Mĩvango ya Kũũtetheesya Kũsoma Mbivilia

Vai ĩvuku yĩ ũtao mũseo ta Mbivilia. Osa ĩvinda kĩla mũthenya ũmĩsome na ũivindĩĩsya kĩla wasoma, na ĩndĩ ũiatĩĩa ũtao ũla wakwata. “Nĩvo ĩndĩ wĩaĩlya nzĩa yaku.” (Yosua 1:8; Savuli 1:1-3) O na ũkamũmanya Ngai na Mwana wake, Yesũ. Kũmamanya kũkaũtetheesya kũkwata ũtangĩĩo.—Yoana 17:3.

Waĩle kũatĩĩa mũvango wĩva yĩla ũũsoma Mbivilia? Ve mĩvango mingĩ ũtonya kũatĩĩa. Mũvango ũũ wĩ vaa wĩ na nzĩa ilĩ. Mbee, mavuku mavangĩtwe o ũndũ maatĩanĩe Mbivilianĩ, na kwoou no ũmasome maatĩanĩe oou. Kelĩ, ve na ikundi syĩ kĩvathũkanyʼo syonanĩtwʼe, na kwoou no ũtwʼe kũnyuva kĩkundi kĩla ũkwenda kwamba kũsoma. Kwa ngelekanyʼo, no ũtwʼe kũsoma ilungu ila wonetwʼe syĩ na ngewa ya Ngai na Aisilaeli. Kana ũkanyuva kũsoma ila ieleetye ũndũ kĩkundi kya Kĩklĩsto kyambĩĩiwʼe na kyeana. Kĩla mũthenya wasoma ilungu ila ũnengetwe sya mũthenya ũsu, mwaka ũithela nũũmina Mbivilia.

Waatĩĩa mũvango ũũ nũũtetheka, wĩthĩwe wĩmanthaa mũvango wonanĩtye ilungu sya kĩla mũthenya, mũvango wa mwaka ũmwe, kana mũvango wĩ laisi vyũ ũtonya kũatĩĩwa nĩ mũndũ ũkwambĩĩa kũsoma Mbivilia ya mbee. Umya mũvango wa kũũtetheesya kũsoma Mbivilia ũla wĩ vaa, na ũyambĩĩa kũũatĩĩa ũmũnthĩ.