Kũmina Ithokoo Maũndũnĩ ma Viasala

Ĩandĩkonĩ ya 1 Akolintho 6:1-8, mũtũmwa Vaulo nũneenete ĩũlũ wa Aklĩsto kũtwaana kotinĩ. Nũwetete kana ndaaendeewʼa nĩ ũndũ Aklĩsto amwe ma Kolintho ‘mavinganĩasya angĩ mbee wa ala mate alũngalu,’ kana ‘mamatwaaa kotinĩ,’ The Holy Bible in Current Kikamba Language. (Mũsoa wa 1) Vaulo nĩwanenganie itumi nzeo sya kwonanyʼa nĩkĩ Aklĩsto maaĩle kũmina ithokoo katĩ woo kwa kũatĩĩa myolooto ĩla ikundi syanengetwe, vandũ va kũtwaana kotinĩ. Ekai tũsisye maũndũ amwe ala matumie ũtao ũsu ũveveewe nĩ Ngai ũnenganwe, na ĩndĩ tũineenea maũndũ mavũthũ matawetetwe ĩmwe kwa ĩmwe ũtaonĩ ũsu.

Ethĩwa ve kĩthokoo katĩ witũ na mũthaithi ũngĩ ĩũlũ wa viasala kana kĩtheka, ĩtambya ya mbee nĩ kũmina kĩthokoo kyu kwa kũatĩĩa nzĩa ila Yeova ũtũnengete, ĩndĩ ti kwa kũatĩĩa nzĩa sitũ ene. (Nthimo 14:12) O tondũ Yesũ woonanisye, nĩ ũseo vyũ kũmina kĩthokoo kwa mĩtũkĩ kĩtanamba kũtwʼĩka ũndũ mũnene. (Mathayo 5:23-26) Ĩndĩ, ũndũ wa kũmakya nĩ kana Aklĩsto amwe nĩmathokoanaa mũno nginya o na makatwaana kotinĩ. Vaulo aisye atĩĩ: “Nũtwʼĩkĩte wasyo kwenyu, kwĩthĩwa na makoani inywʼĩ kwa inywʼĩ.” Nĩkĩ? Kĩtumi kĩmwe kĩnene nĩ kana, kwĩthĩwa na makoani kana kũtwaana kotinĩ, no kwanange ĩsyĩtwa ĩseo ya kĩkundi na ya Ngai ũla tũthaithaa. Nũndũ wa ũu, nĩtwosaa kwa ũito ĩkũlyo yĩĩ ya Vaulo: “Nĩkĩ ti kavaa kũmĩĩsya ũthũku?”—Mũsoa wa 7.

Ĩngĩ, Vaulo nũwetete kana nthĩnĩ wa kĩkundi Ngai nũnenganĩte mũvango mũseo wa kũmina ithokoo maũndũnĩ maingĩ. Atumĩa ma kĩkundi nĩ aũme Aklĩsto makwatĩte ũĩ kwĩsĩla kwĩmanyĩsya ũwʼo wa Mbivilia, na Vaulo nũwetete kana atumĩa asu ‘nĩmatonya kũtwʼa sila katĩ wa ana-a-ĩthe’ ĩũlũ wa “maũndũ ma thayũ ũũ.” (Mũsoa wa 3-5) Yesũ oonanisye kana ithokoo ikonetye maũndũ maito, ta ũvenani na nzukũ sya kwanangĩa mũndũ ĩsyĩtwa, nĩsyaĩle kũminwa kwa kwosa matambya aa atatũ: (1) andũ ala mathokoanĩte nĩmaĩle kũtata kũmina o mo ene ithokoo ila syĩ katĩ woo; (2) ethĩwa ĩtambya yĩu ya mbee yĩinatethya, nĩmaĩle kwĩta ngũsĩ ĩmwe kana ilĩ; na (3) ethĩwa ĩtambya yĩu ya kelĩ yĩinamina thĩna ũsu, nĩmaĩle kũelesya atumĩa, nũndũ nĩmo maũngamĩte vandũ va kĩkundi.—Mathayo 18:15-17.

Atumĩa Aklĩsto ti mawakili kana akũni ma viasala, na ti wĩa woo kũnengane ũtao ĩũlũ wa maũndũ makonetye mĩao kana viasala. Maimaumĩasya ana-a-asa mĩao ya kũmina ithokoo maũndũnĩ ma viasala kana itheka. Vandũ va ũu, nĩmatataa kũtetheesya ala me na ithokoo matũmĩe Maandĩko nĩ kana mamine thĩna ũsu kwa nzĩa ya mũuo. Ethĩwa ithokoo isu nĩsyaemela, atumĩa no matwʼe kũneena na mũsyaĩĩsya wa mũthyũlũlũko kana ovisi wa ũvonge wa Ngũsĩ sya Yeova. Ĩndĩ, ve maũndũ amwe matawetetwe ĩmwe kwa ĩmwe ũtaonĩ ũsu wa Vaulo. Nĩ maũndũ ta meva?

Mavinda amwe, kũthi kotinĩ nĩkũtonya kwĩthĩwa noyo nzĩa ĩla andũ maatĩĩaa, kana ĩkethĩwa noyo nzĩa ĩla yĩtĩkĩlĩkĩte kĩ-mĩao nĩ kana ithokoo iminwe kwa nzĩa yaĩle, na ya mũuo. Kwa ngelekanyʼo, nĩvatonyeka ũkethĩa kũthi kotinĩ nowʼo ũndũ ũla mũndũ ũtonya kwĩka nĩ kana akwate valũa wa kũthasya mũtwaano, anengwe mwanya wa kwĩkala na mwana wake, amanye mbesa ila waĩle kũnengwa ĩtina wa kũthasya mũtwaano, akwate ndĩvi kwondũ wa wasyo mũna, kana ethĩwe ũmwe katĩ wa ala maĩle kũĩvwa ĩla viasala yathela. O na ĩngĩ no eke ũu kũĩkĩĩthya kana valũa ũla mũndũ ũla mũkwʼũ wĩyĩaĩte ĩũlũ wa malĩ yake, nĩ wa wʼo. Mavinda angĩ mwana-a-asa no alasimĩke kũthi kotinĩ avĩnge ũndũ mũna ũsikatĩwe, nĩ kana akwate ũsũvĩo kwosana na mĩao.a

Ethĩwa Mũklĩsto eĩka ũu ate na veva wa masindano, ĩtambya yu yake nĩyĩtonya kwĩthĩwa yĩte kũleana na ũtao ũla Vaulo waumisye atongoewʼe nĩ veva wa Ngai.b Ĩndĩ, ũndũ ũla Mũklĩsto waĩle kũsũanĩĩa mbee nĩ mũuo na ngwatanĩo ya kĩkundi, o vamwe na kũthewʼa kwa ĩsyĩtwa ya Yeova. Aatĩĩi ma Klĩsto nĩmesĩkĩe mũno nũndũ wa wendo woo, na “wendo . . . ndwĩmanthĩaa syĩndũ [kana “ndwĩyĩunaa wʼo mwene,” NWT].”—1 Akolintho 13:4, 5; Yoana 13:34, 35.