MOSŨNGĨO MA MAKŨLYO MA MBIVILIA
Ũtonya kwĩthĩwa wĩ mũsyai mũseo ata?
We nũmanyĩasya kana kaku kũmwenda Ngai?
Mũsyĩ ũla wĩthĩawa na asyai mendanĩte na manenganĩte ndaĩa wĩthĩawa ne vandũ vaseo va kũeea syana. (Akolosai 3:14, 19) Asyai aseo nĩmethĩawa mendete syana syoo na nĩmaikathaa o tondũ Yeova wakathie Mwana wake.—Soma Mathayo 3:17.
Ĩthe witũ wa ĩtunĩ nĩwĩthukĩĩasya athũkũmi make na nũthĩnĩkĩaa ũndũ mekwĩw’a. Kwoou, wĩthĩwa wĩ ũndũ mũseo asyai makemanyĩsya kuma kwake na mayĩthukĩĩasya ũndũ syana syoo syĩkũmatavya. (Yakovo 1:19) Nĩmaĩle kwendeeaw’a nĩ kũmanya ũndũ syana syoo syĩkwĩw’a, o na ĩla syĩ na mawoni mataĩle.—Soma Motalo 11:11, 15.
Ũndũ ũtonya kũea syana syaku syĩthĩwe na mwĩkalĩle mũseo
Wĩ mũsyai, wĩthĩawa wĩ na ũkũmũ wa kumya mĩao. (Aeveso 6:1) Ĩmanyĩsye kumana na ngelekany’o ya Ngai. Onanasya kana nĩwendete syana syake kwa kũelesya mĩao yake nesa, na kwa kwonany’a ũthũku wa kũlea kũmĩatĩĩa. (Mwambĩlĩlyo 3:3) Vandũ va kũlasimĩthya andũ methĩwe me ew’i, amamanyĩasya ũndũ matonya kũtetheka meeka maũndũ ala maĩlĩte.—Soma Isaia 48:18, 19.
Eka kĩeleelo kyaku kĩthĩwe ne kũtetheesya syana syaku imwende Ngai. Weeka ũu, syana syaku ikeekaa motwi maseo o na ĩla ũte vakuvĩ nasyo. O tondũ Ngai ũmanyĩasya kwa kwĩthĩwa e ngelekany’o nzeo, manyĩasya syana syaku kũmwenda Ngai kwa ngelekany’o yaku nzeo.—Soma Kũtũngĩlĩlwa Kwa Mĩao 6:5-7; Aeveso 4:32; 5:1.