Mose ekalile Mitiani kwa myaka 40. E kũu nĩwatwaanie na amesya syana. Mũthenya ũmwe e Kĩĩmanĩ kya Sinai ayĩĩthya malondu, nĩwoonie kĩndũ kyamũsaanĩsya. Oonie kakuthu kakanĩte mwaki o na kau kayavĩsaa! Yĩla Mose wathengeeie amanye kĩla kĩendeee, eewie wasya wauma vau kakuthunĩ na weetana: ‘Mose! Ndũkathengeee mũno. Umya iatũ nũndũ ũũngamĩte vandũ vatheu.’ Yeova nĩwe waneenaa nake atũmĩĩte mũlaĩka.

Mose nĩwakwatiwe nĩ wia na nũndũ wa ũu eevwʼĩka ũthyũ. Na ĩndĩ eewa atĩĩ: ‘Nĩnonete ũndũ Aisilaeli meũthĩna. Nĩenda kũmaumya Misili nĩmatwae nthĩ ĩngĩ nzeo nũndũ asu nĩ andũ makwa. Na nue ngũtũma ũkamatongoesye maumĩte Misili.’ We wĩona Mose ta weewie ata eewa ũu?

Mose akũlilye: ‘Yĩla andũ meũngũlya nĩtũmĩtwe nũũ nĩmea nĩtũmĩtwe nũũ?’ Nake Ngai amwĩa atĩĩ: ‘Maũkũlya wĩmea ũtũmĩtwe nĩ Yeova, Ngai wa Avalaamu, na Ngai wa Isaka, na Ngai wa Yakovo.’ Nake Mose amũkũlya atĩĩ: ‘Nao nata makalea ũmbĩthukĩĩsya?’ Yeova nĩwatũmĩie ngelekanyʼo kũĩkĩĩthya Mose kana akamũtetheesya. Amwĩie alekye ndata yake nthĩ. Yĩla Mose weekie ũu, ndata ĩsu yatwʼĩka nzoka. Na yĩla wakwatie nzoka ĩsu mwĩthe, yatwʼĩka ndata ĩngĩ. Na ĩndĩ Yeova amwĩa: ‘Weeka kyama kĩu, makaĩkĩĩa kana ninyie ngũtũmĩte.’

Ĩndĩ Mose asya atĩĩ: ‘Nyie ndyĩsĩ kũneena nesa.’ Nake Yeova amwĩa: ‘Ngaũtavya ũndũ ũkwasya na nĩngũtũma Aluni ũla mũsyaanĩwʼe mũthi ĩmwe nĩ kana akaũtetheesye.’ Mose nĩwamanyie kana Yeova e vamwe nake na nũndũ wa ũu oosa kĩveti kyake vamwe na syana syake na masyoka Misili.

Aisilaeli nĩmalasimĩthawʼa kũthũkũma ta ngombo. Yeova nĩwatũmie Mose na Aluni mathi kũla kwĩ Valao makamwĩe atĩĩ: ‘Lekya andũ makwa mathi weũnĩ makanthaithe.’ Valao amasũngĩie ũũ e na ngathĩĩo: ‘Ndikwĩka ũndũ Yeova ũkwenda nĩke, na ndimalekya Aisilaeli mathi.’ Amina kwasya ũu, nĩwamalasimĩthisye mathũkũme wĩa mũmũ mũnango. Yeova avangĩte kũmũmanyĩsya Valao ĩsomo. Esaa kwĩka ũu ata? Aeteie Amisili Mothĩnyʼo Ĩkũmi. Yeova eeie Mose: ‘Valao ndanambĩwʼa. Ũnĩ kwakya akeethĩwa Ũsĩnĩ wa Naeli. Enda ũkamũtavye kana kĩwʼũ kyonthe kya Ũsĩ wa Naeli nĩkĩũtwʼĩka nthakame nũndũ ndanaeka andũ makwa mathi.’ Mose nĩweekie ũndũ Yeova wamwĩie na athi kũla kwĩ Valao. Aluni nĩwakũnie kĩwʼũ kya Ũsĩ wa Naeli na ndata yake Valao amũsyaĩĩsye na kĩwʼũ kya ũsĩ ũsu kyatwʼĩka nthakame. Ũsĩ wa Naeli nĩwambĩĩie kũnyunga, makũyũ makwʼa, na vayaĩ kĩwʼũ kĩtheu kya kũnywʼa ũsĩnĩ ũsu. O na vailye ũu, Valao ndaaĩtĩkĩlya Aisilaeli mathi.

Ĩtina wa mĩthenya mũonza, Yeova nĩwamũtũmie Mose kũla kwĩ Valao ĩngĩ akamwĩe: ‘Ethĩwa ndwĩlekya andũ makwa mathi, kũũ Misili kwĩusũa syoa kĩla vandũ.’ Aluni nĩwookĩlilye ndata yake na syoa syambĩĩa kusũa nthĩ ĩsu. Amisili meethĩie syoa syusĩe kĩla vandũ nyũmba kwoo, itandanĩ, na mĩionĩ ya kũya. Kĩla vandũ wasisya woonaa o syoa. Valao nĩwamwĩsũvie Mose aneene na Yeova nĩ kana ũthĩnyʼo ũsu ũvetangwe. O na nĩwaisye kana nũkũlekya Aisilaeli mathi. Kwoou Yeova aũngamya ũthĩnyʼo ũsu na Amisili moombanyʼa syoa ila syakwie ivumbu mbingĩ. Nĩkwambĩĩie kũnyunga wou. O na ũu wĩ o vo, Valao ndaalekya andũ ma Yeova mathi.

Na ĩndĩ Yeova amwĩa Mose: ‘Tavya Aluni akũne nthĩ na ndata yake, na kĩtoo kya nthĩ nĩkĩũtwʼĩka ndaa, kana tũsamũ tũnini tũũmanaa.’ Amina kwĩka ũu, tũsamũ tũu twausũie kĩla vandũ. Andũ ma Valao nĩmamũtavisye kana ũthĩnyʼo ũsu waumĩte kũla kwĩ Ngai. Ĩndĩ o na vailye ũu, Valao ndaaĩtĩkĩlya Aisilaeli mathi.