Ĩtina wa ĩvinda, Aisilaeli nĩmatiie Yeova na mambĩĩa kũthaitha ngai sya ũvũngũ. Amitiani nĩmooyaa indo sya Aisilaeli na mayananga lĩu woo wĩ mũũndanĩ vandũ va myaka mũonza. Nũndũ wa ũu, Aisilaeli nĩmeevithaa ngunganĩ na iĩmanĩ nĩ kana maikoneke nĩ Amitiani. Nĩmamwĩsũvie Yeova amatangĩĩe. Kwoou, Yeova nĩwatũmie mũlaĩka kũla kwĩ mwanake ũmwe weetawa Ngiteoni. Mũlaĩka ũsu amwĩie atĩĩ: ‘Yeova nũkũnyuvĩte wĩthĩwe ngũmbaũ.’ Nake Ngiteoni akũlya atĩĩ: ‘Nyie ndonya kũtangĩĩa Isilaeli ata? Nyie nĩ vathei.’

Ngiteoni amanyie ata kana Yeova nũmũnyuvĩte? Oosie wʼĩa aia nthĩ na amwĩa Yeova atĩĩ: ‘Ũnĩ kwakya neethĩa wʼĩa ũũ wĩ mũthithu ĩndĩ nthĩ yĩ nyũmũ ngamanya kana nũnyuvĩte nĩtangĩĩe Isilaeli.’ Ũnĩ wake wʼĩa ũsu waĩ mũthithu vyũ ĩndĩ nthĩ yaĩ nyũmũ! Ĩndĩ Ngiteoni nĩwamũkũlilye Yeova ũndũ ũngĩ wĩ kĩvathũkanyʼo. Amwĩie eenda eĩthĩa wʼĩa ũsu ũte mũthithu ĩndĩ nthĩ yĩ nthithu. Ũu nĩwʼo veethĩiwe, na ũndũ ũsu nĩwatumie Ngiteoni aĩkĩĩa kana Yeova nĩwamũnyuvĩte. Kwoou nĩwoombanisye asikalĩ make nĩ kana okite na Amitiani.

Yeova eeie Ngiteoni atĩĩ: ‘Ngatetheesya Aisilaeli masinde. Na nũndũ wĩ na asikalĩ aingĩ, no mũsũanĩe kana mwasinda kaũ mũitũmĩa vinya wenyu. Kwoou tavya andũ ala me na wia menũke.’ Nũndũ wa ũu asikalĩ 22,000 menũka, na 10,000 matiwa. Na ĩndĩ Yeova amwĩa: ‘Asikalĩ ala wĩ namo no aingĩ. Matwae ũsĩnĩ, na ũimea manywʼe kĩwʼũ. Eka asikalĩ ala meũnywʼa kĩwʼũ me metho maikethĩwe nĩ amaitha moo matiwe nemo.’ Ĩtina wa maũndũ asu asikalĩ ala matialile maĩ 300 nũndũ nomo manyusaa kĩwʼũ me metho. Yeova nĩwathie Aisilaeli kana asikalĩ asu avũthũ nĩmeũsinda asikalĩ ma Amitiani me 135,000.

Ũtukũ ũsu Yeova eeie Ngiteoni atĩĩ: ‘Yu nĩyo ĩvinda ya kũthi kũkita na Amitiani!’ Ngiteoni nĩwanengie aũme ala waĩ namo masoo na itete nene syĩ na syĩndũ sya kũmulĩka. Ameie: ‘Sisyai ũndũ ngwĩka, na mũyĩka takwa.’ Ngiteoni nĩwavuvie soo wake, ooaa kĩtete, avyũlyavyũlya kĩndũ kya kũmulĩka na asya na wasya mũnene: ‘Ũvyũ wa Yeova na wa Ngiteoni!’ Namo aũme onthe ala waĩ namo me 300 nĩmeekie oou. Amitiani nĩmatelemile na masemba me avũavũanu maendete kĩla ngalĩko. Nũndũ wa ũu nĩmambĩĩie kũkita ene kwa ene. O tondũ Yeova weekĩte mbeenĩ, nĩwatetheeisye Aisilaeli masinda amaitha moo.

Elikana ũla waĩ Mũisilaeli aĩ na iveti ilĩ, kĩmwe kyeetawa Aana na kĩla kĩngĩ Venina. Elikana nĩwendete Aana kwĩ Venina. Venina atindĩaa kũmũthekeea Aana nũndũ Aana ndaĩ na syana ĩndĩ we aĩ na syana mbingĩ. Kĩla mwaka, Elikana nĩwaendaa na andũ make kũthaitha ĩeemanĩ yĩla yaĩ Silo. Ĩvinda yĩmwe me kũu ĩeemanĩ, Elikana nĩwamanyie kana Aana aĩ na kyeva kingĩ mũno. Elikana amwĩie Aana atĩĩ: ‘Mwa ndũkaĩe. Nĩ naku na nĩngwendete.’

Ĩtina wa ĩvinda, Aana nĩwaendie vandũ e weka akavoye. Ĩvindanĩ yĩu wavoyaa, nĩwaĩie mũno aimwĩsũva Yeova amũtetheesye. Amwĩie Yeova atĩĩ: ‘Wanenga kana kavĩsĩ, ngakũnenga ko na kakaũthũkũmaa ĩvinda yonthe yĩla kakethĩwa thayũ.’

Mũthembi Mũnene ũla weetawa Eli nĩwoonie Aana aineena na kĩwe, na asũanĩa kana nũnywʼĩte. Ĩndĩ Aana amwĩie atĩĩ: ‘Mwĩaĩi wakwa, nyie ndinywʼĩte. Nĩ na thĩna mũnene, na nĩtavasya Yeova thĩna ũsu.’ Eli nĩwamanyie kana aĩ na mavĩtyo na kwoou amwĩa Aana atĩĩ: ‘Ngai nakũnenge kĩla ũkwenda.’ Aana nĩweewie ausya na enũka. Mwaka ũmwe ũte mũthelu, nĩwakwatie kana kavĩsĩ na aketa Samueli. We wĩona Aana ta weewie mũyo wĩana ata?

Aana ndaaũlwa nĩ ndeto ila wamũtavĩtye Yeova. Yĩla waekie kwongya Samueli, nĩwamũtwaie akathũkũmae ĩeemanĩ. Yĩla wavikie amwĩie Eli atĩĩ: ‘Kaa nĩko kamwana kala namũvoyie Yeova. Mĩthenya yako yonthe nakanengane kwa Yeova.’ Elikana na Aana nĩmaendaa kwona Samueli kĩla mwaka na maimũtwaĩa ĩkoti yĩte moko. Yeova nĩwamũnengie Aana syana ingĩ itatũ sya ivĩsĩ na ingĩ ilĩ sya eĩtu.