Mũsikalĩ wa Yela Nĩwemanyĩisye Ũwʼo

Vaĩ na kelĩtu kamwe kaĩ ngombo kalikĩtwe nĩ ndaimoni na kekalaa ndũanĩ ya Vilivi. Kelĩtu kau nĩkatumaa mavwana mako makwata mbesa mbingĩ nũndũ wa ũtonyi ũla kaĩ nawʼo wa kwathana maũndũ ma ĩvinda yũkĩte. Yĩla Vaulo na Sila maĩ ndũanĩ ya Vilivi, kelĩtu kau katindĩaa kũmaatĩĩa. Kavika vakuvĩ na Vaulo na Sila, ndaimoni ĩsu yatumaa kaneena na wasya mũnene kayasya: “Andũ aa nĩ ngombo sya Ngai Ũla wĩ Ĩũlũ wa Onthe.” Ĩndĩ ĩtina wa ĩvinda, Vaulo esie kũtavya ndaimoni ĩsu atĩĩ: ‘Ĩsyĩtwanĩ ya Yesũ, uma nthĩnĩ wa kelĩtu kaa!’ Ndatĩkanĩ ĩsu, ndaimoni ĩsu nĩyaumie.

Yĩla mavwana ma kelĩtu kau meethĩie kana yu kaikatumaa makwata mbesa, nĩmathatie mũno. Nĩmamakusũlanilye Vaulo na Sila na mamatwaa kwa asili ma makoani, mayasya: ‘Andũ aa nĩmeũtũla mĩao na nĩmekũete ithokoo ndũanĩ.’ Asili ma makoani nĩmaisye Vaulo na Sila makũnwe na mayĩkwʼa yela. Mũsikalĩ wa yela amekisye kasũmbanĩ ka yela kala ke nthĩnĩ vyũ na kaĩ na kĩvindu kingĩ, na ooveea maaũ moo katĩ wa mbwaũ ilĩ ngito.

Ũtukũ ũsu Vaulo na Sila nĩmambĩĩie kwina na avungwa ala angĩ nĩmamethukĩĩsye. Na vatataĩĩwe, nĩvaumĩlile kĩthingitho kĩnene ũtukũ katĩ, na nyũmba ĩla avungwa asu moovetwe yathingitha na mĩomo yayo yavingũkanga. O na syĩndũ ila syoovete avungwa asu nĩsyathalĩkangile. Maũndũ asu nĩmatumie mũsikalĩ wa yela asemba akasisye kĩla kyaendeea, na yĩla wavikie eethĩa mĩomo ya yela yĩ mĩvingũkangu. Oona ũu, nĩwatelemile mũno ayona avungwa ta matolokile, na oosa ũvyũ eyũae.

Ndatĩkanĩ ĩsu, Vaulo amwĩa: ‘Ndũkeyĩũmĩsye. Ithyonthe twĩ o vaa.’ Yĩla Mũsikalĩ weewie ũu, nĩwasembie alika vala Vaulo na Sila maĩ, na avalũka mbee woo. Na ĩndĩ amakũlya: “Naĩle kwĩka ata nĩ kana nĩtangĩĩwe?” Namo mamwĩa: ‘We vamwe na andũ maku ma mũsyĩ nĩmwaĩle kũmũĩkĩĩa Yesũ.’ Kuma vau, Vaulo na Sila nĩmamamanyĩisye ndeto ya Yeova, na mũsikalĩ ũsu vamwe na andũ make onthe ma mũsyĩ mavatiswa.