Aisilaeli nĩmamũtiie Yeova ĩngĩ na mambĩĩa kũthaitha ngai sya ũvũngũ. Yĩla Aamimoni mookie kũkita na Aisilaeli, ngai isu sya ũvũngũ Aisilaeli mathaithaa iyaamatethya. Kwa myaka mingĩ, Aisilaeli nĩmathĩnie mũno. Ĩtina mesie kũmũvoya Yeova mamwĩa atĩĩ: ‘Nĩtũvĩtĩtye. Mwa tũtangĩĩe kumana na amaitha maitũ.’ Aisilaeli nĩmaanangie ngai syoo sya mĩvwʼanano na mambĩĩa kũmũthaitha Yeova ĩngĩ. Yeova ndendaa kwona maendeee kũthĩna.

Mũndũũme waĩ ngũmbaũ ya kaũ weetawa Yevitha nĩwanyuviwe atongoesye andũ makokite na Aamimoni. Mũndũũme ũsu amwĩie Yeova atĩĩ: ‘Wandetheesya nĩsinde kaũnĩ, nasyoka ngakũnenga mũndũ ũla wĩũka mbee kũnthaũa.’ Yeova nĩwasũngĩie mboya ya Yevitha kwa kũmũtetheesya kũsinda kaũ ũsu.

Yĩla Yevitha wasyokie mũsyĩ kuma kaũnĩ, mũndũ wa mbee vyũ kũmũthaũa aĩ mwĩĩtu wake, ũla nowe waĩ mwana wake e ũmwe. Amũthaũie asũngĩte na akũnĩte kathembe. We Yevitha esaa kwĩka ata? Alilikanile kĩla wamwathie Yeova na asya: ‘Mwa nyie mwĩĩtu wakwa! Nĩwambĩka naĩ mũno. Nĩnĩmwathĩte Yeova ũndũ. Na nĩ kana nĩwĩanĩsye, no nginya ngũnengane ũthi ũkathũkũme ĩeemanĩ yĩla yĩ Silo.’ Ĩndĩ mwĩĩtu wake amũsũngĩa amwĩa: ‘Tata nĩwamwathie Yeova, mbĩke kwĩanana na ũndũ wamwathie. Kĩla yu ngũvoya nĩ kana ũnenge mwanya nĩthi iĩmanĩ ngethĩwe vamwe na eĩtu ala twĩ ndũũ kwa ĩvinda ya myei ĩlĩ. Na ĩndĩ nasyoka ngathi Silo.’ Mwĩĩtu wa Yevitha aendeeie kũthũkũma nesa ĩeemanĩ thayũnĩ wake wʼonthe. Anyanyae nĩmaendaa kũmũkethya kĩla mwaka.

Mũthembi Mũnene Eli aĩ na anake elĩ ala maĩ athembi ĩeemanĩ. Ũmwe wa anake asu eetawa Ovini na ũla ũngĩ Vineasi. Anake asu mayaatĩĩaa mĩao ya Yeova, na nĩmathĩnasya andũ mũno. Aisilaeli makilasya maete nthembo mamumĩsye Yeova, Ovini na Vineasi maitila ila nzeo makaye. Eli nĩwakwatie ũvoo ĩũlũ wa kĩla anake asu make meekaa, ĩndĩ ndaaosa ĩtambya o na yĩmwe. We Yeova oosie ĩtambya yĩva?

O na kau Samueli aĩ mũnini kwĩ Ovini na Vineasi, we ndaatĩĩaa ngelekanyʼo yoo. Yeova nĩwendeeawʼa nĩ Samueli. Mũthenya ũmwe kwĩ ũtukũ, Samueli akomete nĩweewie mũndũ aimwĩta. Nĩwookĩlile, na asemba kũla kwĩ Eli na amwĩa: ‘Nĩnooka!’ Ĩndĩ Eli amwĩa: ‘Nyie ndinakwĩta. Syoka ũkakome.’ Samueli nĩwasyokie na akoma. Ĩndĩ nĩweewie ayĩtwa ĩngĩ ya kelĩ. Na vatanathela ĩvinda Samueli nĩweewie ayĩtwa ĩngĩ ya katatũ, na kwoou Eli amanya kana nĩ Yeova weetaa Samueli. Nĩ vo ĩndĩ Eli wamwĩie Samueli kana eewʼa wasya ũsu ĩngĩ asũngĩe atĩĩ: ‘Ninyioo vaa Yeova. Mũthũkũmi waku nĩwĩthukĩĩsye.’

Samueli nĩwasyokie akakome. Na ĩndĩ eewʼa ayĩtwa: ‘Samueli Samueli!’ Nake asũngĩa asya: ‘Neena nũndũ mũthũkũmi waku nĩwĩthukĩĩsye.’ Na Yeova amwĩa: ‘Tavya Eli kana nĩngũmwosea ĩtambya vamwe na mũsyĩ wake. Eli nĩwĩsĩ kana anake make maendeee kwĩka maũndũ mathũku ĩeemanĩ yakwa, ĩndĩ vaiĩ ĩtambya ũmoseete.’ Kwakya Samueli nĩwavingũangie mĩomo ya ĩeema, o tondũ weekaa. Nĩwakĩaa kũtavya mũthembi mũnene maũndũ ala Yeova ũmũtavisye. Ĩndĩ Eli amwĩta Samueli na amũkũlya: ‘Mwanawa, Yeova akwĩie ata? Ndũkambithe kĩndũ.’ Kwoou Samueli atavya Eli kĩla kĩndũ.

Samueli nĩwaendeeie kwĩana na Yeova aendeea kwĩthĩwa vamwe nake. Aisilaeli onthe nĩmeesĩ kana Yeova nĩwamũnyuvĩte Samueli ethĩwe mwathani na mũsili.