ĨSOMO YA 19
Ngũsĩ sya Yeova Nĩ Aklĩsto ma Wʼo?
Ithyĩ Ngũsĩ sya Yeova tũĩkĩĩaa kana twĩ Aklĩsto ma wʼo. Nĩkĩ? Kwasũanĩa mũsingi wa maũndũ ala tũĩkĩĩaa, ĩsyĩtwa yitũ yĩla yĩtumaa twĩthĩwa twĩ kĩvathũkanyʼo na ndĩni ila ingĩ, na wendo ũla twonanasya ithyĩ ene.
1. Maũndũ ala Ngũsĩ sya Yeova iĩkĩĩaa maumĩte va?
Yesũ aisye atĩĩ: “Ndeto [ya Ngai] nĩyo wʼo.” (Yoana 17:17) O ta Yesũ, maũndũ ala Ngũsĩ sya Yeova iĩkĩĩaa methĩawa maumanĩte na Ndeto ya Ngai. Kwa ngelekanyʼo, sũanĩa ĩũlũ wa isitoli ya Ngũsĩ sya Yeova, ila mbeenĩ syeetawa amanyĩwʼa ma Mbivilia. Ta myakanĩ ya 1870, kĩkundi kĩmwe kya amanyĩwʼa asu nĩkyambĩĩie kũkunĩkĩla nesa ũndũ Maandĩko maĩtye. Kuma vau, nĩmambĩĩie kũĩkĩĩa kĩla Mbivilia yawetie o na ethĩwa kĩyoosanĩte na kĩla ndĩni mbingĩ syamanyĩasya. O na nĩmambĩĩie kũtavya andũ angĩ ũwʼo ũla wĩ Mbivilianĩ.a
2. Nĩkĩ twĩyĩtaa Ngũsĩ sya Yeova?
Yeova etĩte athaithi make Ngũsĩ syake nũndũ nĩmatavanasya ũwʼo ĩũlũ wake. (Aevelania 11:4–12:1) Kwa ngelekanyʼo, ĩvindanĩ ya tene Ngai eeie andũ make atĩĩ: “Inywʼĩ mwĩ ngũsĩ syakwa.” (Soma Isaia 43:10.) O nake Yesũ etĩtwe “Ngũsĩ Ndĩkĩĩku.” (Ũvuanyʼo 1:5) Nũndũ wa kĩtumi kĩu, mwakanĩ wa 1931, nĩtwambĩĩie kwĩtwa Ngũsĩ sya Yeova. Twĩwʼaa ne kĩanda kya mwanya mũno kwĩtwa ĩsyĩtwa yĩu.
3. Ngũsĩ sya Yeova syonanasya wendo ata ta Yesũ?
Yesũ endete amanyĩwʼa make mũno, nginya amonaa ta andũ make ma mũsyĩ. (Soma Maliko 3:35.) O ta ũu, Ngũsĩ sya Yeova ĩũlũ wa nthĩ yonthe methĩawa me ngwatanĩo ta andũ ma mũsyĩ ũmwe. Na nĩkyo kĩtumi twĩtanaa ana-a-asa kana eĩtu-a-asa. (Vilemona 1, 2) O na ĩngĩ, nĩtũatĩĩaa mwĩao ũũ tũnengetwe Mbivilianĩ: “Endai ana-a-asa menyu onthe.” (1 Vetelo 2:17) Ngũsĩ sya Yeova nĩsyonanasya wendo ũsu kwa nzĩa mbingĩ syĩ kĩvathũkanyʼo. Ta kwa ngelekanyʼo, nĩtũtetheeasya ana-a-asa na eĩtu-a-asa maitũ ĩũlũ wa nthĩ yonthe yĩla me thĩnanĩ.
ĨMANYĨSYE MŨNANGO
Ĩmanyĩsye mũnango ĩũlũ wa isitoli ya Ngũsĩ sya Yeova, na ũyona maũndũ angĩ mekũĩkĩĩthya kana mo nĩ Aklĩsto ma wʼo.
Aklĩsto ma wʼo maĩkĩĩaa o kĩla kĩ Mbivilianĩ na nĩmatavasya andũ angĩ ĩũlũ wa maũndũ ala maĩkĩĩĩte
4. Maũndũ ala tũĩkĩĩaa maumĩte Mbivilianĩ
Yeova nĩwathanie kana ũwʼo ũla wĩ Mbivilianĩ ũkavuanwʼa. Somai Ndanieli 12:4, na ĩndĩ mũineenea ĩkũlyo yĩĩ:
Nĩ kyaũ kyaĩ ‘kyongeleke’ katĩ wa andũ ma Ngai o ũndũ maendeee kwĩmanyĩsya Mbivilia?
Ĩloelei vitio mwone ũndũ kĩkundi kĩmwe kya amanyĩwʼa ma Mbivilia, ala nĩ vamwe na Charles Russell, meemanyĩisye Ndeto ya Ngai. Ĩloelei VITIO, na ĩndĩ mũineenea ĩkũlyo yĩla yĩatĩĩe.
Kwosana na ũndũ twoona vitionĩ, Charles Russell na amanyĩwʼa ala angĩ ma Mbivilia meemanyĩisye Mbivilia ata?
We nĩwĩsĩ?
Mavinda kwa mavinda, nĩtwĩthĩĩtwe tũivĩndũa maũndũ amwe tũĩkĩĩaa. Nĩkĩ? O tondũ syũa yumaa na kũithi kũkenũkĩte o kavola kwa kavola, nowʼo Ngai ũendeee kũvuanyʼa ũwʼo ũla wĩ Ndetonĩ yake kavola kwa kavola. (Soma Nthimo 4:18.) Kwoou, o na kau Mbivilia ndĩalyũkaa, nĩtũvĩndũaa maũndũ ala tũĩkĩĩaa o ũndũ ũmanyi witũ ĩũlũ wa Mbivilia ũendeee kwongeleka.
5. Nĩtwĩkalaa kwosana na ĩsyĩtwa yitũ
Nĩkĩ twambĩĩie kwĩtwa Ngũsĩ sya Yeova? Ĩloelei VITIO, na ĩndĩ mũineenea ĩkũlyo yĩla yĩatĩĩe.
Nĩkĩ tũtonya kwasya kana ĩsyĩtwa Ngũsĩ sya Yeova nĩyaĩlĩte vyũ?
Nĩkĩ Yeova ũnyuvĩte andũ amwe methĩwe Ngũsĩ syake? Ekĩte ũu nĩ kana andũ asu matavye ala angĩ ũwʼo ĩũlũ wake. Na kĩtumi nũndũ andũ aingĩ ũmũnthĩ nĩmamanyĩĩtwʼe maũndũ maingĩ ma ũvũngũ. Kwasũanĩa maũndũ elĩ katĩ wa asu.
Ndĩni imwe imanyĩasya kana Ngai endaa matũmĩe mĩvwʼanano ũthaithinĩ woo. Ĩndĩ o na ũu wĩ o vo, somai Alivai 26:1, na ĩndĩ mũineenea makũlyo aa:
Mbivilia ĩmanyĩasya ata? Yeova onaa mĩvwʼanano ata?
Atongoi amwe ma ndĩni mamanyĩasya kana Yesũ nĩ Ngai. Ĩndĩ o na ũu wĩ o vo, somai Yoana 20:17, na ĩndĩ mũineenea makũlyo aa:
Mbivilia ĩmanyĩasya ata? We Yesũ nĩ Ngai?
We weewʼa ata wamanya kana Yeova nũtũmĩte Ngũsĩ syake ikatavanyʼe ũwʼo ĩũlũ wake na Mwana wake?
6. Nĩtwendanĩte ithyĩ ene
Mbivilia yĩelekanĩtye Aklĩsto na mamutha me kĩvathũkanyʼo ma mwĩĩ wa mũndũ. Somai 1 Akolintho 12:25, 26, na ĩndĩ mũineenea makũlyo aa:
Aklĩsto ma wʼo maĩlĩte kwĩka ata yĩla Aklĩsto ala angĩ me thĩnanĩ?
We nĩwĩyoneete kana Ngũsĩ sya Yeova methĩawa mendanĩte?
Yĩla amwe ma Ngũsĩ sya Yeova me thĩnanĩ, Ngũsĩ ila ingĩ kuma kũndũ kwĩ kĩvathũkanyʼo ĩũlũ wa nthĩ nitataa kũtetheesya na mĩtũkĩ ũndũ vatonyeka. Nĩ kana wone ngelekanyʼo ĩmwe, ĩloelei VITIO. Na ĩndĩ mũineenea ĩkũlyo yĩla yĩatĩĩe.
Mũvango ũla Ngũsĩ sya Yeova syĩthĩawa nawʼo wa kũnengane ũtethyo wonanasya ata kana nĩmendanĩte?
Aklĩsto ma wʼo nĩmonasya ala me thĩnanĩ wendo
ANDŨ AMWE MAASYA: “Ngũsĩ sya Yeova no ndĩni ĩnambĩĩiwʼe mĩtũkĩ.”
Yeova ambĩĩie kwĩta athaithi make Ngũsĩ syake ĩndĩĩ?
KĨLA TWEEMANYĨSYA
Ngũsĩ sya Yeova nĩ Aklĩsto ma wʼo. Twĩthĩawa twĩ ngwatanĩo ta andũ ma mũsyĩ ũmwe wa nthĩ yonthe, na maũndũ ala tũĩkĩĩaa maumĩte Mbivilianĩ. O na ĩngĩ, nĩtũtavasya andũ angĩ ũwʼo ĩũlũ wa Yeova.
Makũlyo ma Kũsyokeleela
Nĩkĩ twambĩĩie kwĩtwa Ngũsĩ sya Yeova?
Twonanasya ata kana nĩtwendanĩte?
We nũkwona Ngũsĩ sya Yeova ta Aklĩsto ma wʼo?
MAŨNDŨ ANGĨ MA KWĨMANYĨSYA
Ĩmanyĩsye mũnango ĩũlũ wa isitoli ya Ngũsĩ sya Yeova.
Ngũsĩ sya Yeova—Mũĩkĩĩo wĩ na Meko, Kĩlungu kya 1: Kuma Kĩvindunĩ (1:00:53)
Sisya wone ngelekanyʼo ĩmwe yonanĩtye ũndũ Ngũsĩ sya Yeova ivuanĩtye momanyĩsyo ma ũvũngũ.
Soma nĩ kana ũkwate mosũngĩo ma makũlyo ala wĩkũlasya ĩũlũ wa Ngũsĩ sya Yeova.
“Makũlyo Makũlawʼa Mavinda Maingĩ Ĩũlũ wa Ngũsĩ sya Yeova” (Ũvoo wĩ kĩsesenĩ)
Mũndũũme ũmwe wĩtawa Stephen nĩwamenete andũ ma mbaĩ ingĩ mũno. Soma wone kĩla woonie vala ve Ngũsĩ sya Yeova na kyatuma eka moalyũku.
“Naendeee na kũthũkĩĩa” (Mũsyaĩĩsya, Ĩtukũ 1, Mwei wa 7, 2015)
a Kuma mwaka wa 1879, andũ ma Yeova nĩmethĩĩtwe maitũmĩa ĩkaseti ya Mũsyaĩĩsya, kũelesya ũwʼo ũla wĩ Mbivilianĩ.