Ũndũ Kĩkwʼũ Kĩkavetwa

O NA kau kũlea kwĩwʼa kwa asyai maitũ ma mbee, Atamu na Eva, nĩkwaeteie andũ onthe naĩ na kĩkwʼũ, kũyaavĩndũa kĩeleelo kya Ngai kwelekela andũ. Nthĩnĩ wa Ndeto yake, Mbivilia, Ngai nũtũĩkĩĩthĩtye kana kĩeleelo kyake kĩyaavĩndũka.

• “Ala alũngalu makatiĩwa nthĩ, na makatũa vo kũvika tene na tene.” —Savuli 37:29.

• “Nũmeletye kĩkwʼũ tene na tene; na Mwĩaĩi Yeova akavyaĩa methoi mothyũnĩ onthe.”—Isaia 25:8.

• “Mũmaitha wa mũthya ũla ũkaminwa nĩ kĩkwʼũ.”—1 Akolintho 15:26.

• “Kĩkwʼũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo.”—Ũvuanyʼo 21:4.

Nĩ kwa nzĩa yĩva Ngai ‘ũkamelya kĩkwʼũ’ kana ‘ũkamina’ kĩkwʼũ? O tondũ twoona, Mbivilia yaĩtye nesa kana “ala alũngalu . . . [makekala] tene na tene.” Ĩndĩ nĩsyokete ĩkasya kana “kũti mũndũ mũlũngalũ ĩũlũ wa nthĩ, ũla wĩkaa nesa.” (Mũtavanʼya 7:20) Ũu nĩ kwasya kana Ngai ndakaatĩĩa mĩao yake ya ũlũngalu nĩ kana andũ ala me na naĩ mekale tene na tene? Ti wʼo o na vanini! Ngai ndakaeka kũatĩĩa mĩao yake ya ũlũngalu nũndũ “ndatonya kũneena ũvũngũ.” (Tito 1:2) Kwoou, Ngai akeka ata nĩ kana eanĩsye kĩeleelo kyake kya kũmba andũ?

NGAI NĨWEEKIE MŨVANGO WA KŨMINA KĨKWʼŨ KWA KŨNENGANE WOVOSYO

Yeova Ngai nĩweekie mũvango nĩ kana ovosye andũ kuma kĩkwʼũnĩ. Eekie ũu kwa kũnengane wovosyo. Mũndũ aumasya wovosyo yĩla waĩva kĩndũ kĩanene na kĩngĩ kĩnaanangiwe kana eanĩsya kĩla kyaĩle kwa kũatĩĩa sila wa katĩ. Nũndũ andũ onthe me na naĩ na nĩmatwʼĩĩwe kĩkwʼũ, Mbivilia ĩeleetye nesa ĩkasya: “Vai ũmwe wamo ũtonya kwovosya mwana-a-inya wake kwa ũndũ o na wĩva, kana kũmũnenga Ngai mbovosya kwondũ wake (nĩkwĩthĩwa wovosyo wa mathayũ moo wĩ thooa mũnene, ndũĩvĩka tene na tene).”—Savuli 49:7, 8.

Yĩla mũndũ wakwʼa, ethĩawa aĩvĩa naĩ syake, na kwoou ndatonya kwĩyovosya o na ndatonya kũĩvĩa naĩ sya mũndũ ũngĩ. (Alomi 6:7) Vendekaa mũndũ mwĩanĩu na ũte na naĩ aumye thayũ wake nĩ kana aĩvĩe naĩ sitũ, ĩndĩ ti naĩ syake.—Aevelania 10:1-4.

Ngai nĩweanĩisye ũndũ ũsu yĩla wamũtũmie Mwana wake, Yesũ, kuma ĩtunĩ na asyawa ĩũlũ wa nthĩ e mũndũ ũte na naĩ. (1 Vetelo 2:22) Yesũ aisye kana ookie “kũnengane thayũ wake wĩthĩwe wovosyo kwondũ wa aingĩ.” (Maliko 10:45) Akwie nĩ kana aĩvĩe naĩ sitũ na aitũthasya kuma kĩkwʼũnĩ.—Yoana 3:16.

KĨKWʼŨ KĨKAVETWA ĨNDĨĨ?

Ũmũnthĩ twĩkalĩte ĩvinda yĩla Mbivilia yathanie kana “kũkeethĩwa mavinda ma mũisyo na momũ,” na ũu ũtũĩkĩĩthasya kana twĩ “mĩthenyanĩ ya mũminũkĩlyo” ya nthĩ ĩno nthũku. (2 Timotheo 3:1) Mĩthenya ya mũminũkĩlyo ĩkathela yĩla “mũthenya wa sila na wa kwanangwa kwa andũ ala matamũkĩaa Ngai” ũkavika. (2 Vetelo 3:3, 7) Ĩndĩ andũ ala mamwendete Ngai maikanangwa, vandũ va ũu makanengwa “thayũ wa tene na tene.”—Mathayo 25:46.

Andũ angĩ milioni mbingĩ makathayũũkwʼa na mayĩthĩwa na mwanya wa kũkwata thayũ wa tene na tene. Yesũ nĩwathayũũkisye mũndũ yĩla waendie ndũanĩ ya Naini. Ĩvindanĩ yĩu mũndũ mũka waĩ ndiwa aĩ mũkwʼĩĩe nĩ mwana wake e ũmwe, na Yesũ “nĩwamwĩwʼĩie tei mũno,” na athayũũkya mwanake ũsu. (Luka 7:11-15) O na ĩngĩ, mũtũmwa Vaulo aisye atĩĩ: “Nĩ na wĩkwatyo kwa Ngai, . . . kana kũkeethĩwa na ũthayũũkyo wa ala alũngalu na ala mate alũngalu.” Wĩkwatyo ũsu mũlũmu wonanasya nesa ũndũ Ngai wendete andũ mũno wĩana.—Meko ma Atũmwa 24:15.

Andũ mbilioni mbingĩ me na wĩkwatyo wa kwĩsa kwĩkala thayũ tene na tene. Mbivilia yaĩtye atĩĩ: “Ala alũngalu makatiĩwa nthĩ, na makatũa vo kũvika tene na tene.” (Savuli 37:29) Ĩvindanĩ yĩu, andũ makatana mũno na mayĩwʼa meekĩwa vinya yĩla makona ndeto ii mũtũmwa Vaulo waandĩkie myaka ta 2,000 mĩvĩtu syeanĩa. Aisye atĩĩ: “Kĩkwʼũ, ũsindi waku ũĩ va? Kĩkwʼũ, ũmoa waku ũĩ va?” (1 Akolintho 15:55) Mũmaitha ũla mũnene vyũ wa andũ, nake nĩ kĩkwʼũ akeethĩwa aanangwa!