Mavisa ma Ũlaalai no Manange Mũtwaano Wenyu

Mũka nĩwamanyie maũndũ ala mũũme weekaa kĩmbithĩnĩ. Mũũme nĩweetisye ũekeo kuma ngoonĩ ĩngĩ na ĩngĩ. Amwathie nũkũekana na ũndũ ũsu, na nĩweekie ũu, ĩndĩ o kwa kavinda. Nĩwaũsyokeie, na eethĩwa na kĩmanyĩo kya kwĩtasya ũekeo o yĩla wamanyĩka.

We nĩwĩthĩwa ũkwatĩtwe nĩ ũndũ ta ũsu? Ethĩwa nĩwʼo, nĩwaĩle kũmanya ũndũ kĩmanyĩo kya kwĩloela mavisa ma ũlaalai kĩtonya kwĩthĩwa kĩyĩũmĩsya ũla ũtwaanĩte nake, na ũndũ ũtonya kwĩka ũekane nakyo, ũtakakĩsyokea.a

Kĩlungunĩ kĩĩ

• Kĩla waĩle kũmanya

• Ũndũ ũtonya kwĩka

• Ethĩwa mũũme waku nĩwĩloelaa mavisa ma ũlaalai

Kĩla waĩle kũmanya

Kwĩloela mavisa ma ũlaalai no kwanange mũtwaano. Kũtumaa ũla ũvĩtĩwʼe aia ũthatu ngoonĩ, na aieka ũkũĩkĩĩa.b

Mũndũ mũka ũla mũũme wĩloelaa mavisa ma ũlaalai no athĩnĩke nũndũ wa maũndũ aa maatĩĩe:

• Kwĩwʼa mũũme anamũvũnyanĩie. Mũndũ mũka wĩtawa Sarah aĩtye, “Neewʼaa mũemewa ta wĩthĩĩtwe ayĩka ũlaalai.”

• Kwĩwʼa ta ve kĩndũ ũkosete. Mũndũ mũka ũmwe aĩtye kana kĩmanyĩo kya mũũme kya kwĩloela mavisa ma ũlaalai kyatumaa ewʼa “ate wa kwendeesya na e na nthoni mbingĩ.”

• Kwĩwʼa atatonya kũmũĩkĩĩa. Mũndũ mũka wĩtawa Helen aĩtye, “Nyie ndiĩkĩĩaa o na vanini kyonthe kĩla mũemewa wĩkaa.”

• Kwĩwʼa emakĩĩte. Mũndũ mũka wĩtawa Catherine aĩtye, “Kwĩmakĩa nũndũ wa kĩmanyĩo kya mũemewa kwatumaa nĩthĩnĩka mũno.”

Sũanĩa ũndũ ũũ: Mbivilia yaĩtye kana mũndũũme nĩwaĩlĩte kwenda kĩveti kyake. (Aeveso 5:25) We nĩwendete mũka ethĩwa atumaa athĩnĩka nũndũ wa maũndũ ala mawetwa vau ĩũlũ?

Ũndũ ũtonya kwĩka

Ti laisi kũeka kĩmanyĩo kya kwĩloela mavisa ma ũlaalai. Mũndũ mũka wĩtawa Stacey aĩtye, “Mũemewa nĩwaekie kũnywʼa sikala, vangi, na ũkĩ, ĩndĩ no ũngʼangʼanaa aekane na kĩmanyĩo kya kwĩloela mavisa ma ũlaalai.”

Ethĩwa nũkwatĩtwe nĩ thĩna ũsu, maũndũ aa maatĩĩe no maũtetheesye ũkaeka kĩmanyĩo kĩu, ũtakakĩsyokea.

• Elewa nĩkĩ nĩ ũthũku kwĩloela mavisa ma ũlaalai. Kwĩloela mavisa ma ũlaalai kũtumaa mũndũ eyenda, na kĩu kĩyananga maũndũ ala matumaa mũtwaano wĩthĩwa na ũtanu, ta wendo, kũĩkĩĩana, na kũlũmanyʼa. O na ĩngĩ kwonanasya kana mũndũ ndanengete ndaĩa Mwambĩlĩĩlya wa mũtwaano, Yeova Ngai.

  Mwolooto wĩ Mbivilianĩ: “Mũtwaano nũnengwe ndaĩa.”—Aevelania 13:4.

• Ĩtĩkĩla mathĩna ala matonya kumĩla nũndũ wa meko maku. Ndũkasye, ‘Keka mũka wakwa nũmbendete mũno, ndyĩthĩwa nĩloelaa mavisa ma ũlaalai.’ Ti ũseo kũtũla mũkau mũtĩ nũndũ wa mavĩtyo maku, nũndũ kwĩka ũu nĩkũtonya kũũnenga mwanya wa kwĩloelaa mavisa ma ũlaalai yĩla waũtũla ngoo.

  Mwolooto wĩ Mbivilianĩ: “Kĩla mũndũ atatawa kwa kũkuswʼa na kũkengwa nĩ ĩtomo yake mwene.”—Yakovo 1:14.

• Eaa ngewa na ũla ũtwaanĩte nake ũteũmũvitha kĩndũ. Mũndũũme wĩtawa Kevin aĩtye atĩĩ: “Nĩeaa ngewa na mũka wakwa kĩla mũthenya. Nĩnĩmũeleasya ethĩwa nĩnĩsyaisye kana ndinasisya visa itaĩlĩte. Kũea ngewa kwa nzĩa ĩsu kũtumaa amanya kana vai maũndũ nĩkaa nĩvithĩte.”

  Mwolooto wĩ Mbivilianĩ: “Twĩenda kwĩthĩwa twĩ aĩkĩĩku maũndũnĩ onthe.”—Aevelania 13:18.

• Ĩkalaa wĩ metho. O na ethĩwa mũndũ nĩwaekie kĩmanyĩo kya kwĩloela mavisa ma ũlaalai, no akĩsyokee ĩtina wa myaka mingĩ. Kevin, ũla twĩĩ tũnamũweta, aĩtye: “Nĩnakĩlilye vinya kĩmanyĩo kya kwĩloela mavisa ma ũlaalai kwa myaka ĩkũmi, na nĩneeyĩkĩĩthĩtye vyũ kana thĩna ũsu waĩ wathelile. Ĩndĩ kĩmanyĩo kĩu kyeekĩte o kũmandĩka, kyeteelete ĩvinda yĩla yaĩlĩte vyũ kĩngwatye ĩngĩ.”

  Mwolooto wĩ Mbivilianĩ: “Ekai ũla ũkũsũanĩa ta ũũngamĩte, ethĩwe e metho ndakese kũvalũka.”—1 Akolintho 10:12.

• Yĩla watatwa, amba kweteela. O na kau no wĩthĩwe ũtatonya kũsiĩĩa wendi mũthũku, no ũtwʼe ethĩwa nũkwĩka kwosana na wendi ũsu, kana ndwĩĩka kwosana nawʼo. Nĩvatonyeka wendi ũsu ũkathela na mĩtũkĩ weemanyĩsya kũtũngaa kĩlĩko kyaku maũndũnĩ angĩ.

  Mwolooto wĩ Mbivilianĩ: “Kĩla ũmwe wenyu nĩwaĩle kũmanya ũndũ ũtonya kũsiĩĩa mwĩĩ wake mwene nĩ kana ekale e mũtheu na e na ndaĩa, ate na ĩtomo, mĩmeo ĩtasiĩĩka ya kũmanyana kĩ-mwĩĩ.”—1 Athesalonika 4:4, 5.

• Ĩvathane na maũndũ ala matonya kũtuma wambĩĩa kwĩloela mavisa ma ũlaalai ĩngĩ. Ĩvuku Willpower’s Not Enough yaĩtye, “Yĩla wesa kwĩyĩthĩĩla ũndũnĩ mũna ũtonya kũũlikya mũisyonĩ, wĩthĩaa nĩ ta wakũna mũsyĩ wa kĩlĩvĩtĩ. No tũluta tũnini twendekaa . . . nĩ kana wakanyʼe mwaki.”

  Mwolooto wĩ Mbivilianĩ: “Ndũkaeke ũthũku o na wĩva ũnzumbĩke.”—Savuli 119:133.

• Ndũkakwʼe ngoo. Nĩvavĩtaa ĩvinda yĩasa, o na myaka mingĩ, ũla ũtwaanĩte nake aikaaĩsa ũkũĩkĩĩa ĩngĩ. Ĩndĩ andũ aingĩ ala me mũtwaanonĩ nĩmavotete kwĩka ũu.

  Mwolooto wĩ Mbivilianĩ: “Wendo nĩweteelaa.”—1 Akolintho 13:4.