Ngũsĩ sya Yeova Syonaa Mathiko Ata?
Mawoni maitũ ĩũlũ wa mathiko na maũndũ ala twĩkaa mathikonĩ methĩawa mosanĩte na momanyĩsyo ma Mbivilia. Momanyĩsyo amwe nĩ ta aa maatĩĩe:
Ti ũthũku kũmeta mwendwa witũ akwʼa. Amanyĩwʼa ma Yesũ nĩmametaa ĩla makwʼĩĩwa nĩ endwa moo. (Yoana 11:33-35, 38; Meko ma Atũmwa 8:2; 9:39) Kwoou, tũyosaa mathiko ta ĩvinda ya kwĩtanĩthya. (Mũtavanʼya 3:1, 4; 7:1-4) Vandũ va ũu, twosaa ĩvinda yu kũĩa vamwe na ala makwʼĩĩwe.—Alomi 12:15.
Ala akwʼũ matyĩsĩ ũndũ o na wĩva. O na ethĩwa tumĩte va kana tũeetwe ata, nĩtũtataa mũno twĩsiĩanĩe na syĩthĩo kana meko ala andũ maatĩĩaa nũndũ wa kũĩkĩĩa kana akwʼũ no matethye kana makathĩnyʼa ala me thayũ. (Mũtavanʼya 9:5, 6, 10) Syĩthĩo imwe nĩ ta andũ kũlea ũkoma nĩkwĩthĩwa nĩmakwʼĩĩwe, kwĩthĩwa na mboka nene ĩvinda ya mathiko na ĩvinda ya kũlilikana mũthenya ũla mũndũ wakwie, kũthembea ala akwʼũ, kũea ngewa na ala akwʼũ, na syĩthĩo ila iveti iatĩĩaa aa-mũũme makwʼa. Tũleaa kwĩka maũndũ asu nũndũ tũatĩĩa mwĩao ũũ wa Mbivilia: “Umai katĩ woo, . . . na mũikakiite kĩndũ kĩvuku.”—2 Akolintho 6:17.
Ve wĩkwatyo kwa ala akwʼũ. Mbivilia ĩmanyĩasya kana kũkeethĩwa na ũthayũũkyo, na kana ve ĩvinda kĩkwʼũ kĩtakethĩwa vo ĩngĩ. (Meko ma Atũmwa 24:15; Ũvuanʼyo 21:4) Wĩkwatyo ũũ ũtũtetheeasya tũikaatĩĩe syĩthĩo itaĩle sya kũmeta, o ũndũ watetheeisye Aklĩsto ma ĩvinda ya atũmwa.—1 Athesalonika 4:13.
Mbivilia ĩtũtaĩte twĩkae maũndũ na kĩthimo. (Nthimo 11:2) Tũyonaa ĩvinda ya mathiko ta ĩvinda ya mũndũ ‘kwĩyonanyʼa nũndũ wa kwĩthĩwa na ũthwii,” kana nũndũ wa kĩlasi kyake. (1 Yoana 2:16, BCK) Tũivangaa mathiko me na nguma ala kĩeleelo kyamo nĩ kũtanĩthya andũ, kana kũthooa masandũkũ ma mbesa mbingĩ na ngũa sya kwĩyonanyʼa kũla kwĩ andũ angĩ.
Tũilasimĩthasya ala angĩ meke ũndũ twĩkaa ĩvinda ya mathiko. Nĩ kana tũikalasimĩthye angĩ, tũatĩĩaa mwolooto ũũ wa Mbivilia: “Kĩla ũmwe waitũ akaumya ũvoo wake mbee wa Ngai”. (Alomi 14:12) Ĩndĩ twakwata mwanya, nĩtũeleasya angĩ mũĩkĩĩo witũ twĩ na “ũuu na wʼĩa [kana, ndaĩa nene].”—1 Vetelo 3:15.
Mathiko ma Ngũsĩ sya Yeova methĩawa mailyĩ ata?
Vala mathiko mekĩawa: Ĩla ala makwʼĩĩwe meũvanga mathiko, no mavange methiko asu mekĩwe kũndũ ta Nyũmbanĩ ya Ũsumbĩ, nyũmbanĩ ya kũsũvĩa akwʼũ, mũsyĩ kwa ũla ũkwie, kũla akwʼũ mavĩvĩawʼa, kana o ũtee wa mbũa.
Ũndũ matwaĩĩawʼa: Ũvoo ũkũelesya kĩla Mbivilia ĩmanyĩasya ĩũlũ wa kĩkwʼũ na wĩkwatyo wa ũthayũũkyo nĩumawʼa nĩ kana ũkiakisye ala makwʼĩĩwe. (Yoana 11:25; Alomi 5:12; 2 Vetelo 3:13) Vulongulamu ya mathiko no ĩelesye ndaĩa nzeo sya mũndũ ũla ũkwie, na maũndũ ala tũtonya kwĩmanyĩsya kuma kwake e mũthũkũmi wa Yeova mũĩkĩĩku.—2 Samueli 1:17-27.
Wathi wĩ na kyongo kyumanĩte na Maandĩko no winwe. (Akolosai 3:16) Mathiko nĩmaminĩĩawa na mboya ya ũkiakisyo.—Avilivi 4:6, 7.
Mbesa/Ndĩvi: Tũyĩĩvĩthasya kwondũ wa kũtwaĩĩsya mathiko, o na tũyĩtasya nthembo maũmbanonĩ maitũ.—Mathayo 10:8.
Naaũ methĩawa vo: Andũ ala mate Ngũsĩ nĩmatonya kũka kwĩthukĩĩsya ũvoo wa mathiko Nyũmbanĩ ya Ũsumbĩ. O ta maũmbano ala angĩ, andũ onthe methĩawa matonya kũka mathikonĩ ma Ngũsĩ.
Ngũsĩ sya Yeova niendaa mathikonĩ ma ndĩni ingĩ?
Kĩla ũmwe wa Ngũsĩ sya Yeova nĩwe wĩtwʼĩaa ũndũ ũkwĩka atongoewʼe nĩ wasya wake wa ngoo ũla ũmanyĩĩtwʼe nĩ Mbivilia. (1 Timotheo 1:19) Ĩndĩ, tũyĩthĩawa na kĩanda o na kĩmwe maũndũnĩ ma ndinĩ ingĩ ala tũkwona maleanĩte na momanyĩsyo ma Mbivilia.—2 Akolintho 6:14-17.