Ĩvindanĩ yĩla kwaĩ mũnyao Isilaeli, Yeova amwĩie Eliya atĩĩ: ‘Enda ndũanĩ yĩtawa Nzalevathi. Nũũthi kwĩthĩa mũndũ mũka ndiwa na aikũnenga lĩu.’ Yĩla Eliya wavikie ndũanĩ ĩsu, nĩwoonie mũndũ mũka ndiwa na ngya ayuna ngũ. Nĩwamwĩtisye kĩwʼũ kya ũnywʼa. Mũndũ mũka ũsu aendete kũete kĩwʼũ, Eliya amwĩie atĩĩ: ‘Nĩngũkwĩsũva ũndetee kalungu ka mũkate.’ Ĩndĩ mũndũ mũka ũsu ndiwa amwĩie Eliya atĩĩ: ‘Ndi na mũkate ndonya kũkũetee. Nĩ na kamũtu na tũuta twĩanĩtye kũua kalĩu kanini, kakwa na mwanawa.’ Nake Eliya amwĩa: ‘Yeova anambĩie kana wanzeũvĩsya kamũkate, kamũtu kau na tũuta tũikathela nginya yĩla kũkaua ĩngĩ.’

Kwoou mũndũ mũka ũsu ndiwa nĩwaendie nyũmba na aseũvĩsya mwathani wa Yeova kamũkate. O tondũ Yeova waĩtye, mũndũ mũka ũsu ndiwa na kamwana kake mayaathelelwa nĩ lĩu ĩvindanĩ yĩu kwaĩ mũnyao. Syĩndũ ila weekĩaa mũtu na mauta syekalaa syusĩe.

Ĩtina wa ĩvinda, ve ũndũ wa kũtelemya mũno weethĩiwe. Kamwana ka mũndũ mũka ũsu ndiwa nĩkawaie mũno na kakwʼa. Mũndũ mũka ũsu nĩwamwĩsũvie Eliya amũtetheesye. Eliya nĩwoosie kamwana kau akakua na akatwaa nyũmbanĩ ya ĩũlũ. Nĩwakailĩĩile kĩtandanĩ na avoya ayasya: ‘Yeova, nĩngũkwĩsũva ũthayũũkye kamwana kaa.’ Nĩwĩsĩ nĩkĩ ũsu waĩ ũndũ wa mwanya mũno kwa Yeova kwĩka? Nũndũ o tondũ twĩsĩ, vaiĩ mũndũ waĩ aathayũũkwʼa mbeenĩ. Na o na mũndũ mũka ũsu ndiwa na kamwana kake mayaĩ Aisilaeli.

Ĩndĩ o na ũu wĩ o vo, Yeova nĩwathayũũkisye kamwana kau! Eliya eeie mũndũ mũka ũsu ndiwa atĩĩ: ‘Sisya! Kamwana kaku ke thayũ.’ Mũndũ mũka ũsu nĩwatanie mũno na amwĩa Eliya atĩĩ: ‘Kwa wʼo wĩ mũndũ wa Ngai. Ũu nĩ wʼo nũndũ ũneenaa kĩla Yeova waũtavya.’

Mũsumbĩ Aavu, e nyũmbanĩ yake ya kĩ-ũsumbĩ ĩla yaĩ Yesileeli, aĩ atonya kũsyaĩlya ndĩlĩsyanĩ na ayona mũũnda wa mĩsavivũ wa mũndũũme weetawa Navothi. Aavu nĩwendaa mũũnda ũsu wa mĩsavivũ na nĩwatatie kũũthooa kuma kwa Navothi. Ĩndĩ Navothi nĩwaleile kũmũthooesya nũndũ kwosana na Mĩao ya Yeova mũndũ ndaaĩle kũthoosya mũũnda wake wa ũtiĩwa. We Aavu nĩwanengie ndaĩa ũtwi wa Navothi wa kwĩka kĩla kyaĩlĩte? Aiee. Vandũ va ũu, Aavu nĩwathatie mũno. Athatĩte ũkethĩa ndatonya kuma nyũmbanĩ yake ya kũkoma, o na nĩwaleile kũya.

Yeseveli, kĩla kĩveti kĩthũku mũno kya Mũsumbĩ Aavu, kyamwĩie atĩĩ: ‘Nue mũsumbĩ wa Isilaeli. No ũkwate syĩndũ syonthe ila ũkwenda. Nĩngũkwosea mũũnda ũsu.’ Ĩtina wa ũu Yeseveli nĩwaandĩkĩie atumĩa ma ndũa valũa amatavĩtye mamwilĩĩle Navothi ũvũngũ masye kana nũmũumĩte Ngai, na maimũkimanga na mavia mamũae. Atumĩa asu nĩmeekie ũndũ Yeseveli wamatavisye, na ĩndĩ Yeseveli amwĩa Aavu: ‘Navothi nĩ mũkwʼũ. Yu ũla mũũnda wa mĩsavivũ nĩ waku.’

Navothi tiwe mũndũ ũla ũtaĩ na mavĩtyo e weka wooaiwe nĩ Yeseveli. Yeseveli ooaĩte andũ aingĩ mũno ala mamwendete Yeova. Athaithaa ngai sya mĩvwʼanano, na nĩweekaa maũndũ angĩ maingĩ mathũku. Yeova nĩweene maũndũ onthe mathũku ala Yeseveli weekaa. We esaa kwĩkana na Yeseveli ata?

Yĩla Aavu wakwie, mwana wake weetawa Yeolamu nĩwatwʼĩkie mũsumbĩ. Yeova nĩwatũmie mũndũũme weetawa Yeu akamwosee ĩtambya Yeseveli na mũsyĩ wake.

Yeu nĩwalĩsile ĩkasya yake na athi Yesileeli kũla Yeseveli wekalaa. Yeolamu nĩwookie na ĩkasya akomana na Yeu na amũkũlya: ‘Mũkĩte na mũuo?’ Nake Yeu amwĩa: ‘Kũyĩsa kwĩthĩwa na mũuo inyia waku, Yeseveli, ayĩka maũndũ mathũku.’ Yeolamu nĩwatatie kũvĩndũa ĩkasya yake nĩ kana asembe. Ĩndĩ Yeu nĩwamũathie na ĩangi, na Yeolamu akwʼa.

Ĩtina wa ũu, Yeu nĩwaendie nyũmbanĩ ya kĩ-ũsumbĩ ya Yeseveli. Yĩla Yeseveli weewie kana Yeu nĩwũkĩte nĩweeyanakavisye, aseũvya nzwʼĩĩ yake, na ĩndĩ ekala ndĩlĩsyanĩ ya nyũmba ya ĩũlũ amweteele. Yĩla Yeu wavikie, Yeseveli nĩwamũkethisye na ũngʼendu. Yeu nĩwaneenie na wasya mũnene eea athũkũmi ma Yeseveli ala maũngye vakuvĩ nake atĩĩ: “Mwĩkyei nthĩ.” Nĩmamũluutile Yeseveli e vau ndĩlĩsyanĩ na avalũka nthĩ akwʼa.

Ĩtina wa ũu, Yeu nĩwooaie ana 70 ma Aavu na ĩndĩ athesya nthĩ kwa kũvetanga ũthaithi wa Mbaali. We nĩwoona kana Yeova nĩwĩthĩawa esĩ maũndũ onthe na kana ĩvinda yĩla yaĩle yavika nũsilĩlaa ala mekaa maũndũ mathũku?