Yĩla ala athiani matũmĩtwe malikile ndũanĩ ya Yeliko, mekalile nyũmba kwa mũndũ mũka ũmwe weetawa Laavi. Mũsumbĩ wa Yeliko nĩwamanyie kana athiani asu nĩmavika na atũma asikalĩ kwa Laavi. Mũndũ mũka ũsu nĩwavithie athiani asu nyũmbanĩ ĩũlũ na eelekelya asikalĩ kũndũ kũngĩ. Ĩtina wa ũu eeie athiani asu atĩĩ: ‘Nĩngũmũtetheesya nũndũ nĩnĩsĩ kana Yeova e vamwe nenyu na nĩmũũsinda nthĩ yitũ. Nĩngũmwĩsũva mũndavye kana mũkatangĩĩa andũ ma mũsyĩ wakwa.’

Namo athiani asu mamwĩie Laavi atĩĩ: ‘Nĩtũũkwatha kana vaiĩ mũndũ wa nyũmba yaku ũkaũmĩwʼa.’ Na masyoka mamwĩa: ‘Oveea ĩkanda ĩtune ndĩlĩsyanĩ ya nyũmba yaku, na andũ maku makatangĩĩwa.’

Laavi nĩwatheeisye athiani asu kwĩsĩla ndĩlĩsyanĩ aitũmĩa ĩkanda. Nĩmaendie kĩĩmanĩ na meevitha kũu mĩthenya ĩtatũ, na ĩndĩ masyoka kũla kwĩ Yosua. Ĩtina wa ũu Aisilaeli nĩmaingie Ũsĩ wa Yolotani na meeyũmbanyʼa kwosa nthĩ ĩsu. Ndũa ya mbee ĩla masindie yaĩ Yeliko. Yeova ameie mathyũlũlũke ndũa ĩsu ĩvinda yĩmwe kĩla mũthenya na mayĩka ũu vandũ va mĩthenya thanthatũ. Mũthenya wa mũonza, mathyũlũlũkile ndũa ĩsu mavinda mũonza. Na ĩndĩ athembi mavuva masoo, na asikalĩ maneena na wasya mũnene mũno. Ĩtina wa ũu, ngũta sya ndũa ĩsu nĩsyavalũkile! Ĩndĩ nyũmba ya Laavi, ĩla yaĩ ũkũtanĩ ũsu ndyaavalũka. Laavi na andũ ma mũsyĩ wake maemie kwanangwa nũndũ nĩwamwĩkwatĩtye Yeova.

Ngewa sya ũndũ Yeliko yaanangiwe nĩsyanyaĩĩkie mbaĩnĩ ingĩ ila syaĩ Kanaani. Asumbĩ ma kũu nĩmavangie kũka kũkita na Aisilaeli. Ĩndĩ andũ ma Ngiveoni nĩmasũanĩie ũndũ ũngĩ wĩ kĩvathũkanyʼo. Nĩmeekĩie ngũa ndembũkangu na mathi vala ve Yosua na mamwĩa: ‘Tumĩte nthĩ ya vaasa. Nĩtwĩwʼĩte ĩũlũ wa Yeova na maũndũ onthe ala wamwĩkie mwĩ Misili na mwĩ Moavi. Twathe kana ndũkatwĩka ũndũ mũthũku na nĩtũũtwʼĩka athũkũmi maku.’

Yosua nĩweetĩkĩlanile namo na asya kana ndemeka ũndũ mũthũku. Ĩndĩ ĩtina wa mĩthenya ĩtatũ, nĩwamanyie kana andũ asu mayaumĩte nthĩ yĩ kũasa. Maumĩte o nthĩ ĩsu ya Kanaani. Yosua akũlilye andũ asu maumĩte Ngiveoni atĩĩ: ‘Nĩkĩ mũnatũkengie.’ Namo mamũsũngĩa mamwĩa: ‘Tũnaĩ na wia! Nĩtwĩsĩ kana Yeova ũla nĩwe Ngai wenyu nũtumaa mũsinda kaũnĩ. Mwa twĩmwĩsũva mũikatũae.’ Yosua nĩweekie kwosana na ũndũ wamathĩte na kwoou ndaamoaa.

Ĩtina wa ĩvinda ĩkuvĩ, asumbĩ atano ma Kanaani nĩmoombanisye asikalĩ moo nĩ kana mokite na andũ ma Ngiveoni. Nake Yosua na asikalĩ make nĩmaendie ũtukũ mũima nĩ kana makatangĩĩe andũ ma Ngiveoni. Andũ asu onthe nĩmambĩĩisye kaũ kwakya tene. Akanaani nĩmambĩĩie kũtoloka maendete kĩla ngalĩko. Ĩndĩ o kũla masembaa maendete Yeova nĩwamauĩisye mbũa ya mavia manene na mamakimanga. Na ĩndĩ Yosua amũvoya Yeova nĩ kana syũa yĩũngame yĩikathũe. Nĩkĩ Yosua wamũvoyie Yeova ũu na vaiĩ ĩvinda yĩngĩ syũa yaaũngama? Nũndũ Yosua nĩwamũĩkĩĩte Yeova. Kwondũ wa ũu, syũa yĩyaathũa mũthenya ũsu wʼonthe nginya yĩla Aisilaeli masindie asumbĩ ma Kanaani na asikalĩ moo.