Ĩtina wa Aisilaeli kũmwĩa Yeova kana makeeka kyonthe kĩla waisye, Yeova eeie Mose atĩĩ: ‘Ambata kũũ ĩũlũ kĩĩmanĩ. Nĩngũandĩka mĩao yakwa mavianĩ na ndiũnenga.’ Na ĩndĩ Mose ambata ĩũlũ kĩĩmanĩ na avekala mĩthenya 40, ũtukũ na mũthenya. Mose e kĩĩmanĩ, Yeova nĩwaandĩkie ĩla Mĩao Ĩkũmi mavianĩ elĩ na amũnenga.

Mose e kũu kĩĩmanĩ Aisilaeli mambĩĩie kũsũanĩa ta wamatiie. Nĩmaendie kũla kwĩ Aluni na mamũtavya atĩĩ: ‘Twĩenda mũndũ atũtongoesye. Tũseũvĩsye ngai!’ Nake Aluni amea: ‘Etei thaavu ũla mwĩ nawʼo.’ Na ĩndĩ Aluni oosa ũla thaavu, aũtheũkya, na aseũvya mũvwʼanano wa kasaũ. Yĩla andũ moonie ũu maisye atĩĩ: ‘Kasaũ kaa nĩko Ngai witũ ũla watumisye nthĩ ya Misili!’ Nĩmambĩĩie kũthaitha kala kasaũ ka thaavu, na matanĩa mũno mũthenya ũsu. Wʼo waĩ ũndũ mũthũku kũthaitha kasaũ kau? Ĩĩ, nũndũ andũ asu mamwathĩte Yeova kana makamũthaithaa e weka. Ĩndĩ yu maendeee kwĩka ũndũ wĩ kĩvathũkanyʼo.

Ĩvindanĩ yĩu, Yeova no weene kĩla kyaendeee, na kwoou eea Mose atĩĩ: ‘Theea kũla kwĩ andũ. Nũndũ maendeee kwĩka ũndũ wĩ kĩvathũkanyʼo na mĩao yakwa kwa kũthaitha ngai ya ũvũngũ.’ Mose nĩwatheeie kuma kĩĩmanĩ, akuĩte ala mavia elĩ Yeova wamũnengete.

Yĩla Mose wathengeeie kambi ya Aisilaeli, nĩweewie andũ mainĩte. Na ĩndĩ oona maendeee kũsũnga na kũtulĩlya ndu kala kasaũ. Ũndũ ũsu nĩwathatisye Mose mũno. Ũu nĩwatumie ekya nthĩ mavia ala wanengetwe na maatũkanga tũlungu. Na ĩndĩ vate kwananga ĩvinda, nĩwoosie ũla mũvwʼanano wa kasaũ na awananga vyũ. Amina kwĩka ũu amũkũlya Aluni atĩĩ: ‘Nĩ kyaũ andũ aa mekie kyatuma wĩka ũndũ ũũ ũthũkĩte ũu?’ Aluni amũsũngĩa amwĩa: ‘Eka ũthata. Nĩwĩsĩ ũndũ andũ aa mailye. Meendaa ngai, kwoou nekya ũla thaavu manengie mwakinĩ na ĩndĩ kasaũ kaa kaumĩla!’ Aluni ndaaĩlĩte kwĩka ũu. Mose nĩwasyokie ambata ĩũlũ kĩĩmanĩ akamwĩsũve Yeova aekee andũ asu.

Yeova nĩwaekeie ala meeyũmbanĩtye kũmwĩwʼa. We nũkwona ũndũ waĩ ũndũ wa vata kwa Aisilaeli kwĩtĩkĩla kũtongoewʼa nĩ Mose?

Yĩla Mose waĩ Kĩĩmanĩ kya Sinai, Yeova amwĩie aseũvye ĩeema ya mwanya, na vau nĩ vo Aisilaeli mamũthaithĩaa. Nĩmakuaa ĩeema yĩu yĩla mauma vandũ vamwe maendete vangĩ.

Nĩ kana maseũvye ĩeema yĩu, Yeova aisye atĩĩ: ‘Tavya andũ maumye kyonthe kĩla matonya nĩ kana maũtetheesye ũseũvye ĩeema.’ Aisilaeli nĩmaumisye syĩndũ ta thaavu, vetha, ũthuku, mavia ma thooa mũnene, masoa, na mbangili. O na nĩmaumisye wʼĩa wa malondu, ngũa sya katane, ithuma sya nyamũ, na syĩndũ ingĩ mbingĩ. Maĩ alau mũno nginya Mose amea: ‘Nĩtweanyʼa syĩndũ, kwoou mũikaete ingĩ!’

Aũme na aka aingĩ me ũtũĩka nĩmeeyumisye kũseũvya ĩeema yĩu. Yeova nĩwamanengie ũĩ nĩ kana mathũkũme wĩa ũsu. Amwe nĩmookothie ndii, matuma itambaa, kana matumĩĩa itambaa isu malaa. Angĩ maseũvya syĩndũ sya mavia, thaavu, na ingĩ sya mbwaũ.

Andũ nĩmaseũvisye ĩeema o tondũ Yeova wamatavĩtye. Nĩmaseũvisye vasia wa kũaanyʼa ĩeema yĩu kũndũ kwĩlĩ. Vandũ vamwe veetawa vala Vandũ Vatheu na vala vangĩ veetawa vala Vandũ Vatheu Vyũ. Nthĩnĩ wa vala Vandũ Vatheu Vyũ vaĩ na ĩsandũkũ ya ũtianĩo, yĩla yaseũvĩtwʼe na mbwaũ sya mũea na thaavu. Na vo vala Vandũ Vatheu vaĩ na kĩndũ kya thaavu kya kwilĩĩla taa, mesa, na kĩthembeo kya kũvĩvĩsya ũvani. Vau nza wa ĩeema vaĩ kĩndũ kya kũthambĩa kya ũthuku na kĩthembeo kĩnene. Yĩla ĩsandũkũ ya ũtianĩo yalilikanasya Aisilaeli ũndũ mamwathie Yeova kana makamwĩwʼaa. We nĩwĩsĩ ũtianĩo nĩ kyaũ? Nĩ watho wa mwanya.

Yeova nĩwamũnyuvie Aluni na ana make mathũkũmae ta athembi ĩeemanĩ yĩu. Nĩmo maaĩlĩte kũyĩsũvĩa na kũmumĩasya Yeova nthembo. Mũthembi mũnene, Aluni, nĩwe e weka weetĩkĩlĩtwʼe kũlika vala Vandũ Vatheu Vyũ. Alikaa vo ĩvinda yĩmwe kwa mwaka nĩ kana aumye nthembo kwondũ wa naĩ syake mwene, naĩ sya mũsyĩ wake, na naĩ sya mbaĩ yonthe ya Isilaeli.

Aisilaeli maminie kũseũvya ĩeema yĩu mwaka ũmwe ĩtina wa kuma Misili. Yu maĩ na vandũ matonya kũmũthaithĩa Yeova.

Yeova nĩwausũisye ĩeema yĩu na ũtheu wake mũtisu na vaumĩla ĩtu ĩũlũ wayo. Ĩtu yĩu yaendeea kwĩkala ĩũlũ wa ĩeema, Aisilaeli mayaumaa vala maseũvĩtye kambi. Ĩndĩ moona ĩtu yauma, nĩmamanyaa nĩ ĩvinda ya kũthi. Kwoou nĩmathaasya ĩeema na mayĩatĩĩaa yĩla ĩtu.