ĨKŨLYO YA 5
Nĩ Ũndũ Wosanĩte na Kĩlĩko Kũĩkĩĩa Mbivilia?
Vo ve ĩvinda andũ angĩ maatuma wĩthĩwa na woni ũtaĩle ĩũlũ wa mũndũ mũna? Noĩthwa weewie maiweta ũndũ mũna ĩũlũ wake kana maiweta ũndũ mũna waneenie. No kwĩthĩwa weesĩ mwakomana ndũkamwenda, ĩndĩ yĩla wamũmanyie nesa, weethĩa kaĩ weekĩte kwawʼa. Andũ aingĩ methĩawa na woni ta ũsu ĩũlũ wa Mbivilia, ĩndĩ yĩla mesa kũmĩmanya nesa, mayĩthĩa kaĩ meekĩte kwawʼa.
Andũ aingĩ asomu nĩmavũthĩtye Mbivilia. We nĩwĩsĩ nĩkĩ? Kaingĩ andũ mawetaa maũndũ ala me Mbivilianĩ kwa nzĩa ĩkũtuma yoneka ĩtosanĩte na kĩlĩko, ĩtosanĩte na saenzi, kana yĩ ya ũvũngũ vyũ. Wʼo nĩ ũndũ ũtonyeka Mbivilia ĩkethĩwa yĩkaa kũwetwa naĩ?
Yĩla we wĩendeee kũsoma kavuku kaa, nũsengʼie wamanya kana kĩla Mbivilia ĩwetaa nĩkyosanĩte na maũndũ ma saenzi? Andũ aingĩ nĩmasengʼaa. O na nĩmasengʼaa mũno mamanya kana Mbivilia ndĩmanyĩasya maũndũ amwe ndĩni mbingĩ syaasya nĩmanyĩasya. Kwa ngelekanyʼo, imwe syaasya Mbivilia ĩmanyĩasya kana Ngai oombie nthĩ, yayaya, vamwe syonthe ila thayũ kwa kĩlungu kya mĩthenya thanthatũ, kĩla ũmwe wĩ na masaa 24. Ĩndĩ ũu ti wʼo nũndũ vai vandũ Mbivilia ĩleanĩte na ũkũũ ũla andũ ma saenzi matalĩthasya tawʼo wa yayaya kana nthĩ.a
Ũndũ ũngĩ nĩ kana, nĩkwĩthĩwa Mbivilia ĩwetete o maũndũ manini ĩũlũ wa ũndũ Ngai wambĩĩisye thayũ ĩũlũ wa nthĩ, kĩu nĩkĩnengete andũ ma saenzi ũthei wa kwĩka ũkunĩkĩli na kũelesya kĩla monie. Mbivilia yaĩtye kana Ngai nĩwe woombie syĩndũ syonthe ila syĩ thayũ, na asyũmbie na “mũthemba wasyo.” (Mwambĩlĩlyo 1:11, 21, 24) Nĩvatonyeka kĩu Mbivilia ĩwetete kĩkethĩwa kĩleanĩte na momanyĩsyo amwe ma saenzi, ĩndĩ nĩkĩtĩkĩlanĩte na maũndũ ma wʼo ma saenzi ala maĩkĩĩthĩtwʼe nesa. Wasisya nesa wĩĩthĩa kana momanyĩsyo ma saenzi mekalaa maivĩndũka, ĩndĩ maũndũ ma wʼo ma saenzi ala maĩkĩĩthĩtwʼe nesa maivĩndũkaa.
Ĩndĩ kwĩ andũ aingĩ maemaa kwĩka ũkunĩkĩli mamanye kĩla Mbivilia ĩmanyĩasya nũndũ wa kũtũlwa ngoo nĩ ndĩni. Masisya ndĩni monaa syusĩe wanganganyʼa, ũlũsani, na masindano. Ĩndĩ nũseo kũvũthya Mbivilia nũndũ wa mwĩkalĩle wa ala mavangaa nĩmamĩatĩĩaa na nĩmamĩsĩ nesa? Kwa ngelekanyʼo, andũ aingĩ ma saenzi me ngoo nzeo nĩmathataa mũno yĩla moona andũ ala mamenete ngo imwe sya andũ mayasya ũmanyĩsyo wa kana syĩndũ syeekie kwĩyumĩlya nũkwete mbau mawoni moo. Ĩndĩ nũseo kũvũthya ũmanyĩsyo ũsu nũndũ wa kĩu andũ asu mekaa? Aiee. Wĩthĩwa wĩ ũseo mũndũ akamba kwĩka ũkunĩkĩli amanye ũndũ ũmanyĩsyo ũsu ũilye, na aiũsianĩsya na ũĩkĩĩthyo ũla wonekete.
O ta ũu, twĩkwĩkĩa vinya wambe kũkunĩkĩla maũndũ ala me Mbivilianĩ. Weeka ũu, nũtonya kũsengʼa mũno wamanya kana maũndũ ala ĩmanyĩasya me kĩvathũkanyʼo vyũ na ala ndĩni mbingĩ imanyĩasya. Kwa ngelekanyʼo, Mbivilia ndĩkĩaa andũ vinya mathi kaũnĩ kana mathĩnyʼe andũ ma ngo imwe, ĩndĩ ĩmanyĩasya kana no nginya athũkũmi ma Ngai mamene kaũ na kĩmena kĩu kĩtumaa andũ mathĩnyʼa ala angĩ. (Isaia 2:2-4; Mathayo 5:43, 44; 26:52) O na ĩngĩ, Mbivilia ndĩkĩaa andũ vinya mamĩatĩĩe na makinda mateũsũanĩa kana mamĩĩkĩĩe oou kĩtumbo mate na ũĩkĩĩthyo. Ĩndĩ ĩmanyĩasya kana mũndũ enda kwĩthĩwa na mũĩkĩĩo wa wʼo, no nginya eke ũkunĩkĩli eyĩĩkĩĩthye kana kĩu ũkũĩkĩĩa nĩ kya wʼo. Na kana no nginya atũmĩe ũtonyi wake wa kũsũanĩa ethĩwa nũkwenda kũmũthũkũma Ngai ũndũ vaĩle. (Alomi 12:1; Aevelania 11:1) Kwoou Mbivilia ndĩtumanasya andũ ũkethĩa maimantha mosũngĩo ma makũlyo ala me na namo, ĩndĩ ĩtumaa twenda kwĩkĩa kĩthito tũmĩsome nĩ kana tũkwate mosũngĩo ma makũlyo ma vata na me vinya ala andũ matwĩe mekũlasya.
Kwa ngelekanyʼo, waaĩkũlya, ‘Ethĩwa kwĩ Ngai, nĩkĩ ũekete mathĩna methĩwe kwʼo?’ Mbivilia nĩsũngĩĩte ĩkũlyo yĩu vamwe na angĩ maingĩ nesa mũno.b Twĩkwĩkĩa vinya ũendeee na kĩthito kĩu wĩ nakyo kya kũmantha mosũngĩo ma makũlyo ala wĩ namo. Weeka ũu, ũkakwataa mosũngĩo maseo vyũ, mosanĩte na kĩlĩko, na maĩkĩĩthĩtwʼe nesa. Na kĩu kĩonanyʼa nesa vyũ kana, o tondũ thayũ ũtaaĩyumĩlya oou kĩtumbo, o nayo Mbivilia na ũvoo wayo iyaaĩyumĩlya oou kĩtumbo.
a Nĩ kana ũkwate ũvoo mwingangĩ, sisya kavuku ke na kyongo, Uhai—Ulitokana na Muumba?, kala kaumĩthĩtwʼe nĩ Ngũsĩ sya Yeova.
b Sisya kĩlungu kya 11 kya ĩvuku Mbivilia Ĩtũmanyĩasya Kyaũ?, yĩla yumĩthĩtwʼe nĩ Ngũsĩ sya Yeova.