Mũndũ Mũka Mũklĩsto Aĩle Kwĩvwʼĩka Mũtwe Ĩndĩĩ na Nĩkĩ?

Nĩ ĩndĩĩ, na nĩkĩ mũndũ mũka Mũklĩsto waĩle kwĩvwʼĩka mũtwe maũndũnĩ makonetye ũthaithi? Ekai twone ũndũ mũtũmwa Vaulo watongoewʼe nĩ veva wa Ngai kũandĩka ĩũlũ wa ũndũ ũsu. Mũtũmwa ũsu nũtũnengete myolooto ĩla twaĩle kũatĩĩa nĩ kana twĩke motwi maseo ala mamũeteae Ngai ndaĩa. (1 Akolintho 11:3-16) Vaulo awetete maũndũ elĩ maĩle kũsũanĩĩwa, namo nĩ: ĩla mũndũ mũka Mũklĩsto waĩle kwĩvwʼĩka mũtwe, na: itumi sya kũatĩĩa mwolooto ũsu.

Ĩla mũndũ mũka Mũklĩsto waĩle kwĩvwʼĩka mũtwe. Vaulo awetete kana mũndũ mũka aĩle kwĩvwʼĩka mũtwe ĩla ũkwĩka maũndũ ta kũvoya, kana kwathana. (Mũsoa wa 4, 5) Kũvoya nĩ nzĩa ya kũneena na Yeova kwa kĩkĩo na ndaĩa. Ũmũnthĩ, ĩla Mũklĩsto ũkũmanyĩsya kuma Mbivilianĩ, ĩsu yĩthĩawa ne nzĩa ya kwathana. Syo ndeto isu sya Vaulo syĩonanyʼa kana mũndũ mũka aĩle kũvwʼĩka mũtwe wake mavinda onthe ĩla ũkũvoya kana ũkũmanyĩsya ũwʼo wa Mbivilia? Aiee. Ĩndĩ ve mavinda amwe waĩle kũvwʼĩka mũtwe.

Mavinda asu mũndũ mũka waĩle kũvwʼĩka mũtwe nĩ ĩla ũkwĩanĩsya ianda imwe nthĩnĩ wa mũsyĩ kana kĩkundinĩ. Vaulo aĩtye atĩĩ: “Mũtwe wa mũndũ mũka nĩ mũũme . . . Kĩla mũndũ mũka aivoya aiathana atevwʼĩkĩte mũtwe wake nũsonokasya mũtwe wake.” (Mũsoa wa 3, 5) Nthĩnĩ wa mũsyĩ, Yeova aiĩte mũndũũme ethĩwe e mũtwe wa kĩveti. Kĩveti kĩu kĩkalea kũnenga ndaĩa ũkũmũ wa mũũme ĩla kĩkwĩanĩsya imwe sya ianda ila Yeova ũmũnengete, kĩthĩwa kĩimwĩkĩĩthya mũũme aivũ. Kwa ngelekanyʼo, kĩkalasimĩka kũmanyĩsya mũndũ Mbivilia mũũme wakyo e vo, kĩveti kyu kyaĩle kũũnenga ndaĩa ũkũmũ wa mũũme kwa kwĩvwʼĩka mũtwe. Kyaĩle kwĩka ũu o na ethĩwa mũũme nĩ mũvatise kana ti mũvatise, kĩtumi nũndũ nĩwe mũtwe wa mũsyĩ.a O na ĩngĩ, ĩla kĩũvoya kana kĩũmanyĩsya, na ve mwanake wakyo mũnini mũvatise, nĩkyaĩle kwĩvwʼĩka mũtwe, ti atĩ nũndũ mwanake ũsu nĩwe mũtwe wa mũsyĩ, ĩndĩ nũndũ wa kĩanda kĩla kĩnengetwe aũme avatise kĩkundinĩ kya Kĩklĩsto.

Nao ĩũlũ wa mũndũ mũka kwĩvwʼĩka mũtwe ĩla ũkwĩanĩsya ianda imwe kĩkundinĩ, Vaulo aĩtye ũũ: “Ethĩwa mũndũ o na wĩva ailyĩ ta wĩ na ngananĩo, ithyĩ tũti na ũndũ ũsu, o na makanisa ma Ngai.” (Mũsoa wa 16) Nthĩnĩ wa kĩkundi kya Kĩklĩsto, kĩanda kya kũtongoesya maũndũ kĩnengetwe aũme ala avatise. (1 Timotheo 2:11-14; Aevelania 13:17) Aũme oka nomo manyuvawa methĩwe atumĩa na atetheesya ma kĩkundi, na Ngai nũmanengete kĩanda kya kũsũvĩa ĩĩthya yake. (Meko ma Atũmwa 20:28) Ĩndĩ mavinda amwe, no vaumĩle ũndũ ũtonya kũtuma mũndũ mũka Mũklĩsto alasimĩka kwĩka ũndũ mũna waĩle kwĩkwa nĩ mũndũũme mũvatise na waĩlĩte. Kwa ngelekanyʼo, mũndũ mũka no alasimĩke kũtongoesya ũmbano wa ũtavanyʼa ethĩwa vai mũndũũme mũvatise na waĩlĩte. Kana akavanga kũthokya mũndũũme mũvatise ĩla ũkwĩmanyĩsya Mbivilia na mũndũ mũna.b Nũndũ vai nzika kana maũndũ asu elĩ nĩ kĩlungu kya wĩa wa kũmanyĩsya nthĩnĩ wa kĩkundi kya Kĩklĩsto, mũndũ mũka ũsu nĩwaĩle kwĩvwʼĩka mũtwe nĩ kenda onanyʼe kana eĩka ũndũ waĩle kwĩkwa nĩ mũndũũme mũvatise.

O na ũu wĩ o vo, ti maũndũnĩ onthe makonetye ũthaithi mũndũ mũka Mũklĩsto waĩle kwĩvwʼĩka mũtwe. Kwa ngelekanyʼo, ti lasima evwʼĩke mũtwe ĩla ũkumya maelesyo ũmbanonĩ, kana ĩla ũkũtavanyʼa nyũmba na nyũmba e na mũũme wake kana mũndũũme ũngĩ mũvatise. O na ĩngĩ, ti lasima eke ũu ĩla ũkũmanyĩsya, kana ũkũvoya e na syana syake itembatise. Vate nzika makũlyo mana nĩmatonya kumĩla, na ethĩwa mwĩĩtu-a-asa ndesĩ ũndũ ũsu nesa, no eke ũkunĩkĩli.c Ĩndĩ ethĩwa ndaneanĩwa ĩtina wa kwĩka ũkunĩkĩli ũsu, kana ethĩwa wasya wake wa ngoo nũũmũsukuma evwʼĩke mũtwe, ti ũthũku kwĩka ũu o tondũ tũkwona visanĩ ũũ.

Itumi. Nthĩnĩ wa mũsoa wa 10, ve itumi ilĩ ila itumaa mũndũ mũka Mũklĩsto evwʼĩka mũtwe. Mũsoa ũsu waĩtye, “Mũndũ mũka ethĩwe na wonanʼyo wa wĩnyivyo wake mũtwenĩ wake, nũndũ wa alaĩka.” Kĩtumi kya mbee kĩ ndetonĩ ii: “Wonanʼyo wa wĩnyivyo.” Ĩla mũndũ mũka weevwʼĩka mũtwe, ethĩawa ayonanyʼa kana nũkwĩnyivĩsya ũkũmũ ũla Yeova ũnengete aũme ala avatise kĩkundinĩ. Kwoou, kwa nzĩa ĩsu ayonanyʼa kana nũmwendete Yeova Ngai, na nĩ mũĩkĩĩku kwake. Kĩtumi kya kelĩ kĩ nthĩnĩ wa ndeto ii: “Nũndũ wa alaĩka.” Kwĩvwʼĩka mũtwe kwa mũndũ mũka kũkonanĩtye ata na syũmbe isu sya veva, na syĩ vinya?

Alaĩka nĩmendeeawʼa nĩ kwona ũkũmũ wa Yeova ũinewa ndaĩa ũseũvyonĩ wake wʼonthe, kũũ nthĩ na ĩtunĩ. O na ĩngĩ, nĩmatethekaa ĩla moona andũ ene naĩ mayĩnyivĩsya mũvango wa Yeova. Alaĩka o namo nĩmesĩ kana nĩmaĩle kwĩnyivĩsya mũvango wa Yeova o na kau ve amwe moo maemiwe nĩ kwĩka ũu ĩvinda ya tene. (Yuta 6) Mavinda amwe no mone mũndũ mũka Mũklĩsto wĩ na ũmanyi na ũĩ mwingangĩ kwĩ mwana-a-asa mũna mũvatise kĩkundinĩ; ĩndĩ ũyĩthĩa mũndũ mũka ũsu nĩwĩnyivĩasya kwa ngenda ũkũmũ wa mwana-a-asa ũsu. Mavinda angĩ mũndũ mũka ũsu no ethĩwe e ũmwe wa ala mesumbĩka na Klĩsto ĩtunĩ, na nũndũ wa ũu akeethĩwa na kĩvĩla kĩnenange o na kwĩ kĩla alaĩka me nakyo. Ĩla mũndũ mũka weenyivya, ethĩawa ayiĩa alaĩka ngelekanyʼo nzeo mũno vyũ. Eĩtu-a-asa methĩawa na mwanya mũseo ta kĩ wa kwonanyʼa mbee wa alaĩka aĩkĩĩku milioni mbingĩ kana nĩmamwĩwʼaa Ngai me na wĩnyivyo, na me aĩkĩĩku!