Maũndũ Ala Ũsumbĩ Ũkeanĩsya​—Kũtwʼĩkĩthya Maũndũ Onthe Meũ

KWASŨANĨA ũitwʼa ĩtunda ya mũevo yĩu kuma kaũvongenĩ. Na wamina kũyĩtwʼa, ũiyĩnyungĩa nĩ kenda ũtanĩe kamũuke kayo kaseo, na ĩndĩ ũiyĩkĩa kĩkavũnĩ kyaku kĩla kĩkilyĩ kusũa. Kuma wambĩĩa kũtwʼa matunda asu nĩvavĩtĩte masaa maingĩ, ĩndĩ wĩĩwʼa ũtanesa kũnoa na ũtonya kũendeea na wĩa. Nake inya-a-ku etwʼa matunda mũtĩnĩ wĩ vakuvĩ na vau ũĩ, na ethũkũma na ũtanu aendeee kũea ngewa na anyanyae na andũ angĩ ma mũsyĩ ala mokie kũmũtetheesya kũtwʼa matunda. Eoneka ate mũkũũ, na ailyĩ o ũndũ wailyĩ ĩla wakũeaa wĩ kana kanini, myaka mingĩ mĩvĩtu. O na ndũkũĩkĩĩa kana no we wamwonie aendeee kũkũa e nthĩ ya tene ĩla yaanangiwe. O na ĩngĩ, nĩwoonie ũndũ ũwau wamwonzisye, o na waĩ vo ĩla wakwie, na waĩa mũno ĩvinda ya mathiko make. Ĩndĩ yu e thayũ, vamwe na angĩ aingĩ, na nĩmeũtanĩa thayũ kũte mowau o na amwe!

Nĩtwĩsĩ nesa kana maũndũ makeethĩwa mailyĩ ũu, kĩtumi nũndũ maũndũ ala Ngai wathanĩte no nginya meanĩe. Nthĩnĩ wa ĩsomo yĩĩ, nĩtũkwona maũndũ amwe mathanĩtwe ala Ũsumbĩ ũkilye kwĩanĩsya, mbee wa kaũ wa Ali–Maketoni ũtanambĩĩa. O na ĩngĩ nĩtũkwona maũndũ ma kwendeesya ala Ũsumbĩ ũkeanĩsya ĩtina wa vau. Tũkatana ta kĩ kwĩthĩwa vo ĩla Ũsumbĩ wa Ngai wĩĩthĩwa ũsumbĩkĩte nthĩ yonthe, na kũtwʼĩkĩthya maũndũ onthe meũ!