Mwana ũla mũkũũ wa Mũsumbĩ Saulo, ũla weetawa Yonathani, aĩ mũsikalĩ wĩ ũkũmbaũ. Ndaviti aisye kana Yonathani aĩ mĩtũkĩ kwĩ ndiũ na aĩ vinya kwĩ mũnyambũ. Mũthenya ũmwe Yonathani nĩwoonie asikalĩ 20 ma Avilisiti me kalĩmanĩ. Na ĩndĩ amwĩa mũndũ ũla wamũkuĩaa mĩio ya kaũ: ‘Twĩthi kũkita namo ethĩwa Yeova nũkũtwonyʼa ũndũ wa kũtũĩkĩĩthya. Avilisiti matwĩa nĩtwambate tũkite namo, nĩtũũthi.’ Avilisiti nĩmaneenie na wasya mũnene mamea: ‘Ambatai tũkite.’ Kwoou, aũme asu me elĩ nĩmambatie kalĩmanĩ kau, mokita na asikalĩ asu, na mamasinda.

Nũndũ Yonathani nĩwe waĩ mwana ũla mũkũũ wa Saulo, nĩwe waaĩle kũtwʼĩka mũsumbĩ ĩtina wa ĩthe wake. Ĩndĩ Yonathani nĩweesĩ kana Yeova nĩwanyuvĩte Ndaviti ethĩwe mũsumbĩ wa Isilaeli, na kwoou ndaĩ na kĩwĩu. Yonathani na Ndaviti nĩmeethĩiwe anyanya aseo. Maisye kana makasũvĩanaa. Yonathani nĩwanengie Ndaviti ngũa yake, ũvyũ, ũta, na mũsivi wake syĩthĩwe wonanyʼo wa ũndũ mendanĩte.

Yĩla Ndaviti wasembete akĩĩte Saulo, Yonathani nĩwaendie vala waĩ na amwĩa atĩĩ: ‘Ĩthĩwa na vinya na ũkũmbaũ mũnene. Yeova nũkũnyuvĩte wĩthĩwe mũsumbĩ. O na ĩthe wakwa nĩwĩsĩ ũu nesa.’ We no wende kwĩthĩwa na mũnyanya mũseo ta Yonathani?

Mavinda maingĩ, Yonathani nĩwakwatawa nĩ mathĩna aitetheesya mũnyanyae Ndaviti. Yonathani nĩweesĩ kana ĩthe wake Saulo nĩwendaa kũmũaa Ndaviti, na kwoou amwĩa atĩĩ: ‘Nĩ ĩvĩtyo ĩnene mũno kũmũaa Ndaviti, nũndũ vaiĩ ũndũ mũthũku wĩkĩte.’ Ndeto isu syatumie Saulo amũthatĩa Yonathani mũno. Ĩtina wa myaka o mĩnini, Saulo na Yonathani nĩmooaĩwe kaũnĩ.

Yĩla Yonathani wakwie, Ndaviti nĩwamũmanthie Mevivosethi mwana wa Yonathani. Yĩla Ndaviti wesie kũmwona Mevivosethi, amwĩie atĩĩ: ‘Nũndũ ĩthe waku twaĩ ndũũ mũno, ngakũsũvĩaa ĩvinda yonthe yĩla ũkekala thayũ. Ũkekalaa kwakwa na ngakũnengae lĩu.’ Ndaviti ndaaĩsa kũlwa nĩ Yonathani.

Yĩla Saulo wakwie, Ndaviti nĩwe watwʼĩkie mũsumbĩ. Ndaviti ambĩĩe kũsumbĩka e na myaka 30. Ĩtina wa kũsumbĩka vandũ va myaka mĩnini, ũtukũ ũmwe e vandũ vatũlu nyũmbanĩ yake, nĩwoonie mũndũ mũka waĩ mwanake mũno. Ndaviti nĩwesie kũmanya kana mũndũ mũka ũsu eetawa Mbathi-sieva na atwaĩtwe nĩ mũsikalĩ weetawa Ulia. Ndaviti nĩwatũmanie Mbathi-sieva aetwe nyũmba kwake. Yĩla Mbathi-sieva waetiwe, Ndaviti nĩwakomie nake na aitava. Ndaviti nĩwatatie kũvitha ĩvĩtyo yĩu weekie. Eekie ũu kwa kwĩaĩa mũũngamĩi wa asikalĩ make eaĩe Ulia ethĩwe e ũmwe wa asikalĩ ala me mbee kaũnĩ, na ĩndĩ atavya asikalĩ ala angĩ mese kũsyoka ĩtina mamũtie vau e weka. Ulia nĩwooaĩwe kaũnĩ ũsu, na ĩndĩ Ndaviti atwaa Mbathi-sieva.

O na kau Ndaviti nĩwavithie maũndũ mathũku ala weekie, Yeova nĩwamene nesa. We Yeova eekie ata ĩtina wa ũu? Nĩwatũmie mwathani wake weetawa Nathani kũla kwĩ Ndaviti. Nathani avika amwĩie Ndaviti atĩĩ: ‘Vaĩ mũndũ ũmwe waĩ mũthwii na waĩ na malondu maingĩ, na vaĩ mũndũ ũngĩ waĩ ngya na waĩ na kalondu kamwe wakendete mũno. Na ĩndĩ mũndũ ũsu mũthwii oosa kala kalondu ka ũla mũndũ ngya.’ Ndaviti nĩweewie woo mũno na asya: ‘Mũndũ ũsu mũthwii aĩle kũawa!’ Na ĩndĩ Nathani amwĩa Ndaviti: ‘We nue mũndũ ũsu mũthwii!’ Ndeto sya Nathani nĩsyatumie Ndaviti athĩnĩka mũno ngoonĩ na ũu watuma asya: ‘Nĩnĩmũvĩtĩsye Yeova.’ Ĩvĩtyo yĩu Ndaviti weekie nĩyatumie we mwene vamwe na mũsyĩ wake makwatwa nĩ mathĩna maingĩ mũno. Yeova nĩwamũkanisye Ndaviti ĩndĩ aeka aendeee kwĩkala thayũ nũndũ wa kwĩthĩwa aĩ na wĩnyivyo na aĩ na ngoo nzeo.

Ĩtina wa ĩvinda Ndaviti nĩwendaa kũmwakĩa Yeova ĩkalũ, ĩndĩ Yeova aisye kana ũla ũkaka ĩkalũ yĩu nĩ Solomoni mwana wake. Ndaviti nĩwambĩĩie kũmbanĩsya Solomoni syĩndũ sya kwaka ĩkalũ. Amina kũmbanyʼa syĩndũ isu aisye atĩĩ: ‘Ĩkalũ ya Yeova yaĩle kwĩthĩwa yĩ ĩseo mũno. Kwoou nĩũmbanyʼa syĩndũ kwondũ wa Solomoni nũndũ nĩ mũnini.’ Ndaviti nĩwaumisye mbesa mbingĩ kwondũ wa wĩa wa kwaka ĩkalũ. O na nĩwamanthie andũ meesĩ kwaka nesa. Nĩwoombanisye thaavu na vetha, na atũmana mĩtĩ ya mĩkũũ kuma Tile na Sitoni. Ndaviti e vakuvĩ kũkwʼa nĩwoonisye Solomoni ũndũ ĩkalũ yĩu yaĩle kwakwa. Amwĩie atĩĩ: ‘Yeova nĩwe ũndavisye ngũandĩkĩe maũndũ aa. Yeova akaũtetheesya. Ndũkakĩe. Ĩthĩwa na vinya na ũyambĩĩa kũthũkũma.’