Mbivilia Ĩtũtavĩtye Ũvoo Umĩte kwa Ngai

Yeova nũtũnengete Mbivilia, ĩla yĩthĩawa na mavuku 66 me kĩvathũkanyʼo. Ũũ nĩ mũthĩnzĩo wa vata mũno. Ĩndĩ o na vailye ũu no wĩkũlye-ĩ, ‘Yo Mbivilia yaumie va? Mũandĩkĩthya wayo nũũ?’ Nĩ kana tũsũngĩe makũlyo asu, eka twone ũndũ ũvoo ũla wĩ Mbivilianĩ wavikĩie andũ.

1. Ethĩwa andũ nĩmo maandĩkie Mbivilia, nĩkĩ vatwʼĩkaa Ngai nĩwe Mũandĩkĩthya wayo?

Mbivilia yaandĩkiwe nĩ aandĩki ta 40 vandũ va ĩvinda ya myaka ta 1,600. Yambĩĩie kũandĩkwa kuma mwaka wa 1513, mbee wa Klĩsto, nginya mwaka wa 98 ũu, ĩtina wa Klĩsto. Na aandĩki mayo maĩ kĩvathũkanyʼo mũno. Ĩndĩ o na vailye ũu, ũvoo wʼonthe ũla wĩ Mbivilianĩ nĩwosanĩte. Ũu ũtonyeka ata? Ũu watonyekie nĩkwĩthĩwa Ngai nĩwe Mũandĩkĩthya wa Mbivilia. (Soma 1 Athesalonika 2:13.) Aandĩki ma Mbivilia mayaandĩka mosũanĩo moo ene. Ĩndĩ vandũ va ũu, “maneenie kĩla kyaumie kwa Ngai kwosana na ũndũ veva mũtheu wamatongoesye.”a (2 Vetelo 1:21) Ngai atũmĩie veva wake mũtheu nĩ kana ũtongoesye aũme ala maandĩkaa mosũanĩo make.—2 Timotheo 3:16.

2. Naaũ ala matonya kũtetheka nĩ ũvoo ũla wĩ Mbivilianĩ?

Andũ kuma “kĩla mbaĩ na ũko na kĩthyomo,” no matetheke nĩ ũvoo mũseo ũla wĩ Mbivilianĩ. (Soma Ũvuanyʼo 14:6.) Ngai nĩwaĩkĩĩthisye kana Mbivilia no ĩkwatĩkane kwa ithyomo mbingĩ kwĩ ĩvuku yĩngĩ o na yĩva yaandĩkwa. Vakuvĩ kĩla mũndũ no akwate na akasoma Mbivilia. Na ũndũ ũsu nĩ wa wʼo o na ethĩwa mũndũ aumĩte va kana aneenaa kĩthyomo kĩva.

3. Yeova eekie ata nĩ kana asũvĩe Mbivilia ndĩkanangwe?

Mbivilia yaandĩkiwe syĩndũnĩ itamba kwĩkala ĩvinda yĩasa, ta ithuma na makangaa. Ĩndĩ andũ ala mendete Mbivilia nĩmamyumĩĩisye nesa ĩngĩ na ĩngĩ maiandĩka na moko. O na kau ve andũ amwe maĩ na ũkũmũ mendaa kũmina Mbivilia vyũ, ve andũ angĩ matwʼĩte vyũ kũmĩsũvĩa, o na malikasya mathayũ moo mũisyonĩ nĩ kana meke ũu. Yeova ndaaĩsa kwĩtĩkĩlya mũndũ o na ũmwe, kana kĩndũ o na kĩva kĩtũsiĩĩe tũikaneenanyʼe nake. Mbivilia yaĩtye atĩĩ: “Ndeto ya Ngai waitũ ĩkekala tene na tene.”—Isaia 40:8.

ĨMANYĨSYE MŨNANGO

4. Mbivilia nĩvuanĩtye Mũandĩkĩthya wayo

Ĩloelei VITIO. Ĩtina wa ũu, somai 2 Timotheo 3:16, na ĩndĩ mũineenea makũlyo aa maatĩĩe:

VITIO: Mũandĩkĩthya wa Mbivilia Nũũ?​—Kalungu ka Vitio (2:48)

• Ethĩwa andũ nĩmo maandĩkie Mbivilia, nĩkĩ yĩtawa Ndeto ya Ngai?

• We nũkwona wĩ ũndũ ũkwosana na kĩlĩko kũĩkĩĩa kana Ngai nĩweekĩie mosũanĩo make ilĩkonĩ sya aũme ala maandĩkaa Ndeto Yake?

5. Andũ nĩmaemiwe nĩ kũmina Mbivilia

VITIO: Nĩmoonaa Mbivilia yĩ ya Vata—Kalungu ka Vitio (William Tyndale) (6:17)

• We nũkwĩwʼa wĩ na mea ma kũsoma Mbivilia mũnango wasũanĩa kĩthito kingĩ kĩla kyeekĩiwe nĩ kana ĩsũvĩwe ndĩkanangwe? Nĩkĩ wasũngĩa ũu?

Somai Savuli 119:97, na ĩndĩ mũineenea ĩkũlyo yĩĩ:

• Nĩ kyaũ kyatumie andũ aingĩ matwʼa kũlikya mathayũ moo mũisyonĩ nĩ kana maalyũle Mbivilia na maimĩnyaĩĩkya?

6. Ĩvuku ya andũ onthe

Mbivilia nĩyo ĩvuku yĩla yĩalyũlĩtwe na yĩkanyaĩĩkwʼa mũno kwĩ ĩvuku yĩngĩ o na yĩva. Somai Meko ma Atũmwa 10:34, 35, na ĩndĩ mũineenea makũlyo aa:

• Nĩkĩ Ngai wendaa Ndeto yake ĩalyũlwe na ĩinyaĩĩkwʼa mũno?

• Nĩ kyaũ kĩũkwendeesya ĩũlũ wa Mbivilia?

KĨLA TWEEMANYĨSYA

Mbivilia nĩ Ndeto ya Ngai, na nũĩkĩĩthĩtye kana andũ onthe no mamĩkwate.

Makũlyo ma Kũsyokeleela

• Yeova aveveeie aũme ala maandĩkie Mbivilia ata?

• Nĩ kyaũ kĩũkwendeesya wasũanĩa ũndũ Mbivilia ĩsũvĩĩtwe ndĩkanangwe, ĩkaalyũlwa, na ũndũ ĩnyaaĩĩkĩtwʼe?

• We wĩĩwʼa ata wasũanĩa kĩthito kĩla Ngai wĩkĩĩte nĩ kana aneene naku?

MAŨNDŨ ANGĨ MA KWĨMANYĨSYA

Soma ngewa ya Mbivilia, kwambĩĩa yĩla mavuku ma kũkũnzwa matũmĩawa nginya yu tũtũmĩaa mavuku matumbĩthye.

“Ũndũ Mbivilia Yatũvikĩie” (Amkeni!, Mwei wa 11, 2007)

Ĩmanyĩsye ĩũlũ wa maũndũ atatũ ala mesaa kũtuma Mbivilia ĩthela, ĩndĩ yavonoka.

“Mbivilia Yumĩte Vaasa!” (Mũsyaĩĩsya Na. 4 2016)

Ĩloele wone andũ ala malikilye mathayũ moo mũisyonĩ nĩ kana maalyũle Mbivilia.

Nĩmoonaa Mbivilia yĩ ya Vata (14:26)

Mbivilia nĩyumĩĩwʼe na ĩkaalyũlwa mavinda maingĩ. Ve ũndũ ũtonya kũĩkĩĩthya kana ũvoo ũla wĩ nthĩnĩ wayo ndwaavĩndũwa?

“Ũvoo Ũla wĩ Mbivilianĩ Nĩmũvĩndũe?” (Ũvoo wĩ kĩsesenĩ)