“Nĩkaa Kĩla Ndonya”

Mwĩĩtu-a-asa wĩtawa Irma ekalaa Germany, na angĩe myaka 90. Navu ĩtina nĩwavalũkile kelĩ aũmĩa mũno, na nũthĩnzĩtwe mavinda meana ũna. Nũndũ wa ũu, ndatonya kũtavanyʼa nyũmba kwa nyũmba ta tene. Irma nĩwandĩkĩaa andũ valũa nĩ kana amekĩe vinya na aimakiakisya. Mavinda maingĩ valũa isu imatanasya mũno nginya makamũkũnĩa simũ mayenda kũmanya mekwata valũa ũngĩ ĩndĩĩ. O na andũ aingĩ nĩmamũandĩkĩaa mamũtũngĩe mũvea na mamũkũlĩtye amaandĩkĩe valũa ũngĩ. Irma easya: “Kĩu kĩtumaa nĩtana mũno na kĩnengae vinya wa kũendeea kũtavanyʼa.”

Andũ angĩ Irma ũtũmĩaa valũa nĩ ala mekalaa kũla kũsũvĩĩawa akũũ. Aĩtye ũũ: “Kĩveti kĩmwe kĩkũũ kyangũnĩie simũ kyambĩa kana valũa wakwa nĩwakĩkiakiisye mũno nũndũ kyaĩ kĩnakwʼĩĩwa nĩ mũũme. Kyaisye kyaiie valũa ũsu Mbivilianĩ yakyo, na kĩkothaa kũũsoma ĩ ya wĩoo. Kĩveti kĩngĩ o nakyo kĩla mũũme wakwie kyambĩie kana valũa wakwa wakĩtetheeisye mũno o na kwĩ ũndũ kyatethiwʼe nĩ ũtavanyʼa wa mũthembi woo. Kyaĩ na makũlyo maingĩ mũno, na kwoou kyangũlilye kana no kyũke kwakwa.”

Ve na mũnyanya ũngĩ wa Irma ũte Ngũsĩ wathamie athi kĩsionĩ kĩngĩ kĩ vaasa. Akũlilye Irma amũandĩkĩe valũa. Irma easya: “Kĩveti kĩu kyaiie valũa syakwa syonthe. Kyakwʼa, mwĩĩtu wakyo nĩwangũnĩie simũ. Ambĩie nũsomete valũa syonthe ila naandĩkĩa inyia, na ambĩsũva nĩmũtũmĩe valũa ineeneete maũndũ ma Mbivilia.”

Irma nũtanĩaa kũtavanyʼa mũno. Easya atĩĩ: “Nĩmwĩkaĩlaa Yeova aendeee kũnenga vinya wa kũmũthũkũma. O na kau nditonya kũthi nyũmba kwa nyũmba ta tene, nĩkaa kĩla ndonya.”