Nĩ Kana Ũendeee Kwĩthĩwa na Mũnyanya, No Nginya O Naku Mwene Wĩthĩwe Mũnyanya

Ũnyanya wĩthĩawa na mũsingi wa wendo. O ũndũ ũkaendeea kwĩmanyĩsya maũndũ maingangĩ ĩũlũ wa Yeova, nowʼo wendo waku kwake ũkaneneveea. O ũndũ wendo waku kwa Ngai ũendeee kwĩana, nowʼo wendi waku wa kũmũthũkũma ũkeana. Ũndũ ũsu ũkaũkusya wĩthĩwe mũmanyĩwʼa wa Yesũ Klĩsto. (Mathayo 28:19) Kwa kwĩkwatanʼya na mũsyĩ mũtanu wa Ngũsĩ sya Yeova, nũtonya kũtanĩa ũnyanya wa Ngai tene na tene. Kwoou no nginya wĩke ata?

No nginya wonanʼye wendo waku kwa Ngai kwa kwĩwʼa mĩao yake. “Kũmwenda Ngai nĩ kũũ, tũkwatae mĩao yake: na mĩao yake ti mĩito.”—1 Yoana 5:3.

Tũmĩa maũndũ ala ũkwĩmanyĩsya. Yesũ nĩwaeie ngewa ĩmwe ĩla ĩelekanasya ũndũ ũũ. Mũndũũme ũmwe mũĩ nĩwaakie nyũmba yake ĩũlũ wa ĩvia. Mũndũũme mũtumanu aaka nyũmba yake ĩũlũ wa kĩthangathĩ. Yĩla mbua yookie na kĩtuumo kĩnene, nyũmba ĩla yaakiwe ĩũlũ wa ĩvia ndĩaatumbũka, ĩndĩ nyũmba ĩla yaakiwe ĩũlũ wa kĩthangathĩ nĩyatumbie nthĩ mbu. Yesũ aisye kana ala mewʼaa momanyĩsyo make na kũmeka mailyĩ ta ũla mũndũũme mũĩ waakie ĩũlũ wa ĩvia. Ĩndĩ ala mewʼaa momanyĩsyo make na mailea kũmeka mailyĩ ta mũndũũme ũla mũtumanu waakie ĩũlũ wa kĩthangathĩ. We wĩenda kwĩthĩwa ũilyĩ ta mũndũũme wĩva?—Mathayo 7:24-27.

Kwĩyumya. Ũũ nĩ kwasya kana ũendee Yeova mboyanĩ na ũimwĩa kana wĩenda kwĩka kwenda kwake tene na tene. Kwĩka kwenda kwa Ngai kwonanasya kana wĩ mũmanyĩwʼa wa Yesũ Klĩsto.—Mathayo 11:29.

Ũvatiso. “Ũvatiswe, ũthambwʼe naĩ syaku, ũkĩkaĩla syĩtwa yake.”—Meko 22:16.

Ĩthĩwa wĩlikĩtye vyũ nthĩnĩ wa kũmũthũkũma Ngai. “Ũndũ mũkwĩka o na wĩva, wĩkei kuma ngoonĩ, ta kũmũthũkũma Mwĩaĩi [“Yeova,” NW], na ti andũ.”—Akolosai 3:23.