Makũlyo Kuma kwa Asomi Maitũ

Ĩandĩko ya Mũtavanʼya 5:8 yĩneeneete atongoi ma andũ kana nĩ Yeova?

Mũsoa ũsu wa kwendeesya waĩtye: “Ethĩwa wĩona kũthĩnwʼa kwa ngya, na ũsili wa katĩ na ũlũngalu maivetwa na ũngʼendu kĩlungunĩ kĩnene kya nthĩ, ndũkasengʼe ũndũ wa ũndũ ũsu: nũndũ ũmwe ũla wĩ ĩũlũ kwĩ ala me ĩũlũ nũsiasya; na ve ala me ĩũlũ kwĩ asu.”​—⁠Mũta. 5:⁠8.

Kwa kũsisya kwa mũndũ, no twasye mũsoa ũsu ũneeneete atongoi ma silikalĩ me oka. Ĩndĩ twaũsũanĩa mũnango, nĩtũkwona no ũsyokete ũkaweta ũwʼo ĩũlũ wa Yeova, na ũwʼo ũsu nũtũkiakiasya na ũkatwĩkĩa vinya.

Ĩandĩko ya Mũtavanʼya 5:8 yĩwetete mũtongoi ũthĩnasya ngya na kũitwʼĩĩa sila ũte wa katĩ. Mũtongoi ũsu aĩle kũlilikana kana nĩvatonyeka akethĩwa asyaĩĩwʼe nĩ mũndũ ũngĩ wĩ na kĩanda kĩnenange kwĩ we, kana wĩ na ũkũmũ mũnenange silikalĩnĩ. Na nĩvatonyeka vakethĩwa angĩ me na ũkũmũ mũnene kwĩ asu onthe. Nĩ ũndũ wa kũmakya kũmanya kana silikalĩnĩ sya andũ, atongoi asu onthe nĩmatonya kwĩthĩwa me alũsani, na ũu ũituma andũ maũmĩa mũno nũndũ wa ũlũsani woo.

Ĩndĩ o na maũndũ mathũka ata, nĩtũkiakiawʼa nĩ kũmanya kana Yeova ethĩawa ‘asyaĩĩsye ala me ĩũlũ’ silikalĩnĩ sya andũ. No tũmwĩkaĩle Ngai atũtetheesye na tũimwaũĩa mĩio yitũ. (Sav. 55:22; Avi. 4:​6, 7) Nĩtwĩsĩ kana “metho ma Yeova maendaa kũũ na kũũ nthĩ yonthe, eyonanʼye e vinya kwondũ wa ala ngoo syoo imwelekele syĩ mbĩanĩu.”​—⁠2 Mav. 16:⁠9.

Kwoou, ĩandĩko ya Mũtavanʼya 5:8 yĩtũlilikanyʼa ũndũ nthĩ ĩno twĩkalaa ĩilye; kĩla ĩvinda vethĩawa mũndũ wĩ na ũkũmũ mũnenange. Na ũndũ ũla wa vata ĩandĩko yĩĩ yĩũtũlilikanyʼa nĩ kana Yeova nĩwe wĩ na ũkũmũ ũla mũnene vyũ; nĩwe Mũnene wa Onthe. Yu nũendeee kũsumbĩka kwĩsĩla Mwana wake, Yesũ Klĩsto, Mũsumbĩ wa Ũsumbĩ wake. Mwene Vinya Wʼonthe, ũla wĩthĩawa ene kĩla kĩndũ na kĩla mũndũ, nĩ mũlũngalu vyũ, o vamwe na Mwana wake.