalile vau vakuvĩ nĩ kana asisye nĩ kyaũ kĩkwĩkĩka.

Mwĩĩtu wa Valao nĩwookie kũthamba vau ũsĩnĩ na oona kĩla kĩkavũ. Yĩla wakunũie kĩkavũ kĩu, eethĩie kana kakwetye kũĩa na akewʼĩa tei. Miliamu akũlilye mwĩĩtu wa Valao atĩĩ: ‘No nĩũmanthĩe kĩveti kĩtonya kũkũeea kana kaa?’ Yĩla mwĩĩtu wa Valao weetĩkĩlile, Miliamu aendie aete Yokeveti, inyia wako. Na ĩndĩ mwĩĩtu wa Valao eea Yokeveti atĩĩ: ‘Osa kana kaa ũkaee na ngakũĩvaa.’

Yĩla kana kau kanenevangie, Yokeveti nĩwakatwaie vala ve mwĩĩtu wa Valao na akosa aketa Mose. Ĩtina wa ũu nĩwaendeeie kũea Mose ta mwana wake mwene. Mose nĩweanie e mwana wa mũsumbĩ, na kwoou aĩ atonya kũkwata kyonthe kĩla ũkwenda. Ĩndĩ ndaaũlwa nĩ Yeova. Nĩweesĩ kana we nĩ Mũisilaeli ti Mũmisili. Na kwoou anyuva kũmũthũkũma Yeova.

Mose e na myaka 40 nĩwatwie kũtetheesya andũ make. Mũthenya ũmwe nĩwoonie Mũmisili aivũa Mũisilaeli, na kwoou akũna Mũmisili ũsu mũno nginya amũaa. Mose nĩwaumbĩkie mwĩĩ wa Mũmisili ũsu kĩthangathĩnĩ nĩ kana aũvithe. Yĩla Valao wamanyie ngewa ĩsu, nĩwavangie kũmũaa Mose. Kwoou Mose nĩwasembie athi kwĩvitha nthĩ ya Mitiani. Yeova nĩwaendeeie kũmũsũvĩa e kũu.