Kũkw’ĩĩwa Kwĩ Woo

Andũ aingĩ mayendete kũea ngewa sya kĩkw’ũ. Monaa nĩ kavaa makaea ngewa ingĩ. Ĩndĩ o na vailyĩ ũu, tũilea kwĩsa kũkw’ĩĩwa. Nakw’o kũkw’ĩĩwa kwĩ kyeva na woo mwingĩ.

Vai mũndũ ũtonya kwasya nĩwĩyũmbanĩsye nesa vyũ kũkw’ĩĩwa nĩ mũsyai, mũndũ ũla ũtwaanĩte nake, kana mwana. Mũndũ nũtonya kũkw’a mĩtũkĩ tũtataĩĩe, kana akesa kũkw’a ĩtina wa ĩvinda ĩasa. Ĩndĩ o na ethĩwa vailyĩ ata, tũitonya kwĩsiĩĩa tũikakwatwe nĩ kyeva kĩla kĩkwataa mũndũ ĩla wakw’ĩĩwa, na kĩkw’ũ nĩkĩtonya kũtuma tũtelema na tũkakw’a ngoo vyũ.

Kwa ngelekany’o, ĩthe wa Antonio akimiwe nĩ ngalĩ na akw’a ĩtina wa mĩthenya mĩvũthũ. Antonio easya ũũ: “No ũndũ ũmwe na mũndũ wavinga nyũmba yaku na kĩvulĩ, na aithi na ũvungũo, na ũyĩthĩa ndũtonya kũlika nyũmba ĩsu ĩngĩ o na ethĩwa no kwa kavinda. Ũkeekaa kũlilikana o ũndũ nyũmba yaku yailyĩ nthĩnĩ nũndũ ndũkaamĩlika ĩngĩ. O na kau no wone ta waveny’a naĩ nũndũ wĩona vate mũndũ waĩle kũkwĩka ũu, vai ũndũ ũtonya kwĩka ũtũnge maũndũ ũndũ meeilyĩ.”

Nake Dorothy nĩwakw’ĩĩwe nĩ mũũme e na myaka 47, na nũndũ wa ũu nĩwatatie mũno kũmantha mosũngĩo ma makũlyo mana wekũlasya. O na kau aĩ mwalimũ wa Sunday ĩkanisanĩ yĩla waendaa ya Anglican na nĩweesĩ kĩkw’ũ tikyo mũthya witũ, ve maũndũ amwe ũtaeleawa. Ĩvinda yĩmwe akũlilye mũtavany’a wa ĩkanisa yake ũũ: “Nĩ kyaũ kĩtũkwataa ĩla twakw’a?” Ĩndĩ mũtavany’a ũsu amũsũngĩie, “Vai mũndũ wĩsĩ. No tweteelile tũkw’e nĩ kana twĩyonee.”

Ĩndĩ yo no mũvaka ‘tweteele tũkw’e nĩ kana twĩyonee’? Kana ve kĩndũ kĩtonya kũtũtetheesya tũkamanya ethĩwa kĩkw’ũ nĩkyo mũthya witũ?