Watchtower LIBRARY INDANETINĨ
Watchtower
LIBRARY INDANETINĨ
Kikamba
Ũ
  • ũ
  • Ũ
  • ĩ
  • Ĩ
  • MBIVILIA
  • MAVUKU
  • MAŨMBANO
  • w20 Mwei wa 6 ĩth. 30-31
  • Ũndũ Tũtonya Kũatĩĩa Wasya wa Soo Ũmũnthĩ

Vai vitio ya kĩla wanyuva.

Vole, ve thĩna waumĩla.

  • Ũndũ Tũtonya Kũatĩĩa Wasya wa Soo Ũmũnthĩ
  • Mũsyaĩĩsya Yĩtavanasya Ũsumbĩ wa Yeova (Ĩkaseti ya Kwĩmanyĩsya)—2020
  • Syongo Nini
  • SOO WA KŨTHI MAŨMBANONĨ MANENE
  • SOO WA KŨMBANYʼA ATUMĨA MAMANYĨWʼE MŨNANGO
  • SOO WA KŨTŨKŨLYA TWĨKE MOALYŨKU
Mũsyaĩĩsya Yĩtavanasya Ũsumbĩ wa Yeova (Ĩkaseti ya Kwĩmanyĩsya)—2020
w20 Mwei wa 6 ĩth. 30-31
Athembi elĩ Aisilaeli maivuva soo ndaasa.

Ũndũ Tũtonya Kũatĩĩa Wasya wa Soo Ũmũnthĩ

ITHYONTHE nĩtwĩsĩ nesa ki kana ‘mĩthenyanĩ ĩno ya mũminũkĩlyo,’ Yeova nĩwe ũtongoesye andũ make, na nĩwe ũmanengae kyonthe kĩla kĩtonya kũmatetheesya maendeee kwĩthĩwa na ngwatanĩo nzeo nake. (2 Tim. 3:1) Ĩndĩ no nginya kĩla ũmwe etwʼĩĩe kũmwĩwʼa Yeova. No tũelekanyʼe ĩvinda yitũ na ya Aisilaeli yĩla maĩ weũnĩ. Maaĩlĩte kũatĩĩa wasya wa soo ũla wavuvwa.

Yeova eeie Mose atue vetha nĩ kana aseũvye masoo elĩ, ala makatũmĩawa “kũmbanʼya ũmbano, na ma syalo sya myako ya maeema.” (Mot. 10:2) Athembi mavuvaa masoo asu kwa nzĩa syĩ kĩvathũkanyʼo nĩ kana andũ mamanye kĩla mendekaa kwĩka. (Mot. 10:3-8) Ũmũnthĩ andũ ma Ngai manengawe myolooto na nzĩa syĩ kĩvathũkanyʼo. Ekai twone nzĩa itatũ itũlilikanasya masoo ala mavuvawa ĩvinda ya Aisilaeli. Mbee, ũmũnthĩ andũ ma Ngai nĩmathokawʼa maũmbanonĩ manene, kelĩ, atumĩa nĩmombanawʼa mamanyĩwʼe, na katatũ, ikundi syonthe nitavawʼa yĩla ve myolooto myeũ kana myolooto yeekwa moalyũku.

SOO WA KŨTHI MAŨMBANONĨ MANENE

Yĩla Yeova wenda “ũmbano wʼonthe” ũmbanĩe mũomonĩ ũla waĩ ngalĩko ya wumĩlonĩ wa syũa ya ĩeema ya kũmbanĩa, athembi mavuvaa masoo elĩ. (Mot. 10:3) Mbaĩ syonthe syaanĩtwʼe ikundi inya na ikamba kambi ithyũlũlũkĩte ĩeema ya kũmbanĩa, na kwoou syonthe nĩsyeewʼaa wasya ũsu. Ala maĩ vakuvĩ na mũomo nĩmatonya kwĩthwa mavikaa vo ĩtina wa ndatĩka mbũthũ. Namo ala kambi syoo syaĩ vaasanga na mũomo nĩmatonya kwĩthĩwa makuaa ĩvinda yingangĩ na makekĩa kĩthito kingangĩ nĩ kana mavike. Ĩndĩ o na methĩwe maĩ vaasa kana maĩ vakuvĩ, Yeova eendaa kĩla mũndũ oke ũmbanonĩ na aimwĩthukĩĩsya.

Ũmũnthĩ tũiendaa ĩeemanĩ ya kũmbanĩa, ĩndĩ nĩtũthokawʼa maũmbanonĩ manene. Amwe nĩ maũmbano manene ma mĩthenya ĩtatũ, na maũmbano angĩ ma mwanya. Maũmbanonĩ asu nĩtũkwataa maũvoo ma vata na myolooto ya kũatĩĩa. Andũ ma Yeova kĩla vandũ ĩũlũ wa nthĩ mamanyĩawʼa maũndũ mavwʼanene maũmbanonĩ asu. Na ala meetĩkĩla kũthi maũmbanonĩ asu, nĩmatanĩaa kwĩthĩwa ĩkomanonĩ ya andũ atanu. Amwe maumaa vaasa kwĩ angĩ. Ĩndĩ onthe ala mathi, nĩmamanyaa kana kĩthito kyoo kĩyĩĩ kya mana.

Nao nata tũkundi tũla twĩ kũndũ kũasa vyũ na kũla kwĩkĩawa maũmbano aa manene? Tekinolongyi nĩtumĩte ala me kũu kũasa matetheka nĩ maũmbano asu, na nũndũ wayo mewʼaa o ta mombene na ala angĩ. Kwa ngelekanyʼo, ĩvinda yĩmwe ovisi mũnene nĩwatũmie mwana-a-asa ovisinĩ wa ũvonge wa Benin. Ovisi ũsu wa ũvonge nĩwakwatanisye vulongulamu weethĩa no ĩvike taoninĩ yĩ na kwale yĩtawa Arlit, yĩ Sahara Desert, nthĩ ya Niger. Ana-a-asa, eĩtu-a-asa, na andũ angĩ mekwendeewʼa nĩmoombanie. Onthe maĩ 21. O na kau maĩ kũasa vyũ, meewʼaa ta mombene na ala angĩ 44,131. Mwana-a-asa ũmwe aandĩkie: “Twĩmũtũngĩa mũvea mwingĩ mũno kuma ngoonĩ nũndũ wa kũtũtetheesya twĩthukĩĩsye ũmbano ũsu. Kĩu kĩtwonisye ĩngĩ kana nĩmũtwendete mũno.”

SOO WA KŨMBANYʼA ATUMĨA MAMANYĨWʼE MŨNANGO

Athembi Aisilaeli mavuva soo o ũmwe, “no anene, atongoi ma ngili sya Isilaeli” me oka maendaa ĩeemanĩ ya kũmbanĩa. (Mot. 10:4) Mathi vau, Mose nĩwamamanyĩasya na aimatavya maũndũ ma vata ala maĩle kũmanya. Kĩu nĩkyamatetheeasya kwĩanĩsya ianda syoo mbaĩnĩ syoo. Ta keka waĩ ũmwe wa anene asu, ndũlea kwĩthĩwa watataa ũndũ ũtonya ũmbane na ala angĩ na ũimanyĩwʼa, kana ti wʼo?

Ũmũnthĩ atumĩa ma kĩkundi mayĩtalaa ta “anene,” na mayĩnenevasya ĩũlũ wa ĩĩthya yĩla Ngai ũmanengete masũvĩe. (1 Vet. 5:1-3) Ĩndĩ nĩmekĩaa kĩthito kingĩ masũvĩe ĩĩthya ya Ngai. Nũndũ wa ũu, yĩla mathokwʼa masukulunĩ me kĩvathũkanyʼo, ta Sukulu ya Ũthũkũmi wa Ũsumbĩ, nĩ kana mamanyĩwʼe mũnango, nĩmetĩkĩlaa na mĩtũkĩ. Mavinda ta asu nĩmamanyĩawʼa ũndũ matonya kwĩanĩsya nesanga mawĩa ikundinĩ. Kĩu kĩtumaa onthe kĩkundinĩ maendeea nesa kĩ-veva. O na ethĩwa ndwaaĩtwa sukulu isu, nũtethekaa nĩsyo nũndũ ala maendie nĩmatũmĩaa kĩla meemanyĩisye kũtetheesya kĩkundi.

SOO WA KŨTŨKŨLYA TWĨKE MOALYŨKU

Mavinda angĩ athembi Aisilaeli mavuvaa soo wĩ wasya wa kũtĩsya. Aisilaeli meewʼa wasya ũsu mamanyaa kana Yeova eenda mombũũkye kambi. (Mot. 10:5, 6) Yĩla andũ meũthama, meekaa ũu na mũvango mũseo vyũ, ĩndĩ nĩvendekaa kĩthito kingĩ mũno. O na vailye ũu, Aisilaeli amwe nĩmatonya kwĩthĩwa maemawa nĩ kũthamathama. Nĩkĩ?

Amwe nĩmatonya kwĩthĩwa meewʼaa maithĩnĩka nũndũ mavinda angĩ soo wa kũthama wavuvawa matataĩĩe, kana ũndũ ũsu ũkekĩka kaingĩ kĩatĩanĩsyo. Kwa ngelekanyʼo, “mavinda amwe mũumbĩ waĩ vo kuma wĩoo kũvika kĩoko.” Mavinda angĩ mekalaa vandũ vamwe “mĩthenya ĩlĩ, kana mwei, kana mwaka.” (Mot. 9:21, 22) Ĩndĩ mo Aisilaeli mathamangie mavinda meana? Ĩvuku ya Motalo kĩlungu kya 33 yĩwetete kũndũ ta 40 kũla Aisilaeli mambie kambi.

Ve mavinda matonya kwĩthwa makwataa vandũ ve na muunyĩ mũseo. Makwata vandũ vailye ũu “weũnĩ ũsu wʼonthe mũnene na wa ũtĩsya,” mailea kwĩthĩwa matanaa mũno. (Kũt. 1:19) Nũndũ wa ũu, mũndũ aĩ atonya kwambĩĩa kũmaka aisũanĩa mathama maikwata vandũ vaseo ta vu.

Yĩla ĩvinda ya kũmbũũkya kambi yavika, mbaĩ imwe nitonya kwĩthĩwa syoonaa wĩ ũndũ wĩ vinya kweteela ivikĩwe nĩ saa syoo sya kũthama. O na kau soo ũsu wĩ wasya wa kũtĩsya wavuvwa mbaĩ syonthe nĩsyeewʼaa, iyoombũũkasya kambi savalĩ ũmwe. Wasya wa kũtĩsya wavuvwa ya mbee, mbaĩ ila syĩ ngalĩko ya wumĩlonĩ wa syũa nĩsyo syaaĩle kũkũsya. Mbaĩ isu syaĩ Yuta, Isakali, na Nzevuluni. (Mot. 2:3-7; 10:5, 6) Mbaĩ isu syakũsya, athembi mavuvaa wasya wa kũtĩsya ĩvinda ya kelĩ. Ĩvinda yĩu ya kelĩ mbaĩ ila itatũ syĩ ngalĩko ya ĩtheo nĩsyo syakũasya. Athembi maendeeaa kũvuva wasya ũsu mũvaka kambi yonthe ya Isilaeli yũmbũũke.

No kwĩthĩwa ve ĩvinda ũseũvyo weekie ũalyũku weewie wĩ vinya kwĩtĩkĩla. O na nĩvatonyeka ĩvinda yĩmwe ũseũvyo ũkethĩwa weekie moalyũku meana ũna matataĩĩwe, na nũndũ wa ũu, ũyĩwʼa moalyũku asu ta maingĩva mũno. Kana ethĩwa ti ũu, no kwĩthĩwa ve ĩvinda ũseũvyo weekie moalyũku ũndũnĩ mũna, na weethĩa we ndũkwendaa ũndũ ũsu ũivĩndũka nũndũ ũnoonaa wĩ o mũseo. O na ethĩwa nĩ kĩtumi kĩva kyatumaa ũalyũku ũsu woneka wĩ vinya, ndũlea kwĩthĩwa weewie wũmĩĩsyo waku watatĩka, na nĩwakuie ĩvinda ũyĩsa kũtwʼĩka nĩwamanyĩa. Ĩndĩ yĩla tweekĩa kĩthito twĩke ũalyũku ũla ũkwendeka, nĩvatonyeka tũkesa kwona kana ũalyũku ũsu nĩ ũathimo kuma kwa Ngai.

Ĩvindanĩ ya Mose, Yeova nĩwatongoesye andũ milioni mbingĩ makĩlanĩlya weũnĩ. Keka ndaatongoesya na kũsũvĩa syana, aka, na aũme asu, vai ũmwe ũvĩta. Ũmũnthĩ tũtwĩe ĩvinda yathe mũno. Ĩndĩ nũndũ tũtongoewʼe nĩ Yeova, tũendeee nesa vyũ kĩ-veva! Kwoou yĩla tweewʼa wasya wa soo, ekai ithyonthe tũtwʼe kwĩthĩwa twĩ ewi ta ala Aisilaeli aĩkĩĩku!

    Kikamba Publications (1950-2025)
    Uma
    Lika Nthĩnĩ
    • Kikamba
    • Tũma
    • Mũvangĩle ũla ũkwenda
    • Copyright © 2025 Watch Tower Bible and Tract Society of Pennsylvania
    • Mĩao ya Kũtũmĩa
    • Ũvoo Waku wa Kĩmbithĩ
    • Mpangilio wa Faragha
    • JW.ORG
    • Lika Nthĩnĩ
    Tũma