Mwaka wa 1914 Nĩ wa Vata Nthĩnĩ wa Wathani wa Mbivilia

MYAKA vakuvĩ 40 mbee wa mwaka wa 1914, amanyĩwʼa ma Mbivilia nĩmatavanĩtye kana mwaka ũsu kũkeethĩwa maũndũ mataĩ maaoneka. Maũndũ asu nĩ maũ na nĩ kyaũ ũmũnthĩ kyonanasya kana mwaka ũsu waĩ mwaka wa vata?

O tondũ kũandĩkĩtwe nthĩnĩ wa Luka 21:​24, Yesũ aisye: ‘Yelusaleme ũkakinyangwa nĩ Andũ-ma-mbaĩ-ingĩ mũvaka mavinda ma Andũ-ma-mbaĩ-ingĩ meanĩwʼe.’ Yelusaleme nĩwʼo waĩ mũsyĩ mũnene wa mbaĩ ya Ayuti vala vaĩ kĩvĩla kya ũsumbĩ kya asumbĩ ma nyũmba ya Mũsumbĩ Ndaviti. (Savuli 48:​1, 2) Ĩndĩ asumbĩ asu maĩ kĩvathũkanyʼo na asumbĩ ala angĩ ma nthĩ ingĩ. Mekalaa “kĩvĩlanĩ kya ũsumbĩ kya Yeova” maũngamĩte vandũ va Ngai. (1 Mavinda 29:23) Kwoou Yelusaleme yaĩ wonanyʼo wa ũsumbĩki wa Yeova.

Ũsumbĩki wa Ngai waambĩĩe ‘kũkinyangwa nĩ Andũ-ma-mbaĩ-ingĩ’ ĩndĩĩ na ata? Waambĩĩe kũkinyangwa mwaka wa 607 M.Ĩ.Y. yĩla Yelusaleme yasindiwe nĩ Mbaviloni. ‘Kĩvĩla kya ũsumbĩ kya Yeova’ nĩkyatiiwe kĩte na mũndũ ũkĩkalĩle na asumbĩ ala masumbĩkaa kuma mũsyĩ wa Ndaviti maeka kũsumbĩka. (2 Asumbĩ 25:​1-​26) ‘Kũkinyangwa’ ku kwesaa kũendeea tene na tene? Aie, nũndũ wathani wa Esekieli waĩtye ũũ ĩũlũ wa Setekia, mũsumbĩ wa mũthya wa Yelusaleme: “Umya ĩla ngutwʼa, na umya ngovia ya mũsumbĩ. . . . Ũũ ndũkethĩwa ĩngĩ, kũvika yĩla wĩũka ũla kĩanda kĩ kyake; na ngamũnenga.” (Esekieli 21:​26,-27) Ũla ‘kĩanda ne kyake’ kya kũnewa Ngovia ya ũsumbĩ wa Ndaviti nĩ Yesũ Klĩsto. (Luka 1:​32, 33) ‘Kũkinyangwa’ kũu kwesaa kũthela Yesũ atwʼĩka Mũsumbĩ.

Ũndũ ũsu wa vata wesaa kwĩkĩka ĩndĩĩ? Yesũ oonanisye kana Andũ-ma-mbaĩ-ingĩ mesaa kũsumbĩka kwa ĩvinda ĩtale. Maũndũ ala maeleetwʼe nthĩnĩ wa ĩvuku ya Ndanieli kĩlungu kya 4 nĩmatwonetye ũasa wa ĩvinda yĩu. Maeleetye ndoto ĩkonetye wathani ĩla yaotiwe nĩ Mũsumbĩ Nevukatilesa wa Mbaviloni. Oonie mũtĩ mũnene watemwa na wavalũka. Kĩtina kyawʼo kĩyaĩ kĩana nũndũ kyoovetwe na kĩtangʼa kya kĩaa na ũthuku. Mũlaĩka awetie ũũ: ‘Na mavinda mũonza mavĩte ĩũlu wake.’​—⁠Ndanieli 4:​10-​16.

Mavinda amwe Mbivilia ĩwetaa mĩtĩ ĩyonanyʼa mosumbĩ. (Esekieli 17:​22-​24; 31:​2-5) Kwoou kũtemwa kwa mũtĩ ũsu wa ngelekanyʼo kwoonanisye ũndũ ũsumbĩki wa Ngai kwĩsĩla asumbĩ ma Yelusaleme waĩ ũvetwe. Ĩndĩ woni ũsu woonanisye kana ‘kũkinyangwa kwa Yelusaleme’ kwaĩ o kwa ĩvinda ĩnini, o “mavinda mũonza.” Yĩu nĩ ĩvinda yĩasavĩte ata?

Ĩandĩko ya Ũvuanʼyo 12:​6, 14 yonanasya kana mavinda atatu na nyusu nũndũ ũmwe na “mĩthenya ngili na maana elĩ na mĩongo thanthatũ.” Kwoou “mavinda mũonza” nĩ kũndũ kwĩlĩ kwa mavinda atatũ na nyusu kana mĩthenya 2,520. Ĩndĩ Andũ-ma mbaĩ-ingĩ mayaaeka ‘kũkinyanga’ ũsumbĩki wa Ngai ĩtina wa o mĩthenya 2,520, ĩtina wa Yelusaleme yaanangwa. Kwoou, wathani ũsu waĩ ũkue ĩvinda yĩasa ĩndĩ ti o mĩthenya 2,520. Kwosana na ĩandĩko ya Motalo 14:34 na ya Esekieli 4:​6, ala mawetete “mũthenya vandũ va mwaka,” “mavinda mũonza” maĩ na ũasa wa myaka 2,520.

Myaka 2,520 yambĩĩe kũtalwa Mwei wa ĩkũmi mwaka wa 607 M.Ĩ.Y., yĩla Yelusaleme yasindiwe nĩ Mbaviloni na mũsumbĩ wa mũsyĩ wa Ndaviti aumwʼa ũsumbĩnĩ. Myaka ĩsu 2,520 yathelile Mwei wa ĩkũmi mwaka wa 1914. Ĩvinda yĩu nĩwʼo “mavinda ma Andũ-ma-mbaĩ-ingĩ” mathelile na Yesũ Klĩsto atwʼĩka Mũsumbĩ ũũngamĩtwʼe nĩ Ngai ĩtunĩ.a​—⁠Savuli 2:​1-6; Ndanieli 7:​13, 14.

Yesũ athanie kana itetemo nene sya nthĩ, na mayũa na mĩimũ na makaũ ikeethĩwa wonanyʼo kana we nũtwʼĩkĩte Mũsumbĩ wa ĩtunĩ. Na ũu nĩwʼo kwĩthĩĩtwe. (Mathayo 24:​3-8; Luka 21:11) Maũndũ asu methĩĩtwe monanĩtye kana kuma mwaka 1914, Ũsumbĩ wa Ngai wa ĩtunĩ nĩwaambĩĩie na ‘mĩthenya ya mũminũkĩlyo’ ya walanyʼo ũũ mũthũku wa maũndũ yaambĩĩa.​—⁠2 Timotheo 3:​1-5.