We Welekele Va?

• Andũ aingĩ methĩawa makwatene na maũndũ ma kĩla mũthenya ũkethĩa maiũsũanĩa kũla melekele.

• Mbivilia nĩtwonasya maũndũ ala mokĩte maseo. O na nĩtũkanasya kana mawalanyʼo ma andũ makathokoana nthĩ yonthe. Nĩ kenda ithyĩ tũvonoke na tũiunĩka nĩtwaĩlĩtwe nĩkwosa ĩtambya mĩtũkĩ.

• Andũ amwe nĩmesĩ ũndũ Mbivilia yaasyaa, na nĩmatataa kũmĩatĩĩa, ĩndĩ nĩmalulutĩkawʼa nĩ mawĩmakĩo.

• We nũtanawʼa nĩ vala welekele? Yĩla ũũvanga maũndũ maku, we nũsũanĩaa ũndũ ũu ũtonya kwĩkana na ieleelo sya ĩvinda ĩasa thayũnĩ waku?

[Ĩsandũkũ/Visa ĩthangũnĩ ya 9]

Nĩ Kyaũ Kĩla Kya Vata Mũno Kwaku?

We ũtonya kũatĩanĩsya maũndũ aa ata? Maandĩke ũmaatĩanĩsye kwĩanana na ũndũ meanyʼa vata kwaku.

Maingĩ mamo nĩ ma vata kwaku, ĩndĩ yĩla ũũnyuva, nĩ kyaũ kĩla kĩthĩawa kya mbee? kya kelĩ? na kũendeea.

․․․ Kwĩtanĩthya/kwĩvuũkya

․․․ Wĩa wakwa

․․․ Ũima wakwa wa mwĩĩ

․․․ Ũtanu wakwa

․․․ Mũka kana mũũme wakwa

․․․ Asyai makwa

․․․ Syana syakwa

․․․ Mũsyĩ mwanake, ngũa nzeo

․․․ Kwĩthĩwa ne inyie namba ĩmwe maũndũnĩ onthe ala nĩkaa

․․․ Ũthaithi wa Ngai

[Ĩsandũkũ/Visa ĩthangũnĩ ya 10, 11]

Maũndũ Ala Ũnyuvĩte Nĩmakwelekelye Vala kwa Wʼo Ũkwenda Kũthi?

SŨANĨA MAKŨLYO AA

KWĨTANĨTHYA/KWĨVUŨKYA: Ũnyuvi wakwa wa kwĩtanĩthya nũndanĩthasya? Amwe ma mo nĩ maũndũ matonya kũndetee mũisyo kana kũndwʼa kyonze vyũ? Nĩ ũndũ ũtonya kũete ũtanu wa kavinda kavũthũ, ĩndĩ ũtonya kũete woo wa ĩvinda ĩasa? O na ethĩwa ũndũ ũla ngũnyuva wa kwĩtanĩthya nĩ mũseo, nĩndũmĩaa ĩvinda ĩasa, ngaĩwa nĩ mwanya wa kwĩka maũndũ ala ma vata mũno?

WĨA WAKWA: Nĩwakũndonyethya kũmantha kyaũya, kana nĩ ngombo yawʼo? Nũtumaa nĩka maũndũ maũthũkya ũima wakwa wa mwĩĩ? Nĩnendeeawʼa nĩ kũthũkũma ĩvinda ĩasa kũte kũtũmĩa ĩvinda na kĩveti na syana syakwa? Ethĩwa ũla ũnandĩkĩte nũkwenda nĩtethye wĩa ũtuma nĩthĩwa na wasya mũthũku wa ngoo, kana ũũnziĩĩa kwĩka maũndũ ma kĩveva, ngatethya wĩa ũsu ndikavutwe?

ŨIMA WAKWA WA MWĨĨ: Nĩnĩleaa kũũngana nawʼo kana nĩnĩũsũvĩaa ũndũ ũwaĩle? Ĩvinda yonthe nĩeaa ngewa ĩũlũ wa ũima wakwa wa mwĩĩ? Ũndũ nĩ ũsũvĩaa nĩnonanasya kana nĩnĩũngaa mũsyĩ wakwa?

ŨTANU WAKWA: Nĩwʼo nĩtongoasya mbee wa maũndũ ala angĩ? Nĩwʼo niaa mbee wa ũtanu wa kĩveti kyakwa kana mũũme wakwa na mũsyĩ wakwa? Ũndũ nĩũmanthaa nĩnonanasya kana nĩ mũthaithi wa Ngai wa wʼo?

MŨKA KANA MŨŨME WAKWA: Nonaa kĩveti kyakwa kana mũũme wakwa ta mũtindanyʼa wakwa ĩla nyie mwene ngwona vaĩle? Nĩnĩnengaa kĩveti kyakwa kana mũũme wakwa ndaĩa, ta waĩlĩtwe kana ta kyaĩlĩtwe nĩ kũnengwa ndaĩa? Mũĩkĩĩo wakwa kwa Ngai nũndongoeasya nthĩnĩ wa ũndũ nguaa kĩveti kyakwa kana mũũme wakwa?

ASYAI MAKWA: Ethĩwa nĩo mũnini, nyie nĩnĩwʼaa asyai makwa, na kũmasũngĩa kwa ndaĩa, kwĩka mawĩa ala nĩaĩwe, kũsyoka mũsyĩ ĩvinda yĩla nĩyĩaĩwe, na kwĩvathana na itindo na maũndũ ala nganĩtwʼe? Ethĩwa nĩ mũima, nĩnĩthukĩĩasya asyai makwa kwa ndaĩa na kũmatethya ĩla ve na vata? Nĩmekaa maũndũ nĩkwĩthĩwa nĩ na mwanya kana nĩtongoeawʼa nĩ ũtao wa Ndeto ya Ngai?

SYANA SYAKWA: Nĩnĩwʼaa ta inyie naĩlwe nĩ kũmanyĩsya syana syakwa mwĩkalĩle mũseo kana nĩkwatasya masukulu makeeka ũu? Nĩnĩkalaa na syana syakwa kana nĩkwatasya syĩndũ sya ũthaũka na syana na televiseni isyĩkalye? Nĩnĩikanasya syana syakwa syaema kwĩwʼa mĩao ya Ngai, kana nĩikanasya o yĩla nathata?

MŨSYĨ MWANAKE, NGŨA NZEO: Nĩ kyaũ kĩla kĩtumaa nĩthĩnĩkĩa ũndũ syĩndũ syakwa syonekaa, nakwa nonekaa methonĩ ma andũ? Nĩ kwenda kwĩyonanyʼa kwa atũi makwa? Kana nĩ waĩlu wa andũ ma mũsyĩ wakwa? Kana nũndũ nyie nĩ mũthaithi wa Ngai?

KWĨTHĨWA NE INYIE NAMBA ĨMWE MAŨNDŨNĨ ONTHE ALA NĨKAA: Nĩnĩwʼaa kana nĩ ũndũ wa vata kwĩka maũndũ nesa? Nĩndataa kwĩthĩwa ne inyie mwaĩlu vyũ? Nĩnĩthĩnĩkaa mũndũ ũngĩ eeka ũndũ nesa kwĩ inyie?

ŨTHAITHI WA NGAI: Kwĩtĩkĩlwa nĩ Ngai nũndũ wa vata kwakwa, kũte kwĩtĩkĩlwa nĩ kĩveti kyakwa, kana mũũme wakwa, syana syakwa, asyai makwa, kana mũndũ ũla ũnandĩkĩte? No nende kũtongosya kwĩkala nesa mbee wa kũmũthũkũma Ngai?

SŨANĨA KWA KĨTHITO ŨTAO WA MBIVILIA

Ngai ethĩawa na kĩanda kyaũ thayũnĩ waku?

Mũtavanʼya 12:13: “Kĩa Ngai, na kwata mĩao yake; nũndũ ũu nĩwʼo ũndũ wʼonthe waĩlĩte kwĩkawa nĩ mũndũ.”

ĨKŨLYE: Mwĩkalĩle wakwa nĩwonanasya kana nonaa maũndũ kwa nzĩa ĩsu? Kũmwĩwʼa Ngai nĩkwʼo kũndongoeasya ũndũ nĩkaa maũndũ mũsyĩ, wĩanĩ, na sukulu? Kana kwenda maũtanu na maũndũ angĩ ma nthĩ nĩkwʼo kũtusaa kana nĩngwonea Ngai mwanya?

We wĩna mũamba ũilye ata vamwe na Ngai?

Nthimo 3:5, 6: “Ĩkĩĩa Yeova na ngoo yaku yonthe, na ndũkekwatye ũmanyi waku mwene: mĩendelenĩ yaku yonthe mũkũsĩĩe we, na akaũlũngalĩlya nzĩa syaku.”

Mathayo 4:10: “Mũthaithae Mwĩaĩi Ngai waku, na mũthũkũmae we, e weka.”

ĨKŨLYE: Ũu nĩwʼo nĩwʼaa ĩũlũ wa Ngai? Maũndũ ala nĩkaa kĩla mũthenya, na ũndũ nĩkaa nakwatwa nĩ mathĩna, nĩnonanasya kũĩkĩĩa na kwĩyumya ta kũu?

Kũsoma na kwĩmanyĩsya Mbivilia nĩ kwa vata mũno ata kwaku?

Yoana 17:3: “Na thayũ ũtathela nĩwʼo ũũ, nĩ kana makũmanye we Ngai ũla wa wʼo weka, na ũla wa mũtũmie, nake nĩ Yesũ Klĩsto.”

ĨKŨLYE: Mwanya ũla nĩnengete kũsoma na kũsũanĩa mũno Ndeto ya Ngai, nĩwonanasya kana kwa wʼo nĩnĩĩkĩĩaa ndeto isu?

Kũthi maũmbanonĩ ma Kĩklĩsto nĩ kwa vata mũno ata kwaku?

Aevelania 10:24, 25: “Na nĩtũlilikananʼye ithyĩ kwa ithyĩ kũthangaanʼya wendonĩ na mawĩanĩ maseo; tũtekũeka kũmbana kwitũ vamwe . . . na mbee mũno, mũkyona mũthenya ũsu ũkĩthengeea.”

Savuli 122:1: “Naĩ na ũtanu yĩla mambĩie, Tũendei nyũmbanĩ ya Yeova.”

ĨKŨLYE: Mwĩkalĩle wakwa nĩwonanasya mũvea kwondũ wa mwolooto ũũ wonekaa Ndetonĩ ya Ngai? Mwai ũũ ũthelile nĩnĩnatĩie ũmwe wa maũmbano ma Kĩklĩsto nũndũ wa kũeka nĩvĩngĩswe nĩ maũndũ angĩ?

We nĩwĩthĩawa na kĩthito nthĩnĩ wa kũneena na andũ ala angĩ ĩũlũ wa Ngai na kĩeleelo kyake?

Mathayo 24:14: “Na ũvoo ũũ mũseo wa ũsumbĩ ũkatavanwʼa nthĩ yonthe wĩthĩwe ũkũsĩ . . . , na ĩndĩ mũminũkĩlyo ũkyũka.”

Mathayo 28:19, 20: “Endai ĩndĩ mũkatwʼĩkĩthye mbaĩ syonthe amanyĩwʼa, . . . mũkĩmamanyĩsya kũkwata maũndũ onthe o na meva ala namwĩaĩe.”

Savuli 96:2: “Mwinĩei Yeova, taĩai syĩtwa yake; Onanʼyai ũtangĩĩo wake mũthenya na mũthenya.”

ĨKŨLYE: Wĩa ũũ nĩ nĩũtethasya ũndũ vaĩle? Ũndũ nyie nĩũtethasya nĩnonanasya kana nyie nĩna mũĩkĩĩo wa kana twĩkalaa ĩvinda yĩte kwenda ngũĩ?