Ũsumbĩ wa mbaĩ ĩkũmi wa Isilaeli waĩ na asumbĩ aingĩ athũku, ĩndĩ Mũsumbĩ Aavu aĩ ũmwe katĩ wa asumbĩ ala meesĩkĩe athũku mũno ũsumbĩnĩ ũsu. Atwaĩte mũndũ mũka wathaithaa Mbaali na aĩ mũthũku mũno. Mũndũ mũka ũsu eetawa Yeseveli. Aavu na Yeseveli nĩmatumie Aisilaeli aingĩ mambĩĩa kũthaitha Mbaali, o na nĩmooaie athani aingĩ ma Yeova. We Yeova oosie ĩtambya yĩva? Nĩwatũmie mwathani Eliya kũla kwĩ Aavu.

Yĩla Eliya wavikie kwa Mũsumbĩ Aavu amwĩie kana nũndũ wa ũthũku wake, nthĩ ya Isilaeli kũikethĩwa na mbua. Nũndũ wa ũu vandũ va mbee wa myaka ĩtatũ vaiĩ kĩndũ kyaamea na ũu watuma andũ makwatwa nĩ yũa. Yeova nĩwesie kũmũtũma Eliya ĩngĩ kũla kwĩ Aavu. Mũsumbĩ Aavu eeie Eliya atĩĩ: ‘We wĩ mũndũ wa mana mũno! Nue ũetete mathĩna aa.’ Nake Eliya amũsũngĩa amwĩa: ‘Nyie tinyie nĩtumĩte kwĩthĩwa kũte mbua kana kwĩ mũnyao. Ninywʼĩ mũtumĩte mbua ĩtaua nũndũ wa kũthaitha Mbaali. Ekai twĩke ũndũ nĩ kana tũmanye Ngai ũla wa wʼo nũũ. Ũmbanyʼa Aisilaeli onthe vamwe na athani ma Mbaali Kĩĩmanĩ kya Kalimeli ĩũlũ.’

Andũ onthe nĩmoombanie kĩĩmanĩ. Nĩvo ĩndĩ Eliya weeie andũ asu atĩĩ: ‘Sũanĩai nesa na mũyĩka ũtwi ũla waĩle. Ethĩwa Yeova nĩwe Ngai wa wʼo, mũatĩĩei. Ĩndĩ ethĩwa Mbaali nĩwe Ngai wa wʼo mũatĩĩei. Nĩtũkwĩka ũndũ nĩ kana tũmanye Ngai ũla wa wʼo. Ekai athani 450 ma Mbaali maumye nthembo na maivoya ngai woo, nakwa nĩngumya nthembo na ndivoya Yeova. Ũla ũkũsũngĩa mboya kwa kũete mwaki, ũsu nĩwe Ngai wa wʼo.’ Andũ onthe nĩmeetĩkĩlile ũndũ ũsu.

Athani ma Mbaali nĩmaumisye nthembo. Na ĩndĩ mũthenya wʼonthe matindĩa kũvoya ngai woo makyasya: ‘Mbaali, tũsũngĩe!’ Ĩndĩ yĩla Mbaali waleile kũmasũngĩa, Eliya nĩwambĩĩe kũmũthekeea. Aisye-ĩ: ‘Mwĩtei na wasya wenyu wʼonthe. Nũtonya kwĩthĩwa akomete, na kwoou no nginya mũndũ amũaũkye.’ Nĩkwambĩĩie kũtuka, na athani ma Mbaali no maendeee kũmũvoya ate kũmasũngĩa.

Nĩvo ĩndĩ Eliya waetie nthembo yake kĩthembeonĩ na oosa kĩwʼũ kingĩ amĩtĩkĩsya yonthe. Amina kwĩka ũu amũvoyie Yeova akyasya: ‘Mwa Yeova, eka andũ aa mamanye kana nue Ngai wa wʼo.’ O ndatĩkanĩ ĩsu, Yeova atũma mwaki kuma ĩtunĩ na wavĩvya nthembo ĩsu. Andũ moona ũu maneenie na wasya mũnene masya: ‘Yeova nĩwe Ngai wa wʼo!’ Nake Eliya eea andũ atĩĩ: ‘Mũikaeke mwathani o na ũmwe wa Mbaali asembe athi!’ Mũthenya ũsu, athani 450 ma Mbaali nĩmooaiwe.

Ĩvinda ĩkuvĩ ĩtina wa maũndũ asu kwĩthĩwa, ve ĩtu yaumĩlile ngalĩko ĩla yaĩ ũkanga, na Eliya eea Aavu atĩĩ: ‘Nĩkũkua mbua mbingĩ. Lĩsa ĩkasyanĩ yaku na ũisemba wĩnũke.’ Yĩla ĩtu nĩyaendeeie kwĩthĩwa yĩ yiũ, na nzeve yambĩĩa kũuutana, na ĩndĩ mbua mbingĩ mũno yambĩĩa kua. Mbua ĩsu nĩyatumie mũnyao ũthela. Yĩla Aavu walĩsile ĩkasyanĩ yake ayĩsembethisye mũno vyũ. Ĩndĩ Yeova nĩwamũnengie Eliya vinya mwingĩ, na ũu watuma Eliya asemba mũno kũvĩtũka ĩkasya yĩu ya Aavu! Ĩndĩ mo mathĩna ma Eliya matheleile vau? Ekai twone.

Yeseveli nĩweewie ũndũ athani ma Mbaali mekaniwe namo, na athata mũno. Nĩvo ĩndĩ watũmanie ndeto ii ikatavwʼe Eliya: ‘Ũnĩ, o naku ũkeethĩwa wĩ mũkwʼũ ta athani ma Mbaali.’ Eliya nĩwatelemile mũno na asemba athi weũnĩ. E kũu weũnĩ avoyie asya: ‘Yeova ndyũmĩĩsya mbee wa vau. Eka nĩkwʼe.’ Na nũndũ Eliya nĩwanoete, nĩwekalile ungu wa mũtĩ na akoma.

Mũlaĩka nĩwamũamũkisye Eliya na aneena nake e mũuu amwĩa: ‘Ũkĩla ũye.’ Eliya nĩwoonie mũkate wilĩĩlwe mavianĩ mavyũ na sũva wa kĩwʼũ. Nĩwaĩe na anywʼa kĩwʼũ na asyoka akoma. Mũlaĩka nĩwamũamũkisye ĩngĩ na amwĩa: ‘Ya. Wĩ na kyalo kĩasa kwoou no nginya wĩthĩwe na vinya.’ Kwoou Eliya nĩwaĩe ĩngĩ. Na ĩndĩ athi kyalo mĩthenya 40, ũtukũ na mũthenya, nginya avika Kĩĩmanĩ kya Olevu. E kĩĩmanĩ kĩu, Eliya nĩwalikile ngunganĩ akome. Ĩndĩ Yeova aneena nake. Amwĩie atĩĩ: ‘Eliya wĩĩka ata vaa?’ Nake Eliya asũngĩa asya: ‘Aisilaeli nĩmaemetwe nĩ kwĩanĩsya ũndũ makwathie. Nĩmanangĩte ithembeo syaku na makoaa athani maku. Nayu o nakwa meenda kũmbũaa.’

Yeova amwĩie Eliya atĩĩ: ‘Enda ũkaũngame kĩĩmanĩ ĩũlũ.’ E vau nĩkwookie kĩuutani kĩnene vakuvĩ na ngunga ĩla waĩ anauma. Ĩtina wa ũu, nĩkwookie kĩthingitho kya nthĩ na kwasyoka kwooka mwaki. Mũthya, Eliya nĩweewie wasya mũnini mũuu. Nĩwavwʼĩkie ũthyũ wake na ngũa yake na aũngama nza wa ngunga. Na ĩndĩ Yeova nĩwamũkũlilye eĩsembete nĩkĩ. Nake Eliya asũngĩa asya: ‘No inyie nĩtiele nĩ nyioka.’ Ĩndĩ Yeova amwĩa: ‘Ndwĩ weka. Ve Aisilaeli angĩ 7,000 manthaithaa. Enda ũkanyuve Elisa atwʼĩke mwathani vandũ vaku.’ Vau kwa vau, Eliya nĩwaendie na eeka ũndũ Yeova wamwĩĩte. We wĩona Yeova no aũtetheesye weeka maũndũ ala wendaa wĩke? Ĩĩ, akaũtetheesya. Ekai twĩmanyĩsye ũndũ ũmwe weekĩkie ĩvindanĩ ya mũnyao.