KĨLUNGU KYA MBEE
“Ngamantha Ũla Waĩte”
Kwasũanĩa ĩlondu yĩĩ kĩthekanĩ na yaaa. Nokwĩthĩwa yĩtiiwe nĩ malondu ala angĩ yĩendeee na kũya nyeki. Na yĩyĩsa kũvindũka ĩyĩthĩa ĩyene mũĩthi na malondu ala angĩ, na saa isu kũendeee na kũtuka. Yaĩie myandanĩ, kũndũ kwĩ nyamũ mbai sya kĩthekanĩ na yĩi na mũndũ ũyĩsũvĩa. Ĩtina yĩyĩsa kwĩwʼa wasya yĩwĩsĩ wa mũĩthi. Mũĩthi ũsu aisemba vala yĩĩ, aiyosa, aiyĩlinga na ngũa yake, na aiyĩkua nginya mũsyĩ.
MAVINDA maingĩ Yeova eyĩelekanasya na mũĩthi ta ũsu. Nthĩnĩ wa Ndeto yake aĩtye atĩĩ: “Nyie, ngakũlĩĩlya malondu makwa, na kũmamantha.”—Esekieli 34:11, 12.
“Malondu ma Kĩsesi Kyakwa”
Malondu ma Yeova naaũ? Kwa ũkuvĩ, malondu ma Yeova nĩ andũ ala mamũthaithaa na mamwendete. Mbivilia yaĩtye: “Tũthaithe na kwĩkunamya; Tũmũtulĩlyei ndu Yeova Mũmbi waitũ: Nũndũ nĩwe Ngai waitũ, na ithyĩ twĩ andũ ma ĩĩthya yake, na malondu ma kwʼoko kwake.” (Savuli 95:6, 7) O tondũ malondu mendete mũno kũatĩĩa mũĩthi wamo, nowʼo athaithi ma Yeova mendete kũatĩĩa Mũĩthi woo. Yo ũu nĩ kwasya kana mo mayĩkaa naĩ? Aiee. Mavinda amwe athũkũmi ma Ngai nĩmesaa kwĩthĩwa me “malondu manyaĩĩku,” “malondu mau,” na makethĩwa ‘maĩte ta malondu.’ (Esekieli 34:12; Mathayo 15:24; 1 Vetelo 2:25) Ĩndĩ o na vailyĩ ũu, ĩla mũndũ weelelũka, Yeova nĩwĩthĩawa na wĩkwatyo kana mũndũ ũsu akamũsyokea.
We no wasye kana o na yu Yeova nĩ Mũĩthi waku? Yeova onanasya ata kana we nĩ Mũĩthi ũmũnthĩ? Ekai twone nzĩa itatũ:
Nũtũĩthasya kĩ-veva. Yeova aĩtye atĩĩ: “Ngamaĩthya kĩsesinĩ kĩseo,” ongeleele kwasya, “Nĩkwʼo makakoma kyengonĩ kĩseo; na makaĩthwʼa kĩsesinĩ kĩnou.” (Esekieli 34:14) Ĩvinda yonthe Yeova nũtũnengae lĩu mũseo wa kĩ-veva ĩvindanĩ yĩla yaĩle. Yo no ũlilikane kĩlungu wasomie mavukunĩ maitũ, ũvoo weethukĩĩisye, kana vitio yatumie ũkwata ũsũngĩo wa mboya yaku? No nginya ũndũ ũsu wĩthĩwe wakũĩkĩĩthisye nesa vyũ kana Yeova nũkũthĩnĩkĩaa!
Nũtũsũvĩaa na kũtwĩkĩa vinya. Yeova athanĩte atĩĩ: “Ngatũnga ũla walũngilwʼe, na ngooveea ũla watũlĩtwe, na ngeekĩa vinya ũla wawaie.” (Esekieli 34:16) Yeova nũmekĩaa vinya ala maemeewe nĩ mawĩmakĩo. Nĩwovaa malondu make ala maũmĩu, na aimatetheesya mavoe o na ethĩwa maũmĩĩtwʼe nĩ athaithi ala angĩ. Nũtũngaa ala meelelũkile, na methĩawa na mawoni mataĩle ĩũlũ woo ene.
Nũtũthĩnĩkĩaa. Yeova easya atĩĩ: “Ngamaumya kũndũ kwʼonthe kũla manyaĩĩkĩtwʼe,” aendeee kwasya, “Ngamantha ũla waĩte.” (Esekieli 34:12, 16) Ĩla mũndũ weelelũka, Yeova nĩwĩthĩawa esĩ kana no amũsyokee. Yeova nĩwĩthĩawa esĩ ĩla ĩlondu yaaa, na nũyĩmanthaa, na ayona nũtanaa mũno. (Mathayo 18:12-14) Ũu nĩ wʼo nũndũ aĩtye kana athũkũmi make nĩ, ‘malondu make, malondu ma kĩsesi kyake.’ (Esekieli 34:31) We wĩ ũmwe wa malondu asu make.
Ĩla mũndũ weelelũka, Yeova nĩwĩthĩawa esĩ kana no amũsyokee. Nũtanaa mũno ĩla mũndũ ũsu wamũsyokea
“Eũvya Mĩthenya Yaitũ O ta Tene”
Nĩkĩ Yeova ũkũũmantha na kũũthokya ũmũsyokee? Nũndũ endaa wĩthĩwe na ũtanu. Athanĩte kana “kũkeethĩwa mĩono [“mbua nene,” NWT] ya ũathimo” kwa malondu make. (Esekieli 34:26) Watho ũsu nĩ wa wʼo nũndũ we mwene nĩwĩyoneete Yeova aikũathima.
Kwasũanĩa ĩũlũ wa maũndũ maseo ala weeyoneie ũyĩmanyĩsya ĩũlũ wa Yeova. Kwa ngelekanyʼo, weewie ata ĩla wamanyie ĩsyĩtwa ya Ngai, na kĩeleelo kyake kwa andũ? Nũlilikene ũndũ weewʼaa mũyo ĩla wakomana na athaithi ma Yeova maũmbanonĩ manene? Nao nata ĩla watavanasya na ũikwata mũndũ ũkwendeewʼa nĩ ũvoo mũseo, yo ndwasyokaa mũsyĩ wĩwʼĩte mũyo na wĩ mwĩanĩe?
O na ũmũnthĩ no wĩthĩwe na ũtanu ũsu ĩngĩ. Athũkũmi ma Ngai ma ĩvinda ya tene mavoyie atĩĩ: “Tũthyũũe ithyĩ kwaku, ame Yeova, na tũkathyũũĩka; Eũvya mĩthenya yaitũ o ta tene.” (Iĩo 5:21) Yeova nĩwasũngĩie mboya ĩsu, na andũ make masyokea ĩngĩ kũmũthũkũma me atanu. (Neemia 8:17) O ta ũu, Yeova nũkasũngĩa mboya syaku.
Ĩndĩ kũmũsyokea Yeova ti ũndũ wĩ laisi. Kwaeka twone maũndũ amwe matonya kũtuma ũsu wĩthĩwa wĩ ũndũ wĩ vinya, na tũyona ũndũ tũtonya kũkĩlya maũndũ asu vinya.