Ũkanʼyo Kuma Ĩvinda Yĩla Ĩvĩtũku

Yeova ndaketĩkĩlya andũ athũku manange Valatiso. No anyanyae me oka makekala thayũ vau. Kũkeethĩwa ata kwa andũ athũku? Nĩ kenda ũmanye ũsũngĩo, sũanĩa ĩla ngewa ya wʼo ya Noa. Noa aĩ thayũ myaka ngili mbingĩ mĩvĩtũku. Aĩ mũndũũme mũseo watatie na vinya kwĩka kwenda kwa Yeova. Ĩndĩ andũ ala angĩ ĩũlũ wa nthĩ nĩmeekie maũndũ mathũku. Kwoou Yeova eea Noa kwĩthĩwa akaete mũtũlo-wa-kĩwʼũ-kingĩ kwananga andũ asu onthe athe. Eeie Noa ake ngalawa nĩ kenda we na mũsyĩ wake maikaakwʼe Mũtũlo-wa-kĩwʼũ-kingĩ wooka.—Mwambĩlĩlyo 6:9-18.

Noa na mũsyĩ wake nĩmaakie ngalawa. Noa nĩwakanisye andũ mesũvĩe nũndũ Mũtũlo-wa-kĩwʼũ-kingĩ ũkooka, ĩndĩ mayaamwĩthukĩĩsya. Maendeeie kwĩka maũndũ mathũku. Ngalawa yamina kũthela, Noa nĩwalikilye nyamũ nthĩnĩ wayo, nake o na mũsyĩ wake malika nthĩnĩ. Nĩwʼo ĩndĩ Yeova waetie mbua ngito mũno. Mbua yakimie nthĩ mĩthenya 40 na motukũ 40. Kĩwʼũ kĩu kyatũlile kyausũa nthĩ yonthe.—Mwambĩlĩlyo 7:7-12.

Andũ ala athavu nĩmakwʼie, ĩndĩ Noa na mũsyĩ wake nĩmavonokiwʼe. Yeova nĩwamavĩtũkisye me aima kwĩsĩla nthĩnĩ wa Mũtũlo-wa-kĩwʼũ-kingĩ amalikya nthĩnĩ wa nthĩ nthesye wathavu. (Mwambĩlĩlyo 7:22, 23) Mbivilia yaasya kana ĩvinda yĩkooka ĩngĩ Yeova anange andũ ala maleaa kwĩka ũndũ kwaĩle. Andũ aseo maikanangwa. Makekala thayũ ĩũlũ wa nthĩ ya Valatiso.—2 Vetelo 2:5, 6, 9.

Ũmũnthĩ andũ aingĩ nĩmekaa maũndũ mathũku. Nthĩ nĩyusĩe ithokoo. Yeova nũtũmaa Ngũsĩ syake ĩngĩ na ĩngĩ ikakanʼye andũ, ĩndĩ andũ ala aingĩ mayendaa kwĩthukĩĩsya ndeto sya Yeova. Mayendaa kũalyũla nzĩa syoo. Mayendaa kwĩtĩkĩlana na ũndũ Ngai waasya ĩũlũ wa waĩlu na ũthũku. Kũkeethĩwa ata kwa andũ asu? Mũthenya ũmwe makaalyũka? Aingĩ maikesa kũalyũka nongi. Ĩvinda nĩyũkĩte yĩla andũ athũku makanangwa na maikekala thayũ ĩngĩ nongi.—Savuli 92:7.

Nthĩ ndĩkanangwa; ĩkatwʼĩkĩthwʼa valatiso. Ala matwʼĩkaa anyanya ma Ngai makekala thayũ tene na tene nthĩnĩ wa Valatiso ĩũlũ wa nthĩ.—Savuli 37:29.