Yĩla Solomoni watwʼĩkie mũsumbĩ wa Isilaeli, Yeova amũkũlilye atĩĩ: ‘Wĩenda ngũnenge kyaũ?’ Solomoni amũsũngĩie Yeova amwĩa atĩĩ: ‘Nyie nĩ o kamwana kanini, na ndyĩsĩ kĩla ndonya kwĩka. Mwa nenga ũĩ wa kũtongoesya andũ maku.’ Nake Yeova amwĩa Solomoni atĩĩ: ‘Nũndũ wambĩtya ũĩ, nyie nakwa ngatuma wĩthĩwa mũndũ ũla mũĩ vyũ ĩũlũ wa nthĩ. O na ĩngĩ ngakũnenga ũthwii mwingĩ. Na ethĩwa ũkaendeeaa kũmbĩwʼa, ũkekala myaka mingĩ mũno.’

Solomoni nĩwambĩĩie kwaka ĩkalũ. Atũmĩie thaavu mũseo mũno, vetha, mbwaũ, na mavia. Aũme na aka ngili mbingĩ ala maĩ na ũmanyi nĩmatethisye wĩa ũsu wa kwaka ĩkalũ. Ĩtina wa myaka mũonza, ĩkalũ yaĩ ĩthelu nayu yatielye kũvathwa kwondũ wa Yeova. Nthĩnĩ wa ĩkalũ yĩu, vaĩ na kĩthembeo na mũthenya ũsu vaĩ na nthembo ĩũlũ wakyo. Na ĩndĩ Solomoni athi vau mbee wa kĩthembeo na avoya ayasya: ‘Ame Yeova, ĩkalũ yĩĩ ti ĩnene kana ĩseo mũno vyũ kwondũ waku, ĩndĩ nĩngũkwĩsũva wĩtĩkĩle ũthaithi witũ na ũyĩthukĩĩsya mboya sitũ.’ We Yeova aĩ na woni mwaũ ĩũlũ wa ĩkalũ na mboya ĩla Solomoni waumisye? Yĩla Solomoni waminie kũvoya oou, mwaki nĩwaumie ĩtunĩ na wavĩvya ĩla nthembo yaĩ kĩthembeonĩ. Ũũ woonanisye kana Yeova nĩweetĩkĩla ĩkalũ yĩu kwondũ wa ũthaithi wake. Yĩla Aisilaeli moonie ũu, nĩmatanie mũno.

Mũsumbĩ Solomoni nĩweesĩkĩe mũno vyũ Isilaeli yonthe nũndũ wa ũĩ wake, o na nĩweesĩkĩe kũndũ kũasa mũno. Andũ nĩmookaa kũla kwĩ Solomoni amatetheesye yĩla me na mathĩna. O na mũsumbĩ mũndũ mũka wa Sieva nĩwookie nĩ kana amũtate Solomoni kwa kũmũkũlya makũlyo me vinya. Yĩla mũsumbĩ ũsu weewie ndeto sya Solomoni aisye atĩĩ: ‘Ndinaĩkĩĩaa kĩla andũ manandavasya ĩũlũ waku, ĩndĩ yu nĩneethĩa kana wĩ mũĩ mbee wa o na ũndũ andũ manawetaa. Ngai waku, Yeova, nũkũathimĩte mũno.’ Ĩvindanĩ yĩu, maũndũ maendeee nesa mũno nthĩ ĩsu ya Isilaeli, na andũ maĩ atanu mũno. Ĩndĩ maũndũ nĩmesaa kũalyũka.

Ĩvinda yonthe yĩla Solomoni wamũthaithaa Yeova, Aisilaeli maĩ na mũuo. Ĩndĩ Solomoni nĩwatwaie iveti mbingĩ kuma nthĩ ingĩ, na iveti isu syathaithaa ngai sya mĩvwʼanano. O kavola kwa kavola, Solomoni nĩwavĩndũkie, na ambĩĩa kũthaitha ngai isu sya mĩvwʼanano. Ũndũ ũsu nĩwamũthatisye Yeova. Na kwoou Yeova amwĩa Solomoni atĩĩ: ‘Ũsumbĩ wa Isilaeli ũkavetangwa mũsyĩ kwaku na ũiaanĩka kũndũ kwĩlĩ. Kĩlungu kĩla kĩnene kya ũsumbĩ ũsu ngakĩnenga mũthũkũmi waku ũmwe, na mũsyĩ waku ũkasumbĩka kĩlungu kĩla kĩnini.’

Yeova nĩwasyokie aumĩlya ũndũ ũsu nesanga. Ĩvinda yĩmwe mũthũkũmi wa Solomoni weetawa Yelovoamu, nĩwakomanie na Aiya ũla waĩ mwathani. Aiya nĩwatembũanisye ngũa yake ilungu 12 na amwĩa Yelovoamu atĩĩ: ‘Yeova akaumya ũsumbĩ wa Isilaeli kuma mũsyĩ kwa Solomoni na aiũaanyʼa kũndũ kwĩlĩ. Osa ilungu ii ĩkũmi nũndũ ũkeethĩwa mũsumbĩ wa mbaĩ ĩkũmi sya Isilaeli.’ Mũsumbĩ Solomoni nĩweewie ngewa ĩsu na avanga kũmũaa Yelovoamu! Nũndũ wa ũu Yelovoamu nĩwasembie athi Misili. Ĩtina wa ĩvinda, Solomoni nĩwakwie na mwana wake Leovoamu atwʼĩka mũsumbĩ. Ũu nĩwatumie Yelovoamu amanya kana no asyoke ĩngĩ Isilaeli.

Atumĩa ma Isilaeli mamwĩie Leovoamu atĩĩ: ‘Wekalanyʼa na andũ nesa makeethĩwa me aĩkĩĩku kwaku.’ Ĩndĩ anyanya ma Leovoamu ala maĩ andũ ma mũika mũnini mamwĩa: ‘Ndũkewʼĩe andũ aa tei! Mathũkũmĩthye vyũ!’ Leovoamu nĩwaatĩĩie ũtao wa anyanyae asu ma mũika mũnini. Nũndũ nĩwangʼendeie andũ asu mũno, ũu nĩwatumie maleana na ũsumbĩ wake. Andũ asu nĩmamũtwʼĩkĩthisye Yelovoamu mũsumbĩ wa mbaĩ ĩkũmi, na ũsumbĩ ũsu wesie kwambĩĩa kwĩtwa ũsumbĩ wa Isilaeli. Mbaĩ ila ingĩ ilĩ syesie kwambĩĩa kwĩtwa ũsumbĩ wa Yuta, na syaendeea kwĩthĩwa syĩ ndĩkĩĩku kwa Leovoamu. Na kwoou, mbaĩ 12 sya Isilaeli nĩsyaanĩkie.

Yelovoamu ndendaa andũ ala wasumbĩkĩte mathi kũthaithĩa Yelusaleme, nũndũ Yelusaleme yaĩ ũsumbĩnĩ wa Leovoamu. We nĩwĩsĩ nĩkĩ? Yelovoamu nĩwakĩaa ayona andũ asu ta matonya kũmũtia na kũkwata mbau Leovoamu. Kwoou aseũvya tũsaũ twĩlĩ twa thaavu na eea andũ make atĩĩ: ‘Yelusaleme nĩ vaasa mũno. Kwoou thaithĩaai vaa.’ Andũ asu nĩmambĩĩie kũthaitha tũsaũ tũu twa thaavu na moolwa nĩ Yeova ĩngĩ.