Kũsinda Kĩmanyĩo kya Kwĩkwatanga Mamutha ma Ũsyai

Kwĩkwatanga mamutha ma ũsyai nĩ kana wĩanĩsye wendi wa kũkoma na mũndũ, nĩ kĩmanyĩo kĩtamwendeeasya Ngai, kĩla kĩtonya kũtuma kĩlĩko kya mũndũ kĩvuka, kana kĩkatuma ethĩwa ayĩsũanĩĩa o we mwene mavinda onthe. Mũndũ ũla wĩ na kĩmanyĩo kĩu no ambĩĩe kwona andũ ala angĩ o ta syĩndũ ũtonya kũtũmĩa eanĩsye wendi wa kũkoma na mũndũ ũngĩ. Mũndũ ũsu no ambĩĩe kwona kũmanyana kĩ-mwĩĩ ta nzĩa o ya kwĩtanĩthya na ya kwĩanĩsya wendi wa kĩ-mwĩĩ, vandũ va kwona ũndũ ũsu ta nzĩa ya kwonanyʼa wendo katĩ wa andũ elĩ matwaanĩte. Ĩndĩ kwĩanĩsya wendi ũsu kũimũtethya. Vandũ va ũu, kĩmanyĩo kyu kĩkaa kwongeleela wendi wa mũndũ wa kũtũmĩa mamutha ma mwĩĩ, vandũ va kũmoaa nĩ kana evathane na “ũlaalai, na ũvuku, na mĩmeo mĩthũku.”—Akolosai 3:5.

Mũtũmwa Vaulo aandĩkie ũũ: “Endwa, twĩthesye ene ũvuku wʼonthe wa mwĩĩ na wa ngoo, tũkĩanĩsya ũtheu nthĩnĩ wa kũmũkĩa Ngai.” (2 Akolintho 7:1) Ethĩwa nĩ ũndũ wĩ vinya mũno kwaku kũatĩĩa ndeto isu, ndũkakwʼe ngoo. Mavinda onthe Yeova ethĩawa ‘eyũmbanĩtye kũekea’ na kũtetheesya andũ. (Savuli 86:5; Luka 11:9-13) Vate nzika, ethĩwa nũkwĩwʼa ngoo yaku ĩikũsilĩla, na nĩwĩyumĩtye vyũ kũekana na kĩmanyĩo kĩu, o na kau mavinda kwa mavinda nũtonya kwĩthĩa ũkĩsyokeie, ũu wĩonanyʼa kana nũenda kwĩka kĩla kyaĩle. O na ĩngĩ, lilikana kana “Ngai nĩ mũnene kwĩ ngoo sitũ, na nĩwĩsĩ maũndũ onthe.” (1 Yoana 3:20) Ĩla Ngai watũsisya ndonaa o naĩ sitũ syoka; ĩndĩ nũeleawa nĩ maũndũ onthe ala matũkonetye. Kwĩthĩwa na ũmanyi ũsu nĩkũtumaa atwĩthukĩĩsya e na ĩnee ĩla twamwĩsũva atwĩwʼĩe tei. Kwoou, o tondũ kana kaendaa kwĩ ĩthe ĩla ke thĩnanĩ, ndũkanoe nongi nĩ kũmũvoya Ngai kwa wĩnyivyo na kĩthingʼĩĩsyo, nake akaũnenga wasya mũtheu wa ngoo. (Savuli 51:1-12, 17; Isaia 1:18) Ĩndĩ nĩwaĩle kwosa matambya mana kwosana na mboya syaku. Kwa ngelekanyʼo, no nginya wĩkĩe kĩthito kya kwĩvathana na itindo nthũku na kwĩloela kana kũsoma maũndũ o na meva mavuku makonetye ũlaalai.a

Ethĩwa wĩĩwʼa ũyĩemwa nĩ kũekana na kĩmanyĩo kĩu, tata mũno ũneene na mũsyai waku Mũklĩsto, kana mũnyanyau mũimu kĩ-veva na ũkũthĩnĩkĩaa.b—Nthimo 1:8, 9; 1 Athesalonika 5:14; Tito 2:3-5.