Syo Naaũ?

NGŨSĨ SYA YEOVA nĩsyendaa wĩthĩwe wĩsene nasyo nesanga. Nokwĩthĩwa imwe nĩ atũi maku kana mũthũkũmaa nasyo kana mũkakomanĩa maũndũnĩ angĩ. Nokwĩthĩwa ũsyonete nzĩanĩ iinengane makaaseti kwa andũ ala mavĩtĩte. Kana nokwĩthĩwa waanena nasyo vanini nza wa nyũmba yaku.

Ngũsĩ sya Yeova nĩ syendeeawʼa nue na maendeeo maseo maku kwa wʼo ki. Nĩsyendete kwĩthĩwa syĩ anyanyau na kũũmanyĩthya mũnango ĩũlũ woo, mĩkĩĩo yoo, walanyʼo woo, mawoni moo kwelekela andũ na nthĩ ĩno tũtũaa. Nĩkenda syĩanĩsye ũu niseũvĩtye kavuku kaa kwondũ waku.

Ngũsĩ sya Yeova mavwʼanene o na andũ ala angĩ kwa nzĩa nyingĩ. Mathĩna moo no ala makwataa andũ ala angĩ- ta ma mbesa, ma kĩĩmwĩĩ, na ma ngoonĩ. Na tondũ mo ti eanĩu kana kũveveewa kana matavĩtya, mavinda kwa mavinda nĩ mavĩtasya. Nĩ matataa kwĩmanyĩsya kumana na maũndũ ala mamakwataa na kwa kĩthingʼĩĩsyo kwĩmanyĩsya Mbivilia na kwĩtũngĩĩa. Nĩmaminĩte kwĩyumĩsya Ngai mekae kwenda kwake na nĩmenenganĩte nĩkenda meanĩsye wĩyumyo ũsu. Nthĩnĩ wa maũndũ onthe ala mekwĩka nĩ mamanthaa ũtongoi kuma Ndetonĩ ya Ngai na veva mũtheu wake.

Nĩ ũndũ wa vata mũno kwoo, mĩĩkĩĩo yoo yĩthĩwe yĩna mwambĩlĩlyo wayo nthĩnĩ wa Mbivilia na ti motalĩthyonĩ ma andũ kana mawĩtĩkĩlano ma kĩĩndĩni. Mo meyĩwʼaa ta mũtũmwa Vaũlo e mũvevee yĩla waisye: “Ngai nĩ wa wʼo, ĩndĩ kĩla mũndũ nĩ mũkengani.” (Alomi 3:4, Kikamba Biblea) Ngũsĩ sya Yeova yĩla iũmanyĩsya ũwʼo wa Mbivilia nĩ syĩtĩkĩlanaa na ũndũ Avelia meekie yĩla meewie mũtũmwa Vaũlo aitavanyʼa: “Nĩmeetĩkĩlile ĩla ndeto na ũthalĩku wʼonthe wa ngoo, maimantha maandĩkonĩ mĩthenya yonthe, kana maũndũ asu nĩwʼo mailyĩ.” (Meko 17:11) Ngũsĩ sya Yeova iĩkĩĩaa kana maũmanyĩsyo onthe ma kĩĩndĩni no mũvaka masianĩwʼe kana nĩmekwĩtĩlana na Maandĩko ma veveee, methĩwe nĩ moo kana nĩ ma mũndũ ũngĩ. Nĩ meũkũthokya—na ũkwĩsũva—wĩke ũu yĩla ũkũea ngewa namo.

Nĩ ũtheinĩ kana Ngũsĩ iĩkĩĩa kana Mbivilia nĩ Ndeto ya Ngai. Syonaa kana mavuku asu 66 nĩ maveveee na nĩ mawʼo ki. Kĩla kĩkothaa kwĩtwa mũno Ũtianĩo Mweũ, mo makĩtaa Maandĩko ma Kĩklisto ma Kĩngiliki, na wʼo Ũtianĩo Mũkũũ mawĩtaa Maandĩko ma Kĩevelania. Mekwatasya mavuku asu elĩ, Maandĩko ma Kĩngiliki na Kĩevelania, na mamosaa ũu mailyĩ, ate o mavinda ala kĩla kĩũwetwa kĩonanyʼa nthimo ya kĩndũ kana mũvwʼanano. Maeleawa kana mawathani maingĩ ma Mbivilia nĩ maminĩte kwĩanĩwʼa, na angĩ nĩmaendeee na kwĩanĩwʼa, na ve o angĩ meteele kwĩanĩwʼa.

ĨSYĨTWA YOO

Aĩ Ngũsĩ sya Yeova? Yĩĩ, ũu nĩwʼo meyĩtaa. Nĩ ĩsyĩtwa ya kwĩmanyĩthanyʼa, ĩyonanyʼa kana maumasya ũkũsĩ ũkonyʼe Yeova, Ũũngai wake, na ieleelo syake. “Ngai,” “Mwĩaĩi,” “Mũmbi,”—Ta “Vulesitendi,” “Mũsumbĩ,” “Ngyenoo”—nĩ masyĩtwa ma monene na nĩmatonya kũtũmĩwa kwa andũ me kĩvathũkanyʼo. Ĩndĩ “Yeova,” nĩ syĩtwa yake mwene na yĩwetaa Ngai mwene vinya wʼonthe na Mũmbi wa ĩtu na nthĩ. Ũu nĩwonanĩtwʼe nthĩnĩ wa Savulĩ 83:18: “Nĩ kana mamanye no we wĩ weka, syĩtwa yaku nĩ Yeova, Nue Wĩ Ĩũlũ wa Onthe ĩũlũ wa nthĩ yonthe.”

Ĩsyĩtwa yĩĩ Yeova, yonekaa mavinda ta 7,000 nthĩnĩ wa Maandĩko ma Kĩevelania ala ma mbee vyũ. Mbivilia sya ithyomo ingĩ iyonanasya yĩilyĩ ũu ĩndĩ vandũ va ũu iandĩkaa “Ngai” kana “Mwĩaĩi” vandũ vayo. Ĩndĩ, o na nthĩnĩ wa Mbivilia isu, mũndũ no amanye vala Maandĩko ma Kĩevelania matũmĩĩte Yeova kĩtumi nũndũ kũla yĩtatũmĩĩtwe yĩandĩkĩtwe na nthoo nene ta: NGAI, MWĨAĨI. Maũalyũlo ma matukũ aa nĩ matũmĩaa syĩtwa Yeova kana Yahweh. Kwoou ĩndĩ Kikamba Bible nthĩnĩ wa Isaia 42:8, Ngai mwene easya: “Ninyie Yeova, nĩyo syĩtwa yakwa.”

Ũneeni wa Kĩĩmaandĩko ũla Ngũsĩ sya Yeova syumĩtye syĩtwa yoo nĩ nthĩnĩ wa Isaia kĩlungu kya 43. Vaa mwĩkalĩle wa nthĩ ĩno ũilyĩ tondũ kwĩkawa kĩsilĩlonĩ: Ingai sya mbaĩ syoonthe syĩtĩtwʼe ngũsĩ syasyo iĩkĩĩthye ũwʼo wa ũngai wa syo kana syĩwʼe ũkũsĩ wa ngalĩko ya Yeova na kũwĩtĩla ũla wʼo. Vau Yeova etevya andũ make ũũ: “Inywʼĩ mwĩ ngũsĩ syakwa, easya ũu Yeova, na mũthũkũmi wakwa ũla na mũnyuvie; nĩ kana mũmanye na mũmbĩtĩkĩle, na kũmanya ninyie we: vatyaĩ Ngai wombiwe mbee wakwa, o na kũikethĩwa ĩtina wakwa. Nyie, o nyie, nĩ Yeova; na nde vo vati mũtangĩĩi.”—Isaia 43:10, 11.

Yeova Ngai aĩ na ngũsĩ syake ĩũlũ wa nthĩ myaka ngili mbingĩ mbee wa Yesũ atanasyawa. Ĩtina wa Aevelania kĩlungu kya 11 kwonanyʼa masyĩtwa ma andũ amwe maĩ na mũĩkĩĩo, Aevelania 12:1 yĩasya: ‘Kwondũ wa ũu ĩthyĩ naitũ, nĩkwĩthĩwa nĩtũthyũlũlũkĩtwe nĩ mũumbĩ mũnene wĩana ũu wa ngũsĩ, nĩtwie ũtee kĩla kĩũtũvata kũthi kyonthe, na naĩ ĩla ĩtũsiĩĩaa na ũvũthũ, na tũsembe na wũmĩĩsyo ũkĩlanʼyonĩ ũla wiĩtwe mbee waitũ.’ Yesũ amũtavisye Vondio Vilato ũũ: “Nyie nasyaiwe kwondũ wa ũu, na ĩngĩ nĩ kwondũ wa ũu nokie kũũ nthĩ, nĩ kana ndwʼĩke ngũsĩ ya ũla wʼo.” Etawa “ngũsĩ yĩ kĩthito na ya wʼo.” (Yoana 18:37; Ũvuanʼyo 3:14) Yesũ eeie amanyĩwa make atĩĩ: “Ĩndĩ mũkoosa vinya, yĩla Veva Mũtheu wĩũka ĩũlũ wenyu: na mũkeethĩwa mwĩ ngũsĩ syakwa Yelũsaleme, na Yutia yonthe, na Samalia, na kũvika itulu sya nthĩ.”—Meko 1:8.

Kwoou ĩndĩ nthĩnĩ wa nthĩ ivĩtũkĩte 230 andũ ta 6,000,000 ala ũmũnthĩ meũtavanyʼa ũvoo mũseo wa Ũsumbĩ wa Yeova kwĩsĩla Yesũ Klisto, mewʼaa ve waĩlu wa kwĩ yĩta Ngũsĩ sya Yeova.

[Maelesyo]

[Mbulavu ĩthangũnĩ ya 4]

Nĩ meyumĩtye kwa Ngai meke kwenda kwake

[Mbulavu ĩthangũnĩ ya 4]

Nĩ maĩkĩĩaa Mbivilia nĩ Ndeto ya Ngai

[Mbulavu ĩthangũnĩ ya 5]

Ĩsyĩtwa yĩu yĩisianĩwa na maũndũ ta ala mekĩkaa kĩsilĩlonĩ

[Mbulavu ĩthangũnĩ ya 5]

Ngũsĩ ta 6,000,000 nthĩnĩ wa nthĩ ivĩtũkĩte 230

[Visa ĩthangũnĩ ya 3]

Nĩ mendeewʼa nue

[Visa ĩthangũnĩ ya 4]

Syĩtwa ya Ngai mwene nthĩnĩ wa Kĩevelania kya tene