Mose na Aluni nĩmasyokie ĩngĩ vala ve Valao na mamũnenga ũtũmane wa Ngai. Ngai amwĩie: ‘Waema kũeka andũ makwa mathi, nĩngũetee nthĩ yenyu ngi mbingĩ.’ Ĩtina wa vau, ngi mbingĩ nĩsyalikile nyũmbanĩ sya Amisili ala athwii na ala ngya. Nthĩ ĩsu yonthe yausũĩte ngi. Ĩndĩ kĩsio kya Ngoseni kũla Aisilaeli mekalaa kũyaavika ngi isu. Ũthĩnyʼo ũũ na mothĩnyʼo ala angĩ maatĩĩe makwatie Amisili me oka. Valao eesũvie Mose na Aluni amea: ‘Mwĩsũvei Yeova avetange ngi ii. Nĩngũmũeka mũthi.’ Ĩndĩ yĩla Yeova wavetangie ngi isu, Valao nĩwasũanĩie ũndũ ũngĩ. Vo ve ũndũ waĩ ũtonya kũtuma Valao ololosya ngoo?

Yeova asyokie asya atĩĩ: ‘Valao aema kũeka andũ makwa mathi, indo sya Amisili syĩwaa na iikwʼa.’ Na mũthenya ũla waatĩĩe indo syambĩĩa kũkwʼa. Ĩndĩ indo sya Aisilaeli iyaakwʼa. O na vailye ũu, Valao nĩwaendeeie kũmya ngoo.

Ĩtina wa ũu, Yeova nĩweeie Mose asyoke vala ve Valao na ayĩkya mũu kĩsevenĩ. Mũu ũsu nĩwatwʼĩkie kĩtoo kingĩ na kyetĩkĩa Amisili onthe. Kĩtoo kĩu kyametĩkĩa nĩmakwatiwe nĩ itau kĩla vandũ vamwe na indo syoo. Ĩndĩ o na vailye ũu, Valao ndaalekya Aisilaeli mathi.

Yeova nĩwatũmie Mose ĩngĩ vala ve Valao akamwĩe atĩĩ: ‘O nayu ndũnesa kwĩwʼa ũlekya andũ makwa mathi? Ũnĩ ngamuĩsya mbua ya mavia.’ Ũnĩ wake Yeova nĩwamauĩĩsye mbua ya mavia na mwaki yĩ na kĩtundumo kingĩ. Andũ ma Misili mayaĩ maaona mbua ĩngĩ ta ĩsu. Mbua ĩsu nĩyaanangie mĩtĩ na syĩndũ ila syaĩ mĩũndanĩ ya Amisili, ĩndĩ vaiĩ kĩndũ kyaakiitwa kĩsionĩ kya Ngoseni. Valao oona ũu, eeie Mose atĩĩ: ‘Mwĩsũve Yeova aũngamĩlye vau. Weeka ũu no mũthi.’ Ĩndĩ mbua ĩsu yakililye yathela Valao aalyũka.

Nĩvo Mose wamwĩie: ‘Ngie, kana itoli, nikũka iye mĩtĩ yonthe na syĩndũ ila itialilwʼe mũũndanĩ nĩ ĩla mbua ya mavia.’ Ngie isu syookie syĩ mbingĩ na syaya vyũ syĩndũ ila syatialĩte mũũndanĩ na mĩtĩ ĩla yatialĩte. Valao eesũvie Mose ĩngĩ amwĩa atĩĩ: ‘Mwĩsũve Yeova avetange ngie ii.’ Ĩndĩ o na Yeova aveta ngie isu Valao ndaaololosya ngoo.

Yeova eeie Mose atĩĩ: ‘Ũkĩlya kwʼoko kwaku woloote matunĩ.’ Eeka ũu, nĩkweethĩiwe na kĩvindu kingĩ. Amisili mekalile mĩthenya ĩtatũ matesa kwona kĩndũ kana mũndũ. Kũla Aisilaeli mekalaa nokwʼo kwaĩ na kyeni kwĩ kwʼoka.

Valao oona ũu eeie Mose atĩĩ: ‘Yu no wose andũ maku mũthi. Ĩndĩ mũikathi na indo syenyu.’ Nake Mose amwĩa atĩĩ: ‘No nginya tũthi na indo sitũ nĩ kana tũkamumĩsye Ngai witũ nthembo.’ Valao athatie mũno. Amea na wasya mũnene: ‘Umai vaa nĩĩ! Yĩla ngũmwonela vaa ĩngĩ, nĩĩka kũmũaa.’

Mose eeie Valao ndesyoka mbee wake ĩngĩ. Ĩndĩ atanamba kuma vau, amwĩa atĩĩ: ‘Ũmũnthĩ ũtukũ katĩ anake onthe ala akũũ nthĩ ya Misili nĩmeũkwʼa; kuma mwanake wa mbee wa Valao nginya ũla wa mbee wa ngombo.’

Yeova eeie Aisilaeli maseũvye lĩu wa mwanya. Ameie: ‘Ũaai ndũũme kana nthenge ya mwaka ũmwe na mũivaka nthakame ĩmwe yayo mĩomonĩ ya nyũmba syenyu. Vĩvyai i nyama na mũyĩĩsanĩsya na mũkate ũte ĩlawa. Mũyĩka maũndũ asu, ĩthĩwai mwĩkĩĩte iatũ syenyu mwĩyũmbanĩtye kũthi. Ũmũnthĩ ũtukũ nĩngũmumya ũkombonĩ.’ We wĩona Aisilaeli ta meewie mũyo wĩana ata meewa ũu?

Ũtukũ mũlaĩka wa Yeova nĩwesĩile nyũmbanĩ syonthe nthĩ ya Misili. Nthĩnĩ wa nyũmba ila itavakĩtwe nthakame mĩomonĩ yasyo nĩvakwie mwana ũla mũkũũ. Ĩndĩ mũlaĩka nĩwakĩlile nyũmba ila syaĩ na mĩomo ĩvakĩtwe nthakame. Mĩsyĩ yonthe ya Amisili, ya athwii vamwe na ngya, nĩyakwʼĩĩwe nĩ mwana. Ĩndĩ vaiĩ mwana o na ũmwe wa Aisilaeli waakwʼa.

O na mwana wa Valao nĩwakwie. Valao eewie atomĩĩsya. Ookĩlile mĩtũkĩ eea Mose na Aluni atĩĩ: ‘Ũkĩlai mũthi. Umai vaa vyũ. Endai mũkathaithe Ngai wenyu. O na ingai indo syenyu mũthi nasyo.’

Aisilaeli maumie Misili mavangĩtwe kwosana na mĩsyĩ na mbaĩ syoo. Maendie mamulĩkĩlwe nzĩanĩ nĩ mwei na maĩ aũme 600,000, na aka aingĩ o vamwe na syana. O na ve andũ angĩ maendanisye namo nĩ kana makamũthaithe Yeova. Ũu nĩwʼo Aisilaeli mathaiwʼe kuma ũkombonĩ.

Nĩ kana Aisilaeli malilikanae ũndũ Yeova wamatangĩĩie, nĩmeeiwe kĩla mwaka maseũvasye lĩu ũla maĩe wa mwanya. Mũthenya ũla meekaa ũu weetiwe mũthenya wa Vasaka.