Maũngamie Nzĩanĩ Mandetheesye

Mũthenya ũmwe kwaĩ mbevo mbingĩ na kĩseve kĩsionĩ kya Alberta, Canada, mũndũũme wĩtawa Bob akililye atwaĩte ngalĩ kĩlomita 100 kwa ĩsaa, kũũ kũmwe kwa ĩtina kwa ngalĩ yake kwatũĩka. Mbeenĩ Bob ndamanyaa nĩkyaũ kyeekĩkie na kwoou we aendeea na savalĩ nũndũ atielye o kĩlomita itano avike kwake.

Ĩtina nĩwesie kũandĩkĩa kĩkundi kya Ngũsĩ sya Yeova kĩla kĩ kĩsionĩ kĩu valũa aeleetye kĩla kyeekĩkie mũthenya ũsu. Aisye atĩĩ: “Nakililye o nĩendeee kũtwaa ngalĩ yĩilyĩ oou, noona ngalĩ ĩngĩ yaĩ na andũ ma mũika yathengeea vakuvĩ mũno, matheeisye kĩoo na ĩndĩ mambĩa nĩũngame kũũ kwa ĩtina kwa ngalĩ yakwa nĩkũtũĩkie. Ithyonthe twaũngamisye ngalĩ ũtee wa lelũ na masya nĩmeũndũngĩĩa kũũ kũu. Nyie ndyeesĩ kana nĩ na kũũ kũngĩ kwa ngalĩ kũtonya kũtũmĩwa. O na ndyeesĩ kana nĩna kala kamasinĩ kokĩlasya ngalĩ ĩitũngĩĩwa kũũ. Ĩndĩ nĩilyĩ kakalĩnĩ kakwa ka kũsukumwa ũtee wa lelũ, noonie malika ungu wa ngalĩ yakwa na meethĩa kũũ kũngĩ na kamasinĩ kau vau, na ĩndĩ mavĩndũa kũla kwatũĩkĩte. Mũthenya ũsu kwaĩ mbevo mbingĩ mũno ũkethĩa o na kwĩ na ĩa. Andũ asu ma mũika meekĩĩte ngũa ntheu na maĩ anake mũno, ĩndĩ o na vailyĩ ũu, nĩmatethisye wĩa ũsu na nyie naendeea na savalĩ. Mwa ndyaĩ nĩtonya kwĩvĩndũĩa kũũ kũu ndatetheewʼe nĩ mũndũ.

“Nĩtũngĩa mũvea syana isu Ngũsĩ nũndũ wa kũndetheesya. Mũthenya ũsu maĩ kĩsionĩ kĩu na maendaa mĩsyĩ kwa andũ maitavanyʼa. Syana isu iyĩkaa kĩvathũkanyʼo na maũndũ ala itavanasya. Kũneena ũla wʼo, syambumisye thĩnanĩ mũnene ndaĩ nĩtonya kwĩyumya na nĩnĩtũngaa mũvea nũndũ wa ũu. Ndyasũanĩaa kana no ngomane nzĩanĩ na andũ ma mũika maseũvĩte ũu mũthenya ũsu.”