Yelemia Ndaaeka Kũtavanyʼa Ĩũlũ wa Yeova

Mavinda angĩ andũ nĩmatũthekeeaa kana makatwĩwʼĩa woo ĩla twamatavya ĩũlũ wa Yeova. Ũndũ ũsu nũtonya kũtuma twĩwʼa tũte kwenda kũtavanyʼa. We waaĩwʼa ũu?— Mbivilia nĩtũtavĩtye ĩũlũ wa mwanake ũmwe ũla wamwendete Yeova. Ĩndĩ mwanake ũsu aĩ vakuvĩ kũeka kũtavanyʼa ĩũlũ wa Yeova. Mwanake ũsu eetawa Yelemia. Eka twĩmanyĩsye maũndũ angĩ ĩũlũ wake.

Ĩla Yelemia waĩ o mwanake, Yeova nĩwamwĩie amatavye andũ maeke kwĩka maũndũ mathũku. Ũsu waĩ ũndũ wĩ vinya mũno kwa Yelemia, na nĩwakĩaa. Kwoou amwĩa Yeova: ‘Nyie ndyĩsĩ kũneena. Nũndũ nyie nĩ o kana.’ Ĩndĩ Yeova amwĩa: ‘Ndũkakĩe, ngakũtetheesya.’

Kwondũ wa ũu, Yelemia nĩwambĩĩie kũmatavya andũ kana makaanangwa malea kũalyũka. Wĩona andũ ta meekie ũndũ Yelemia wameie?— Aiee. Vandũ va kũmwĩthukĩĩsya nĩmamũthekeeie na mamwĩwʼĩa woo mũno. O na amwe nĩmendaa kũmũaa! Wĩona Yelemia ta weewʼaa ata?— Nĩweewie wia na asya: ‘Ndikatavanyʼa ĩngĩ ĩũlũ wa Yeova.’ Ĩndĩ Yelemia nĩwaekie kũtavanyʼa?— Aiee, ndaaeka. Amwendete Yeova mũno ũkethĩa ndesa kũeka kũtavanyʼa ĩũlũ wake. Na nũndũ Yelemia ndaaeka kũtavanyʼa, Yeova nĩwaendeeie kũmũsũvĩa.

Kwa ngelekanyʼo, ĩvinda yĩmwe andũ amwe athũku nĩmamwĩkisye Yelemia ĩimanĩ ĩliku yaĩ ndaka mbingĩ. E vau, ndaĩsaa kana kũnywʼa kĩwʼũ. Andũ asu mendaa Yelemia akwʼĩĩe vau. Ĩndĩ, Yeova nĩwamũtetheeisye auma ĩimanĩ yĩu!

Nĩ kyaũ ũtonya kwĩmanyĩsya kumana na Yelemia?— O na kau mavinda angĩ Yelemia nĩweethĩawa na wia, ndaaeka kũtavanyʼa ĩũlũ wa Yeova. Ĩla ũũtavanyʼa ĩũlũ wa Yeova, andũ nĩmatonya kũũthekeea kana makakwĩwʼĩa woo. Nũtonya kwĩwʼa nthoni kana ũkethĩwa na wia. Ĩndĩ ũu ndũkaaũsiĩĩe kũtavanyʼa ĩũlũ wa Yeova. Akaũtetheeasya kĩla ĩvinda o tondũ wamũtetheeisye Yelemia.