Aisilaeli nĩmaumie Kĩĩmanĩ kya Sinai na mavĩtĩla weũnĩ wa Valani, nginya vandũ veetawa Katesi. Me vau, Yeova nĩwaneenie na Mose amwĩa: ‘Tũma aũme 12 kuma kĩla mbaĩnĩ, mathi makathiane nthĩ ya Kanaani, o nthĩ ĩla nĩmanenga Aisilaeli.’ Ala mathũkũmaa wĩa ũsu metawa athiani. Kwoou Mose anyuva aũme 12 na amea: ‘Endai nthĩ ya Kanaani, na mũkĩsisya ethĩwa nthĩ ĩsu nĩ nzeo kwondũ wa kũĩma. Sisyai ethĩwa andũ asu me na vinya kana nĩ onzu na ethĩwa mekalaa maeemanĩ kana nĩ ndũanĩ.’ Athiani asu 12, Yosua na Kalevu me nthĩnĩ, nĩmaumie mathi nthĩ ya Kanaani.

Ĩtina wa mĩthenya 40, athiani asu nĩmasyokie makuĩte makũyũ, makũngũmanga, na nzavivũ. Yĩla athiani asu masyokie maisye atĩĩ: ‘Nthĩ ĩsu nĩ nzeo, ĩndĩ andũ ma kũu me vinya na ndũa syoo syĩ ngũta ndũlu.’ Nake Kalevu asya: ‘Nĩtũtonya kũmasinda. Tũendei vate kwananga saa!’ We nĩwĩsĩ nĩkĩ Kalevu waisye ũu? Nũndũ we vamwe na Yosua nĩmamwĩkwatĩtye Yeova. Ĩndĩ athiani ala angĩ ĩkũmi maisye: ‘Tũithi! Andũ ala me kũndũ ku nĩ anene mũno! Tũilye itoli twasianĩwʼa namo.’

Ndeto isu nĩsyatumie Aisilaeli makwʼa ngoo. Nĩmambĩĩisye kũnyungunyĩsya mayasya: ‘Nĩtũnyuvei mũtongoi ũngĩ atũtũnge Misili. Ve vata mwaũ tũthi kũndũ kũu tũkoaĩwe kwʼo?’ Ĩndĩ Yosua na Kalevu masya: ‘Mũyaĩlĩte kũlea kũmwĩwʼa Yeova, o na mũyaĩle kwĩthĩwa na wia. Yeova akatũsũvĩa.’ Ĩndĩ Aisilaeli mayaaĩthukĩĩsya. O na nĩmendaa kũmũaa Yosua na Kalevu!

We Yeova eekie ata? Amwĩie Mose atĩĩ: ‘Nĩnĩkĩte Aisilaeli maũndũ maingĩ mũno, ĩndĩ o na ĩtina wa ũu maikũmbĩwʼa. Kwoou makekala weũnĩ myaka 40, na no vo makakwʼĩĩa. No syana syoo na Yosua na Kalevu makekala nthĩ ĩla namathĩte.’

Ĩtina wa ĩvinda, Aisilaeli me weũnĩ, Kola, Ndathani, Avilamu, na andũ angĩ 250 nĩmaleanile na ũtongoi wa Mose. Mamwĩie atĩĩ: ‘Yu tũikwenda kũendeea kũtongoewʼa nue! Nĩkĩ wonaa ta uwe waĩle kũtũtongoesya, na nĩkĩ Aluni wonaa tawe waĩle kwĩthĩwa mũthembi mũnene? Yeova e vamwe naitũ ithyonthe ĩndĩ ti o we na Aluni.’ Yeova ndaaendeewʼa nĩ kĩla andũ asu meekie. Oonie ta meũleana na ũtongoi wake!

Mose eeie Kola vamwe na andũ ala maĩ ngalĩko yake atĩĩ: ‘Ũnĩ mũkoka ĩeemanĩ mwĩ na syĩndũ syenyu sya kũtoeesya ũvani syusĩe ũvani. Yeova nũkatwonyʼa nũũ ũla ũnyuvĩte.’

Mũthenya ũla waatĩĩe, Kola na ala aũme 250 nĩmaendie kũkomana na Mose ĩeemanĩ. Mavika nĩmambĩĩie kũtoeesya ũvani o ũndũ athembi meekaa. Maendeee kwĩka ũu, Yeova eeie Mose na Aluni atĩĩ: ‘Umai vakuvĩ na Kola na aũme ala wĩ namo.’

O na kau Kola nĩwaendie ĩeemanĩ vala Mose waĩ, Ndathani na Avilamu na andũ ma mĩsyĩ yoo nĩmaleile kũthi. Nĩvo ĩndĩ Yeova weeie Aisilaeli mevetange vakuvĩ na maeema ma Kola, Ndathani, na Avilamu. Aisilaeli nĩmeekie ũu vate kwananga ĩvinda. Namo Ndathani, Avilamu, na mĩsyĩ yoo maũngamie o vau vakuvĩ na maeema moo. O ndatĩkanĩ ĩsu nthĩ nĩyaatũkanie na yamamelya onthe! Nake Kola na aũme 250, ala maĩ nake yĩla ĩeemanĩ maendeee kũtoeesya ũvani, nĩmavĩviwʼe nĩ mwaki ũla waumie ĩtunĩ.

Ĩtina wa maũndũ asu Yeova eeie Mose atĩĩ: ‘Osa ndata kuma kwa kĩla mũtongoi wa mbaĩ ya Isilaeli na ũimĩandĩka ĩsyĩtwa yake. Ĩndĩ ndata ya mbaĩ ya Livai, mĩandĩke ĩsyĩtwa ya Aluni. Wamina kwĩka ũu, ia ndata isu syonthe ĩeemanĩ, na ndata ya mũndũũme ũla ngũnyuva ĩkaumya malaa.’

Mũthenya ũla waatĩĩe Mose nĩwaumaalilye ndata isu syonthe mbee wa atongoi ma kĩla mbaĩ. Ndata ya Aluni yaĩ na malaa na yaĩ na matunda ma mũlosi na maĩ meu. Ũndũ ũsu woonanisye kana Yeova nĩwamũnyuvĩte Aluni ethĩwe mũthembi mũnene.