Yeova Nũathimaa Mũno Ala Matwʼa Kũsyoka Nthĩ Yoo

ANA-A-ASA na eĩtu-a-asa aingĩ ala myaka mĩvĩtu mathamĩĩie nthĩ sya mũingo me na kĩeleelo kya kwongela ũkwati woo, nĩmasyokete nthĩ ila masyaĩwe. Nũndũ nĩmamwendete Yeova na andũ ala angĩ, masyoka kwoo maendie kwĩkala isionĩ ila syĩ na vata mũnene wa atavanyʼa ma Ũsumbĩ. (Mt. 22:37-39) Meeyĩimie maũndũ meva, na makwatĩte moathimo meva? Nĩ kana tũkwate ũsũngĩo, ekai tũneenee nthĩ ya Cameroon, ĩla yĩ ngalĩko ya ũthũĩlonĩ wa syũa ya Africa.

“VANDŨ VALA VASEO VA ‘KŨTEA’ ANDŨ”

Twĩ mwakanĩ wa 1998, mwana-a-asa wĩtawa Onésime nĩwaumie nthĩ yoo ya Cameroon athi mũingo. Ekalile kũu myaka 14. Ĩndĩ mũthenya ũmwe e maũmbanonĩ ma Kĩklĩsto, nĩweewie ngelekanyʼo ĩneeneete wĩa wa kũtavanyʼa. Mumya wa ũvoo aisye, “Kwasũanĩa anyanya elĩ maitea makũyũ isionĩ syĩ kĩvathũkanyʼo, na ũmwe aikwatya makũyũ maingĩ kwĩ ũla ũngĩ. Ũla ũkwatĩtye makũyũ manini ndaema kũthi kĩsionĩ kĩla kĩ na makũyũ maingĩ, kana wĩona ata?”

Ngelekanyʼo ĩsu yatumie Onésime ambĩĩa kwĩka masavu ma kũsyoka Cameroon akatetheanĩsye na ana-a-asa ma kũu wĩanĩ wa kũtavanyʼa, nũndũ nthĩ ĩsu yĩ andũ aingĩ mendeeawʼa. Ĩndĩ no wakĩaa. Eekũlasya kana nũkesa kũmanyĩa kwĩkala nthĩ ya kwoo nũndũ ekalĩte myaka mingĩ mũno mũingo. Nĩ kana Onésime amanye kana no avote, aendie kũtembea Cameroon vandũ va myei thanthatũ. Na ĩndĩ mwaka wa 2012, nĩwathamĩĩie nthĩ ĩsu vyũ.

Onésime aĩtye atĩĩ: “Yaĩ no nginya nĩmanyĩe ũvyũvu wa kũũ na kwĩkaa maũndũ kĩvathũkanyʼo na ũndũ namanyĩĩte. O na ĩngĩ, yaĩ no nginya nĩmanyĩe ĩngĩ kwĩkalĩla ivĩla sya mbwaũ Nyũmbanĩ ya Ũsumbĩ.” Ĩndĩ aendeee kwasya ũũ athekete, “Neethukĩĩsya nesa kĩla kĩũneenewa ũmbanonĩ, ndyasũanĩaa mũno ũndũ nĩ mũingo nekalĩlaa ivĩla iteũmbivinya.”

Twĩ mwaka wa 2013, Onésime nĩwatwaie Géraldine. Géraldine asyokete Cameroon ĩtina wa kwĩkala nthĩ ya France myaka kenda. Nĩ moathimo meva makwatie nũndũ wa kũtũnga ilĩko syoo ũthũkũminĩ wa Yeova? Onésime aĩtye: “Nĩtweetiwe Sukulu ya Atavanyʼa ma Ũsumbĩ na ĩtina twambĩĩa kũthũkũma Mbetheli. O mĩtũkĩ, nthĩnĩ wa mwaka o ũmwe tũ, ve amanyĩwʼa 20 kĩkundinĩ kitũ manavatisiwe. Yu nĩĩwʼa nĩ vandũ vala vaseo va ‘kũtea’ andũ.” (Mko. 1:17, 18) Nake Géraldine ongeleele kwasya: “Nĩkwatĩte moathimo maingĩ kũvĩtũka ũndũ nasũanĩaa.”

NĨWATANĨIE KŨTWʼĨKĨTHYA ANDŨ AMANYĨWʼA

Judith athamĩĩe Amelika, ĩndĩ nĩwendaa mũno kwongelanga ũthũkũmi wake. Aĩtye,“Yĩla nooka kwona andũ ma mũsyĩ kũũ Cameroon, naĩaa mũno ndisyoka nũndũ natiaa andũ naĩ nĩnambĩĩa kũmamanyĩsya Mbivilia.” Ĩndĩ o na ũu wĩ o vo, Judith nĩwakĩaa kũthamĩĩa Cameroon. Athũkũmaa wĩa mũseo wamũtetheeasya kũiitĩthya ĩthe, ũla wekalaa Cameroon. Ĩndĩ nĩwamwĩkwatisye Yeova na athama. Nũwetaa ateũvitha kana ve moseo amwe watanĩaa mũingo wĩwʼaa aimakosa. Nĩwamũvoyie Yeova amũtetheesye kũmanyĩa maũndũ meũ, na mũsyaĩĩsya ũmwe wa mũthyũlũlũko na mũka nĩmamwĩkĩie vinya.

Judith atũnga kĩlĩko ĩtina easya, “Myaka ĩtatũ ĩithela, nĩnatetheetye andũ ana nginya makavatiswa.” O na nĩwesie kũtwʼĩka vainia wa mwanya. Na ũmũnthĩ, e na mũũme, Sam-Castel, mathũkũmaa wĩa wa kũthyũlũlũka. Ĩndĩ maũndũ ma ĩthe maendie ata? Judith na andũ ala angĩ ma mũsyĩ nĩmakwatie sivitalĩ yĩ mũingo yaĩ ĩtonya kũiita ĩthe mana. Na nũndũ ĩthe endaa kũthĩnzwa, matanie mũno ũiiti wake wathi nesa.

NĨMEEYONEIE YEOVA AIMATETHEESYA

Nake mwana-a-asa wĩtawa Victor athamĩĩe nthĩ ya Canada. Yĩla wasomie kĩlungu kĩ ĩkasetinĩ ya Mũsyaĩĩsya kyaneeneete kĩsomo kya ĩũlũ, nĩwambĩĩie kũsũanĩa mũnango ĩũlũ wa kĩsomo kyake. Nĩwaekanie na yunivasiti, na ambĩĩa kũsomea koosi yendaa o ĩvinda ĩnini. Aĩtye, “Kwĩka ũu nĩkwatumie nĩkwata wĩa mĩtũkĩ, o na nĩkwatumie nĩanĩsya mũvango naĩ nawʼo kuma tene, nawʼo nĩ kwosa ũvainia.” Victor nĩwesie kũtwaa Caroline, na mathi kũtembea Cameroon. Me kũu, nĩmaendie kũtembea ovisinĩ wa ũvonge, na ana-a-asa amwe mamekĩa vinya meke masavu mone kana no mathamĩĩe kũu. Victor aĩtye, “Tũyaĩ na kĩtumi o na kĩmwe kya kũlea kwĩka ũu, na nũndũ tũyaĩ na syĩndũ mbingĩ iũtũvĩngĩĩsa, twaĩ tũtonya kũthamĩĩa kũũ.” O na kau Caroline aĩ na tũmathĩna tũna twa mwĩĩ, nĩmatwie kũthama.

Victor na Caroline me Cameroon nĩmaendeeie na ũvainia wa kĩla ĩvinda nĩ kana matetheesye andũ aingĩ ala mendeeawʼa. Mambie kũtũmĩa mbesa ila moombanĩtye. Yĩla syathelile, nĩmasyokie Canada mathũkũma myei kauta, na makwata mbesa imatoetye kũsyoka Cameroon maendeee na ũvainia. Ĩndĩ makwatie moathimo meva? Ĩtina wa ĩvinda, nĩmaendie Sukulu ya Atavanyʼa ma Ũsumbĩ, matwʼĩka mavainia ma mwanya, na ũmũnthĩ matetheeasya wĩanĩ wa kwaka. Victor aĩtye, “Kũtia maũndũ ala twamanyĩĩte nĩkwatũnengie mwanya wa kwona Yeova aitũtetheesya.”

NĨMATANĨIE KŨTETHEESYA ANDŨ MAMŨTHŨKŨME YEOVA

Mwakanĩ wa 2002, mwana-a-asa wĩtawa Alain, ũla wasomeaa yunivasiti yĩ Germany, nĩwasomie tulakiti Vijana​—Mtatumiaje Maisha Yenu? Kĩla wasomie kyatumie avĩndũa vyũ mĩvango yake. Twĩ mwakanĩ wa 2006, nĩwaendie Sukulu ya Kũmanyĩsya Maũndũ ma Ũthũkũmi (MTS), na atũmwa nthĩ ĩla wasyaĩwe ya Cameroon.

Alain avika Cameroon, nĩwakwatie wĩa wathũkũmaa masaa manini kwa kyumwa. Ĩtina, nĩwakwatie wĩa waĩvawa nesa, ĩndĩ nĩwathĩnĩkaa ayona wĩa ũsu ta ũtonya kũtuma aemwa nĩ kũtavanyʼa nesa. Kwoou yĩla wakũlilwʼe atwʼĩke vainia wa mwanya, eetĩkĩlile ate kwananga ĩvinda. O na kau ũla wamũandĩkĩte nĩwendaa kũmwongela mũsaala, ndaaĩtĩkĩla kũsyoka wĩanĩ. Ĩtina wa ĩvinda, Alain nĩwatwaie Stéphanie, ũla wekalĩte France myaka mingĩ. Stéphanie akomanie na mawetu meva athamĩĩa Cameroon?

Aĩtye atĩĩ: “Nĩnakwatiwe nĩ tũmathĩna tũnini twa mwĩĩ, na ve syĩndũ imwe syanthũaa, ĩndĩ nĩnakwatie ũiiti wandetheeisye kwĩwʼa kavaa.” Alain na Stéphanie nĩmaathimiwe mũno nũndũ wa wũmĩĩsyo woo. Alain aeleetye ũũ: “Ĩvinda yĩmwe nĩtwaendie kũtavanyʼa ũtũinĩ ũmwe wĩtawa Katé, na nĩtwakwatie andũ kauta mendaa kwĩmanyĩsya Mbivilia. Tũendeangĩe nĩtwambĩĩie kwĩmanyĩsya Mbivilia namo tũtũmĩĩte simũ. Amanyĩwʼa elĩ katĩ wa asu nĩmavatisiwe, na ũu watuma ndũanĩ ĩsu vambĩĩwʼa kakundi.” Nake Stéphanie ongeleele kwasya: “Vai ũtanu ũthonokete ũla mũndũ wĩwʼaa atetheesya andũ nginya meyumye mamũthũkũme Yeova. Kũtavanyʼa kũũ nĩkũtumĩte tũkwata ũathimo ũsu mavinda maingĩ.” Ũmũnthĩ Alain na Stéphanie me wĩanĩ wa kũthyũlũlũka.

“TWEEKIE O KĨLA TWAAĨLE KWĨKA”

Gisèle avatisiwe e sukulu ya ũtakĩtalĩ nthĩ ya Italy. Mwĩĩtu-a-asa ũla wamũmanyĩasya Mbivilia aĩ vainia e na mũũme, na Gisèle nĩwendeeiwʼe mũno nĩ ũndũ mekalaa mateyũmbĩĩe syĩndũ mbingĩ. Kĩu kyatumie o nake enda kwongelanga ũtavanyʼa wake. Kwoou nĩwoosie ũvainia wa kĩla ĩvinda angĩe kũmina sukulu.

Gisèle nĩwendaa kũsyoka Cameroon nĩ kana akamũthũkũme Yeova mũnango, ĩndĩ nĩwakĩaa. Aĩtye, “Yaĩ no nginya nĩtũnge mavalũa ala mambĩtĩkĩlasya kwĩkala Italy, na nditiana na anyanyawa na andũ ma mũsyĩ ala maĩ nthĩ ĩsu.” O na ũu wĩ o vo, twĩ Mwei wa 5, 2016, Gisèle nĩwasyokie Cameroon. Ĩtina wa ĩvinda, nĩwatwaiwe nĩ Léonce, na ovisi wa ũvonge wa Cameroon wamekĩa vinya mathi taoninĩ yaĩ na vata mũnene wa atavanyʼa yĩtawa Ayos.

Maũndũ mailye ata mathi Ayos? Gisèle easya: “Mavinda maingĩ twaminaa syumwa kauta tũtona sitima, na kwoou tũyaĩ tũtonya kwĩkĩa simũ sitũ mwaki. Nũndũ wa ũu, iyatũtethasya mũno. Nĩneemanyĩisye kũua na ngũ, na twaendaa kũuta kĩwʼũ ũtukũ na kamii twĩmulĩkĩle na tosi nũndũ saa isu kĩthimanĩ kũyeethĩawa na andũ aingĩ.” Nĩ kyaũ kyamatetheeisye kũmĩĩsya? Gisèle aĩtye: “Twaendeeie kũmĩĩsya nũndũ Yeova nĩwatũnengae veva wake, nĩtwatetheanĩasya, na andũ maitũ ma mũsyĩ na anyanya nĩmatũthangaasya na maitũtetheesya na mbesa mavinda kwa mavinda.”

We Gisèle nũtanĩaa kũsyoka nthĩ yoo? Aĩtye atĩĩ: “Ĩĩ, vyũ! O na kau twavika oou nĩtwakwatiwe nĩ mathĩna na nĩtwatũlĩkaa ngoo, nĩtwesie kũmakĩlya vinya, na nũndũ wa ũu, nĩ na mũemewa no twasye tweekie o kĩla twaaĩle kwĩka. Nĩtũmwĩkwatasya Yeova na twĩwʼaa twĩ vakuvĩ nake kwĩ tene.” Léonce na Gisèle nĩmesie kũthi Sukulu ya Atavanyʼa ma Ũsumbĩ, na ũmũnthĩ nĩ mavainia ma mwanya ma kavinda.

O tondũ atei ma makũyũ momĩĩasya mathĩna manene nĩ kana makwatye makũyũ maingĩ, ala masyoka nthĩ yoo nĩmeyĩimaa maũndũ maingĩ nĩ kana matetheesye ala me na ngoo nzeo na mekwendeewʼa nĩ ũvoo mũseo wa Ũsumbĩ. Yeova ndakaema kũlilikana atavanyʼa asu me kĩthito na aimeka nesa nũndũ wa wendo ũla monanĩtye kwondũ wa ĩsyĩtwa yake. (Nee. 5:19; Aevl. 6:10) Ethĩwa wĩkalaa mũingo na nthĩ yenyu yĩ na vata mũnene wa atavanyʼa ma Ũsumbĩ, no wende kũsyoka? Weeka ũu, ũkakwata moathimo maingĩ.​—Nth. 10:⁠22.