Kĩkonde kya Kũsengyʼa kya Sea Cucumber

Ve nyamũ syĩtawa sea cucumber syĩkalaa nthĩ wa ũkanga na syĩndũnĩ ingĩ syĩthĩawa ũkanganĩ. Kĩkonde kyasyo kĩthĩawa na makũndũ na syĩndũ iilye mĩwʼa. Ũndũ wa kwendeesya nĩ kana, syĩthĩawa na ũtonyi wa kwĩyololosya ikekala ta ikwĩtĩka, kana ikoma vyũ ta kĩtingʼĩ ĩtina wa ndatĩka mbũthũ kana o sekendi siana ũna. Ũtonyi ũsu wa kwĩyololosya ũitetheeasya kũlika tũmyanyanĩ tũtheke, na ĩndĩ iyĩyũmĩthya vyũ. Syeeka ũu, nyamũ ila ikũisyĩma iitonya kũsyosa vala syalika. Kĩla kĩitetheeasya kwĩka ũu nĩ kĩkonde kyasyo kya kũsengyʼa.

Kwasũanĩa ũndũ ũũ: Kĩkonde kya sea cucumber kĩ ũtonyi wa kwĩvĩndũa kĩkethĩwa mĩthemba ĩtatũ. No kyũme vyũ, kĩkololoa vanini, kana kĩkololoa vyũ. Kyololoaa yĩla syĩndũ iilye ndii syĩtawa fibres ila syĩ kĩkondenĩ syalekanyʼa, na kyũmaa yĩla fibres isu syakwatana. Nĩ kana fibres isu ilekanyʼe kana ikwatane, nyamũ ĩsu ĩtũmĩaa twĩndũ twĩ kĩvathũkanyʼo twĩtawa proteins.

Yĩla syatũmĩa protein ya kũkwatanyʼa fibres, kĩu kĩtumaa kĩkonde kyũma vyũ. Na yĩla syatũmĩa protein ya kũlekanyʼa fibres, kĩu kĩtumaa kĩkonde kyololoa. Kĩkonde kya sea cucumber no kyololoe vyũ nginya ũkethĩa kĩilye ta kĩkwĩtĩka.

Andũ ma saenzi nĩmaendeee kũtata kũseũvya syĩndũ syĩ na ũtonyi ta wa kĩkonde kya sea cucumber. Ũndũ ũmwe mavangĩte nĩ kũseũvya electrodes sya kũtũmĩa yĩla mũndũ ũkũthĩnzwa wʼongo. Meenda kũseũvya electrodes mbũmũ vyũ nginya wĩthĩe no ilikwʼe vala mekwenda wʼongonĩ, na ũyĩthĩa ĩtina wa ĩvinda no syĩyololosye. Ethĩwa electrodes isu ikeethĩwa itonya kwĩvĩndũa kwa nzĩa ĩsu, nĩvatonyeka ũiiti ũsu ũkethĩawa ũte na mathĩna.

We wĩona ata? Kĩkonde kya kũsengyʼa kya sea cucumber kyeekie kwĩyumĩlya? Kana kyeekie kũmbwa?