Yeova eeie Samueli atĩĩ: ‘Enda kwa Yese. Mwanake ũmwe wake akeethĩwa mũsumbĩ wa Isilaeli.’ Na Samueli athi mũsyĩ kwa Yese. Yĩla wavikie nĩwoonie mwanake ũla waĩ mũkũũ na asũanĩa: ‘No nginya mwanake ũũ ethĩwe newe ũkatwʼĩka mũsumbĩ.’ Ĩndĩ Yeova amwĩa Samueli kana mwanake ũsu tiwe waĩ atwʼĩke mũsumbĩ. Yeova amwĩie atĩĩ: ‘Nyie nĩsiasya ngoo ya mũndũ, ĩndĩ ti ũndũ ũilye nza.’

Ĩtina wa ũu, Yese nĩwaetie anake angĩ make thanthatũ vala ve Samueli. Ĩndĩ Samueli eea Yese atĩĩ: ‘Yeova ndanyuvĩte aa. Wĩ na anake angĩ eka aa?’ Na ĩndĩ Yese amũsũngĩa Samueli amwĩa: ‘Ve ũmwe ũtiele, ũla mũnini vyũ na etawa Ndaviti. E kĩthekanĩ ayĩĩthya malondu makwa.’ Yĩla Ndaviti watũmaniwe na ooka, Yeova amwĩie Samueli atĩĩ: ‘Ũũ nĩwe nĩnyuvĩte!’ Nĩvo ĩndĩ Samueli wamwĩtĩkĩisye Ndaviti mauta, na ũu woonanyʼa kana Ndaviti nĩwe waĩ ethĩwe mũsumbĩ wa Isilaeli ĩtina wa Saulo.

Ĩtina wa ĩvinda, Aisilaeli nĩmaendie kũkita na Avilisiti ala maĩ na mũsikalĩ waĩ mũnene mũno weetawa Ngoliathu. Mũsikalĩ ũsu nĩwathekeeaa Aisilaeli mũno. Yĩla Aisilaeli moombanĩte mokite na Avilisiti, Ngoliathu aneenaa na wasya mũnene ayasya atĩĩ: ‘Nengai mũndũ tũkite nake. Asinda tũkeethĩwa ngombo syenyu, ĩndĩ namũsinda, mũkeethĩwa ngombo sitũ.’

Ĩvindanĩ yĩu Ndaviti nĩwaendie kambinĩ ya Aisilaeli kũtwaĩa ana-a-inyia lĩu ala maĩ asikalĩ. Avika nĩweewie Ngoliathu aikũlya anengwe mũndũ okite nake, na ũu watuma Ndaviti asya atĩĩ: ‘Nyie nĩngũkita nake!’ Ĩndĩ Mũsumbĩ Saulo amwĩa: ‘We ndũtonya nũndũ wĩ o kamwana.’ Nake Ndaviti amũsũngĩa amwĩa: ‘Yeova nũkũndetheesya.’

Saulo nĩwanengie Ndaviti ngũa syake sya kaũ, ĩndĩ Ndaviti amwĩa: ‘Nditonya kũthi kũkita nĩkĩĩte ngũa ii.’ Ndaviti nĩwoosie kĩkũtha kyake na atheea kalũsĩnĩ. Na ĩndĩ anyuva mavia atano matendeu na amekĩa kamũvukonĩ. Ndaviti amina kwĩka ũu nĩwasembie elekele vala ve Ngoliathu. Yĩla ĩmũndũ yĩu yamwonie okĩte, yaneenie na wasya mũnene yasya: ‘Ũka vaa kamwana kaa. Nĩkũaa na ndikũnengane ũĩwe nĩ nyũnyi sya yayaya na nyamũ sya kĩthekanĩ.’ Ĩndĩ Ndaviti ndaĩ na wia o na vanini. Asũngĩie Ngoliathu amwĩa: ‘Ũkĩte kũkita nakwa wĩ na ũvyũ na ĩtumo, ĩndĩ nyie nũkĩte kũkita naku ĩsyĩtwanĩ ya Yeova. Ti ithyĩ ũkũkita naitũ; ũũkita na Ngai. Kĩla mũndũ wĩ vaa nũkũmanya kana Yeova e vinya mwingĩ kũvĩtũka ũvyũ na ĩtumo. Nũkũmũnengane inywʼonthe mokonĩ maitũ.’

Ĩtina wa kũneena ũu Ndaviti oosie ĩvia eekĩa kĩkũthanĩ na ayĩkya na vinya wake wʼonthe. Nũndũ wa vinya wa Yeova, ĩvia yĩu yaendie kũmũkima Ngoliathu ũthyũ na yalika nthĩnĩ vyũ. Ũu watumie ĩmũndũ yĩu yĩvalũka nthĩ na yakwʼa. Namo Avilisiti ala angĩ moona ũu, masemba makĩĩte. We nũmwĩkwatasya Yeova ta Ndaviti?

Ĩtina wa Ndaviti kũaa Ngoliathu, Mũsumbĩ Saulo nĩwamũtwʼĩkĩthisye mũnene wa asikalĩ make. Ndaviti nĩwasindie makaũ maingĩ na eethĩwa esĩkĩe mũno. Yĩla Ndaviti wauma kaũnĩ, aka mamũthaũaa masũngĩte na mainĩte mayasya: ‘Saulo nĩwoaa andũ ngili mbingĩ, na Ndaviti nĩwoaa makũmi ma makili!’ Nũndũ wa ũu Saulo nĩwamwĩwʼĩe Ndaviti kĩwĩu na enda kũmũaa.

Ndaviti nĩweesĩ kũkũna mbeve nesa. Mũthenya ũmwe yĩla Ndaviti wakũnĩaa Saulo mbeve, Saulo nĩwamwĩkisye ĩtumo ayenda kũmũtonya amũae. Ndaviti nĩwaathũkĩie ĩtumo yĩu, na yaatha ũkũta. Ĩtina wa ũu, Saulo nĩwatatie mavinda maingĩ kũmũaa Ndaviti. Maũndũ asu matumie Ndaviti esa kũsemba athi weũnĩ akevithe.

Saulo nĩwaendie na asikalĩ 3,000 makamũmanthe Ndaviti. Saulo aendeee kũmũmantha Ndaviti, nĩwalikile ngunganĩ vala Ndaviti na aũme make meevithĩte. Aũme ma Ndaviti mamwĩie na kĩwe atĩĩ: ‘Yu nĩwakwata mwanya wa kũmũaa Saulo.’ Ndaviti nĩwaendie o kavola kavola nginya vala ve Saulo na atila kalungu ka ngũa yake. Ĩndĩ Saulo ndaamanya ũndũ ũsu. Ĩtina, Ndaviti nĩweewie woo mũno nũndũ ndaanenga ndaĩa mũsumbĩ ũla wetĩkĩiwʼe mauta nĩ Yeova. O na ĩngĩ ndaaĩtĩkĩla aũme make mamũae Saulo. Ĩtina wa ĩvinda, Ndaviti nĩwamwĩtie Saulo, na amwĩa kana eĩ na mwanya wa kũmũaa ĩndĩ ndanamũaa. Ĩndĩ we Saulo nĩwaekanie na mũvango ũla waĩ nawʼo wa kũmũaa Ndaviti?

Aiee. Saulo nĩwaendeeie kũmũmantha Ndaviti amũae. Mũthenya ũmwe wĩoo, Ndaviti na Avisai ũla waĩ mwana wa mwĩĩtu-a-inyia nĩmalikile kambinĩ ya Saulo mevithĩte. Ĩvindanĩ yĩu o nake Avineli, mũsungi wa Saulo, nĩwakomete. Yĩla Avisai woonie ũu aisye atĩĩ: ‘Nĩtwakwata mwanya mũseo! Ekai nĩmũae.’ Nake Ndaviti amũsũngĩa amwĩa: ‘Yeova akamũsilĩla Saulo. Twose ĩtumo na sũva wake wa kĩwʼũ na tũithi.’

Ĩtina wa ũu, Ndaviti nĩwaendie alĩsa kĩĩmanĩ kyaĩ vakuvĩ na kambi ya Saulo. Ndaviti aneenie wa wasya mũnene asya: ‘Avineli nĩkĩ ũtanasũvĩa mũsumbĩ waku? Sũva wa kĩwʼũ wa Saulo na ĩtumo yake syĩĩ va?’ Saulo nĩwamanyie kana wasya ũsu nĩ wa Ndaviti na asya: ‘Keka nũkwendaa wĩthĩwa wambũaa, ĩndĩ ndũnambũaa. Nĩnĩsĩ kana nuwe ũkethĩwa mũsumbĩ wa Isilaeli ĩtina wakwa.’ Ĩtina wa ũu, Saulo nĩwasyokie nyũmbanĩ yake ya ũsumbĩ. Ĩndĩ ti andũ onthe ma mũsyĩ wa Saulo mamenete Ndaviti.