Nzĩa Ila Matũmĩaa Kũtavanyʼa Ũvoo Mũseo
AKLISTO nĩmeeyĩaĩiwe ‘makatwʼĩkĩthye mbaĩ syonthe amanyĩwʼa,’ ĩndĩ ũu ti kwasya kana maĩlĩtwe nĩ kũkandĩa kana kũalyũla andũ angĩ kwa kũtũmia vinya. Wĩa ũla Yesũ wanengetwe waĩ “nĩtavye ala auu ũvoo mũseo,” na “nove ala me na ngoo ndũlĩku,” na “nĩmakiakisye onthe ala mametaa.” (Mathayo 28:19; Isaia 61:1, 2; Luka 4:18, 19) Ngũsĩ sya Yeova nĩsyendaa kwĩka ũu kwa kũtavanyʼa ũvoo mũseo kuma nthĩnĩ wa Mbivilia. Ngũsĩ sya Yeova ũmũnthĩ nitataa kũmantha andũ ala “mavevũũkaa na ala maĩaa nũndũ wa mothatyo onthe ala mekawa,” o tondũ mwathani wa tene Esekieli weekaa.—Esekieli 9:4.
Nzĩa ĩla yĩsĩkĩe mũno ĩla matũmĩaa kũmantha andũ ala maitavĩwe nĩ maũndũ ala maendee nĩ kwa kũthi nyũmba kwa nyũmba. Matataa na kĩthito kũvikĩa andũ aingĩ o ũndũ Yesũ weekie yĩla waendie “angangĩla ndũanĩ na mĩsyĩ, akĩtavanʼya na kũnyaĩĩkya ũvoo mũseo wa ũsumbĩ wa Ngai.” Amanyĩwʼa make ma mbee meekaaa o ũu. (Luka 8:1; 9:1-6; 10:1-9) Ũmũnthĩ, vala vatonyeka Ngũsĩ sya Yeova nitataa kũthi kĩla mũsyĩ mavinda maingĩ mwakanĩ, maimantha kũeanga ngewa na ene mũsyĩ kwa ndatĩka o nini ĩũlũ wa maũndũ ma kwendeesya na ala meũthĩnyʼa ngoo sya andũ ala mekĩkie ũtũinĩ kana isionĩ ila ingĩ sya nthĩ. Ĩandĩko yĩmwe kana elĩ nĩmatonya kumĩlwʼa na kũsũanĩwa, na ethĩwa mwene nyũmba nĩwoonanyʼa kwendeewʼa, Ngũsĩ ĩsu nĩtonya ũvanga kũsyoka ĩngĩ ĩvinda yĩla yeetĩkĩlanwa nĩ kana moke kũendeea na ngewa. Mbivilia na mavuku maũelesya Mbivilia nĩmanenganawe, na ethĩwa andũ ma mũsyĩ ũsu nĩmekwenda, ĩmanyĩsyo ya Mbivilia nĩ yĩkawa vate ndĩvi. Milioni nyingĩ nitethekaa nĩ momanyĩsyo aa ma Mbivilia ala mekewa vate kũtĩĩa kwa mũndũ ũmwe ũmwe kana mĩsyĩ yĩkĩvathũkanyʼo kĩla vandũ ĩũlũ wa nthĩ.
Nzĩa ĩngĩ ĩla “ũvoo mũseo wa ũsumbĩ” ũtavanawʼa nayo nĩ kwĩsĩla maũmbanonĩ ala mekawa nthĩnĩ wa Nyũmba sya Ũsumbĩ (Kingdom Halls). Ngũsĩ syĩkĩaa maũmbano vo kĩla kyumwa. Ũmbano ũmwe ũneeneaa maũndũ ala maendee yu wĩtawa ũvoo kwa andũ onthe, ũatĩĩawa nĩ ũmanyĩsyo wa Mbivilia kana wathani, maitũmĩa ĩkasetĩ yĩtawa Mnara wa Mlinzi. Ũmbano ũngĩ nĩ sukulu ya ũmanyĩsya Ngũsĩ nĩ kenda itwʼĩke anyaĩĩkya aseango ma ũvoo mũseo, nawʼo ũkĩatĩĩwa nĩ kĩlungu kĩkũelesya ũndũ wĩa wa kumya ũkũsĩ kĩsionĩ kyoo ũkekawa. Na ĩngĩ yĩmwe kwa kyumwa Ngũsĩ nĩ syũmbanĩaa mĩsyĩ ya amwe moo, meo kauta, kwa momanyĩsyo ma Mbivilia.
Andũ onthe methĩawa me athokye maũmbanonĩ asu. Kũi nthembo syosanawʼa. Maũmbano asu nĩ maunaa kĩla mũndũ. Mbivilia yaasya: “Na nĩtũlilikananʼye ĩthyĩ kwa ĩthyĩ kũthangaanʼya wendonĩ na mawĩanĩ maseo; tũtekũeka kũmbana kwitũ vamwe, o tondũ amwe mekaa, ĩndĩ tũkĩtaana; na mbee mũno, mũkyona mũthenya ũsu ũkĩthengeea.” Kwĩmanyĩsya weka na kwĩkuũa maũndũ nĩ kwaĩle, ĩndĩ kũmbana na ala angĩ nĩ kũtanasya: “Kĩaa nĩkĩnoaa kĩaa; O ta ũu mũndũ nũnoaa ũthyũ wa mũnyanyae.”—Aevelania 10:24, 25; Nthimo 27:17.
Na ĩngĩ Ngũsĩ nineena yĩũlũ wa ũvoo mũseo yĩla kavinda kaumĩla makomana na andũ maũndũnĩ moo ma kĩla mũthenya. Nĩ kũtonya kwĩthĩwa e o kũtumũanyʼa na mũtũi, kana kũea ngewa mwĩkyalonĩ, kana o kũea ngewa mũnango na mũnyanya kana andũ ma mũkonyo, kana o yĩla mekũea ngewa na andũ ala mathũkũmaa namo saa sya ũya. Ũtavanyʼa mwingĩ wa Yesũ yĩla waĩ kũũ nthĩ waĩ wa mũthemba ũsu—Yĩla watambũkaa ũtee wa ũkanga, na ekalĩte nguumo wa kĩĩma, aiya e mũsyĩ kwa mũndũ, yĩla wĩ mũtwaanonĩ, kana e ĩsiwanĩ ũkanganĩ wa Kalilii. Nĩ wamanyĩasya masinakokenĩ na ĩkalũnĩ kũya Yelũsalemu. O na e va, nĩ wakwataa tũmyanya akaneena na andũ yĩũlũ wa Ũsumbĩ wa Ngai. Ngũsĩ sya Yeova o nasyo nitataa kũatĩĩa nyaaĩ syake ũndũnĩ ũũ.—1 Vetelo 2:21.
KŨTAVANYʼA KWA NZĨA YA NGELEKANYʼO
Vayĩingwa ĩmwe ya nzĩa ii sya kũtavanyʼa ũvoo mũseo yĩthĩwa yĩ kĩtumi kwaku, ethĩwa ũla ũnũũkũtavya ũvoo ndekalaa kwosana na momanyĩsyo asu. Nĩ wanganganyʼo mũndũ kũneena ũndũ mũna na kũlea kwĩkala ũndũ ũkwasya, na wanganganyʼo wa kĩĩndĩni ta ũsu nĩwo ũtumĩte andũ milioni nyingĩ makola ĩ Mbivilia. Ĩndĩ Mbivilia kwa wʼo ndyaĩle ũtũlwa mũtĩ. Aandĩki na Avalisi maĩ na Maandĩko ma Kĩevelania, ĩndĩ Yesũ nĩ wamatetisye mũno anganganyʼa asu. Nĩwaneenie ũndũ masomaa mĩao ya Mose, na aitavya amanyĩwa make ongeleela ũũ: “Maũndũ onthe ĩndĩ o na meva ala mamwĩaĩaa, kwatai na kũmeka: ĩndĩ nĩ mĩkĩle yoo mũikamĩke; nũndũ nĩmaneenaa na matyĩkaa.” (Mathayo 23:3) Ũndũ Mũklisto wĩyĩkalĩtye nĩwʼo ũtavanyʼa ũla mũnene kwĩ wa kanywʼa wa masaa maingĩ. Ũũ nĩ waweteiwe iveti sya Kĩklisto ila aũme masyo mataĩ aĩkĩĩi: “Matonye kwonwʼa nĩ mwĩkalĩle wa iveti syoo vate ĩla ndeto; makyona mwĩkalĩle wenyu mũtheu wĩ na wʼĩa.”—1 Vetelo 3:1, 2.
Kwondũ wa ũu, Ngũsĩ sya Yeova o nasyo nitataa kwendethya ũvoo mũseo kwa angĩ kwa nzĩa ĩsu kwa kwĩthĩwa me ngelekanyʼo ya mwĩkalĩle mwaĩlu wa Kĩklisto ũla mendethasya kwa ala angĩ. Mo nĩmatataa ‘kwĩka andũ ala angĩ tondũ mekwenda mo ene mekwe.’ (Mathayo 7:12) Mo nĩmatataa kwĩthĩwa mailyĩ ũu kwa andũ onthe, no ti kwa Ngũsĩ syoka, anyanya, atũi, kana andũ moo. Tondũ mo ti eanĩu, ti mavinda onthe meanĩasya maũndũ asu ki. Ĩndĩ wĩthĩawa wendi wa ngoo syoo meke ũla ũseo kwa andũ onthe ti o kwa kũmatavya ũvoo mũseo wa Ũsumbĩ kwʼoka, ĩndĩ o vamwe na kũmatethya ala angĩ yĩla vatonyeka.—Yakovo 2:14-17.
[Visa ĩthangũnĩ ya 19]
Awaii
[Visa ĩthangũnĩ ya 19]
Venenzuela
[Visa ĩthangũnĩ ya 19]
Yũngosilavia
[Visa ĩthangũnĩ ya 20]
Nyũmba sya Ũsumbĩ, syakĩtwe na nzĩa nzeo, nĩ kũndũ kwa kũeea ngewa sya Mbivilia
[Visa ĩthangũnĩ ya 21]
Mĩkalĩle ya mĩsyĩnĩ yoo na kũvulana na andũ ala angĩ, Ngũsĩ nitataa na ũtheu wa ngoo kwĩka maũndũ kwosana na ũndũ mamanyĩasya